Уйпалэз ӝутӥсько

Удмурт Дунне
By Удмурт Дунне Апрель 12, 2013 14:28

Уйпалэз ӝутӥсько

М. Слесарева

М. Слесарева

Филология наукаосъя кандидат, Россиысь дано дышетӥсь Мария Слесарева Глазовысь В. Г. Короленко нимо пединстиутын дышетэ, удмурт филологияя но регионалистикая кафедраын ужа. Фин-угор фольклоръя ог 50 методической пособиосыз но научной статьяосыз.

— Мария Тихоновна, выжыды тӥляд лымшор Алнаш палъёсысь.

— Вордӥськи Алнаш ёросысь Карйыл гуртын. Вуж Утчан шор ёзо школаын дышетски. Отчы вить иськемез нуналлы быдэ пыдын ветлӥмы. Школаез йылпумъяса, дышетскыны пыри Удмурт кун университетысь удмурт филологияя факультетэ. Со вакытэ ваньмыз эмъясь но дышетӥсь луон сярысь малпаллязы, мукет профессиосты ӧм ик тодылэ. Эмъясь луыны ноку ӧй малпалля, бырйи дышетӥсьлэсь ужзэ. Школаын дышетскыкум, визьнодасьёс шоры синмаськыса но вожъяськыса учкылӥ.

Потэ вал географ но луэме, филология но бордаз кыскылӥз. Иже мыныкум ини, поездысен Можга ёросысь нылашен тодматским, со но, пе, университетэ экзамен сётыны мынӥсько. Со нылаш ик монэ сьӧраз кыскиӟ ойдо, шуэ, филологической факультетэ пыром.

Студент вакытъёсмы туж шулдыр ортчизы. Университетэз йылпумъяса, ужаны кыли УдНИИ-ысь литературая но фольклоръя отделэ. Соин соку кивалтӥз Анатолий Уваров. Анатолий Николаевич, витетӥ курсын дышетскыкумы ик, милемын тодматскиз ни вал, ӟеч дышетскисьёсты институтэ ужаны ӧтиз. Тау карыны кулэ солы, улонам югыт сюрес усьтӥз шуыса. Собере Анатолий Николаевич ӵектэмъя ик тодон-валанме будэтыны Москваысь дунне литературая институтэ аспирантурае пыри. Отын но фольклоръя секторе шеди. Калык творчестволы сӥзьыса, диссертация гожтӥ. Одӥг дыре ми дышетскимы Людмила Кирилловаен, Татьяна Зайцеваен, Пётр Поздеев кылбурчилэн Ирина нылыныз. Бӧрысь со Германие кошкиз. Александр Шутов тодосчи но милемын огвакытэ дышетскиз. Со доры ми ӵемысь куное ветлылӥмы.

Дышетсконме йылпумъяса, Иже бертӥ, ужаны научно-исследовательской институтэ ик пыри. Отын литературая но фольклоръя секторен кӧня ке кивалтыса вуттӥ. Собере Глазовысь В. Короленко нимо пединститутысь педфакын малпазы удмурт отделение усьтыны.

— Уйпал ёросэ мынӥсь-коды шуыса, пичи но ӧд кышкалэ-а?

— Малы ке но чик сыӵе кышканэ ӧз кылдылы. Мон соку огнам йырам вал али, кутӥсе ӧвӧл, мар мынонтэмез кадь. Нырысьсэ адӟеме бере ик Глазов городлы туж синмаськи. Тулыс вал соку, Киров ульчаын сирень сяськая. Город вӧзтӥ мар ке пасьта ик Чупчи шур бызе. Ульчаосын машинаос ӧжыт. Омыр татын воксё мукет. Одӥг машина кошке но, со ӵындэ шуыса, шӧдӥськод ини. Мон та карлы соку ик гуртэлы кадь дыши. Иж сярысь со трослы пичи но чылкыт. Бадӟым городын алекмисько мон, Ижын но, Москваын кадь ик, калыкез трос потэ. Ми Глазовын, эсьмаса, уж дуре гинэ но пыдын ветлӥськом. Ижын малы ке вань коркаос огвыллемесь, коробкаос кадь сыло, писпуос но туж ӧжыт. Нош Глазовын чылкак мукетэсь коркаос. Татын мон 25 арлэсь кема улӥсько ини. Тодмоосылы серекъяса шуиськӧ уйпалэз ӝутыны мон лыктӥ. Удмурт кылэз вӧлмытон сярысь сюлмаськисько.

— Глазов палъёс улон интыен но гочатыны быгатӥзы, луоз? Ижын шуггес ук квартира басьтыны.

— Озьыгес луиз. 1987-тӥ арын мон татчы лыктӥ. Вуэмелэсь азьло ик квартира сётом шуизы. Кин солы пумит луоз? Верамзыя ик пӧрмиз. Вуи гинэ но, сэрег висъязы. Одӥг ар ужаса, туж пумитъяськыны выри ке но, педагогикая но методикая кафедраен кивалтыны оскизы. Татын туж трос вал пӧртэм специальностьёс. Кафедрамы бадӟым, 14 преподавательёс но методистъёс ужазы.

— Собыдӟа интые пуксьыны дӥсьтонды тырмем, иське?

— Кытчы пырод, косӥзы бере, ужано луиз ини. Али малпасько ке, паймисько, кытысь собыдӟа кужыме тырмем шуыса. Мынам соку ужан но дышетон опытэ туж ичи на вал. Институтэ лыктыкум, лекциос гинэ лыдӟо шуыса малпай. Но озьы ӧз луы, литератураез но фольклорез сяна, лыдӟоно луиз вань курсъёслы ӟуч но удмурт филологиез.

— Нош удмурт филологияя кафедрадэс ку но кин кылдытӥз?

— Мон татчы лыктыку, со ӧй вал на. Сыӵе кафедралэн кулэлыкез вань шуыса, 1990-тӥ аръёсы ректоратэ вазиськи. 1993-тӥ арын малпанэ быдэсмиӟ удмурт кафедра усьтӥмы. Озьы мон кафедраез кылдытӥсь но соин кивалтӥсь луи. Педагогической факультетэ конкурс туж бадӟым вал. Пӧртэм районъёсысь нылпиос вуылӥзы. Лымшор палъёсысь но трос гинэ лыктылӥзы. Одӥг аре факультетамы Алнаш ёросысь Туймыйыл гуртысь 7 студентъёс дышетскизы. Нылпиос огзылэсь огзы адӟем каро ук. Сыӵеослы юрттэм потэ. Ми дорын дышетскем студентъёсты ӟечен гинэ тодамы вайиськомы.
Кӧня ке аръёс кафедраен кивалтэме бере вис кароно луиз, пинал вайи. Бӧрысь ӧз ни поты кивалтон борды кутскеме. Соку кафедраенымы Борис Иванович Каракулов кивалтӥз. Пиналы будэм бере кӧня ке дырлы кутскылӥ на та удысэ борды, собере серметме егитъёслы сётӥ: берло аръёссэ Татьяна Волкова кивалтӥз.

— Факультетады дышетскисьёсты тырмыт-а?

— Студентъёс кулэсмизы, педфакез ректорат кулэен ӧз ни лыдъя. Туэ берпуметӥез группамы кылиз филологияя факультетэ. Шуген ке но, одӥг педагогической группа люканы быгатӥмы ик на. Удмурт кун университетын быдэс факультет филологъёсты дася. Пӧртэм специальностьёслы отын дышето. Педагогикая факультетмес кызьы ке возьыны мед быгатомы на вылэм. Отчы пырыны мылкыд карисьёс вань.

Азьвыл аръёсты чаклано ке, янгышъёсмы асьмелэн но вал, дыр, филологияя факультетэ но студент люканы вырыса. Кылем арын выльысь, мырдэм но кызьы куримы но, усьтӥзы. Туннэ нуналэ удмурт кафедрамы пытсамен лыдъяське. Ми отын ньыль кузя преподавательёс ужаськомы, кылем студентъёсмес дышетӥськомы. Ваньмы наукая кандидатъёс. Кивалтэ милемын Ольга Петровна Никифорова. Студентъёсмы луизы ке, малпасько, азьланьын ужаломы на.

Нылпи садын ужась воспитательёслы но покчи классъёсын дышетӥсьёслы асьме шаерын нокытын, ми дорын сяна, вылӥ тодон-валан уг сёто ук. Соин ик милемлы туж возиськыны кулэ вал. Дорамы дышетскем дышетӥсьёсын но воспитательёсын пумиськылонъёс ортчытъяськом, ёросъёсы доразы поталляськом, урокъёсазы пукылӥськом. Институтэн кивалтӥсьёс кафедрамес пытсан понна огвакытэ муг шедьтӥзы: студентъёсты, пе, уж уг шедьто. Соку мон быдэс шаерысьтымы ми пыр потэм воспитательёслэн но покчи классъёсты дышетӥсьёслэн фамилиосынызы список вайӥ ас специальностьсыя уже пыремъёс 87 процент луизы. Педагогикая факультетэз йылпумъям студентъёс уже ӟеч интыясько, гуртъёсы берто. Ми соос доры ӵемысь потаськомы, руноосы вуылӥськомы. Ваньзы ик студентъёсмы синмаськымон ужало, тужгес но пусъем потэ Глаз ёросысь Светлана Набоковаез, Уваысь Любовь Васильеваез.

— Тӥляд институтады тодмо удмурт писательёс дышетэмын: Флор Васильев, Даниил Яшин, Георгий Архипов. Дан, дыр, сыӵе интыын ужаны?

— Конешно, туж данъяськисько мон, сыӵе адямиос татын ужамын шуыса. Соос дышетон вакытэ ик институтын удмурт факультет усьтэмын вал. Собере сое малы ке но ворсаллям. Бӧрысь кивалтӥсьёс янгышамзэс валазы, лэся, выльысь факультетэз усьтӥзы. Жаляса верано, нош ик сыӵе югдуре вуиськомы кадь.

— Кыӵе амалъёсын студентъёсты дорады кыскыны выриськоды?

— Школаосын удмурт кылъя но литературая ЕГЭ уг сёто. Пиналъёслэн мукет вузъёсы пырыны ӟуч кылъя, математикая но литературая баллъёссы уггес ке тырмо, ми сыӵеосты дорамы кыскыны тыршиськомы. Удмурт группае пырисьёс ӟуч кылын но обществознаниен ЕГЭ сёто. Удмурт кылъя но литературая собеседование ортчытӥськом.

— Удмурт воспитательёсты но дышетӥсьёсты дасяськоды бере, Удмурт кун университетэн кусыпъёсты ӟечесь, луоз?

— Отысь преподавательёсын кусыпъёсмы котьку но ӟечесь вал. Соос монэ кун экзаменъёсы пукылыны ӧтчаллязы. Мыным со туж бадӟым дан. Отысь бадӟым опыт басьтӥ. Ми но кун экзаменъёсамы университетысь преподавательёсты — Виктор Шибановез, Светлана Арекееваез — ӧтчаллямы. Озьы ик ӟеч кусып возьылӥмы Венгриысь Печ университетысь преподавательёсын. Соосты но дорамы ӧтчаллямы. Туала арын сыӵе луонлыкъёс быризы. Азьло аръёсы палэнын ортчылӥсь уно пӧртэм конференциосы но конгрессъёсы поталлямы.

— Глазов тӥледыз сокем бордаз бинялтэм. Нош ӵемысь-а вуылӥськоды Карйыл палъёсады?

— Егит дыръям арнялы быдэ бертылӥ. Ижозь но вуылыны тыршылӥ. Тросэз эшъёсы отчы кылемын уго. Ма, собере Оля апае но отын улэ, «Инвожо» ансамбльын кырӟа, 59-тӥ школаын библиотекарь луыса тырше. Соин ӵош спектакльёс, концертъёс учкыны ветлӥмы. Собере мылкыды пуксьыны кутскиз, дыр но ӧз тырмы ни, уже тросгес но тросгес луиз, пумен Глазовысь но эшъёс шедьтӥ. Отӥяз семьяе кылдӥз. Жаляса верано, анае но, атае но улонысь кошкемын ини. Но семьяеным гужемлы быдэ бертылӥськом. Вордӥськем гуртамы Тоня апаймы улэ. Со доры анаймы доры сямен вуылӥськомы. Огазе луиськомы ке, ваньмы ӵош, куинь сузэр-апайёс, удмурт кырӟанъёсты кырӟаны яратӥськом, туж тупаса, огкылысь улӥськом.

— Семьяды бер гинэ кылдӥз шуиськоды, кытысь яратондэс пумитады?

— Озьы луыса кошкиз. Володялэн анай-атаез Алнаш палъёсын ик, Ӟуч Асан гуртын, вордскемын вылэм. Нош пумиським ми Глазовын. 1992-тӥ арын гинэ ай кузпалъяським. Фамилиме воштэме ӧз ни поты, аслэсьтымзэ ик кельтоно кариськи. Кузпалылэн выжыез Алнаш палъёсысь ке но, отысь со пичи дырысеныз кошкемын, мон сьӧры мыныса гинэ, выжы-кумыеныз тодматскиз ини. Огазеяськеммы бере куинь ар ортчыса, Лена нылмы вордскиз. Володяе Чепца механикая заводын инженер-технолог луыса тырше. Нылмы 11-тӥ классын дышетске ини. Володяен ог-огмес валаськомы, туж лякыт сямо со, чурыт кылзэ вератэк, улыны тырше, семья кусыпез ӟеч возе. Володя удмурт кылэз уг тоды. Соин ик нылынымы ӟуч кылынгес вераськоно луиськомы. Лена пичи дыръяз туж тунсыкъяське вал удмурт кылын, кӧня ке вераськем но карылӥз, собере нылпи садэ мынӥз но воксё ӟучомиз. Сюлэмы шуггес ик, вордэм нылы анай кылыныз уг вераськы шуыса. Алнашын апаелэн нылызлэн Владик пиез удмурт кылын туж чебер вераське, ӟученыз но быгатэ ини. Вот, шуисько, Лена, тон одӥг кылын гинэ вераськиськод, нош Владик, сыӵе пичи маке, кык кылэз тодэ. Соку нылы мыным шуиӟ Влад гинэ но монэн ӟуч сямен вераськыны быгатэ бере, малы сое мыным дышетыны кулэ? Но нылы уг на вала, удмурт кылэз ӟеч тодэм узырмытэ шуыса. Сыӵе дыръя оло серекъялод, оло вождэ поттод, оло валэктон сётод.

— Нылды но дышетон удысэз ик быръёз, вылды?

— Леналэн дышетӥсь луэмез уг поты. Со адӟе ук: мамаез уен-нуналэн книгаос но тетрадьёс пушкы выемын. Институтамы но уг поты пыремез. Музон азьын, пе, дышетскысал. Аслаз сюлэмыз информатика удысэ кыстӥське кадь. Кин тодэ, пинал на ук со, оло, малпанэз сю пол но воштӥськоз ай, али мылкыдыз сояз но, таяз но ӝуткаське.

Нылыныз

Нылыныз

— Ваньмон дырдэс кытын ортчытӥськоды?

— Туж яратӥсько сад-бакчаме. Отысь сяськаосын но будосъёсын шара вераськисько. Арнялы быдэ бакчаямы мунчое пыриськом. Веникен кокаськыны яратӥсько. Ми семьяеным инкуазен эшъяськиськом. Толалтэзэ куас вылэ султӥськом, гурезетӥ нискыласьком. Гужемзэ нюлэскытӥ огшоры ветлӥськом, юзмыт омырен шокаськом.

Валлё аръёсы мыло-кыдо пыриськылӥ удмуртъёслэн огазеяськонзылэн ужаз, юромо Эшъяськон юртэ ветлылӥ. Ма, али но удмуртлык борды сюлэмы кыстӥське.

— Кызьы сыӵе чебер но егит возиськиськоды?

— Егит анай шуыса-а, мар-а. Ма, собере студентъёсын ужаса но, дыр. Ялан мон соос пӧлын ук. Валлё аръёсы мон соосты ӵемысь Иже Удмурт театре нуллӥсько вал, котькудӥзлы выль спектакльлы анализ лэсьтылӥмы. Табере коньдонэз шыръятэк ӧвӧл, сыӵе луонлык быриз. Вазен сюрес вылэ потаны студентъёслэн профсоюззы но юрттылӥз. Егитъёсын ӵош экспедициосы вуылӥмы, гуртысь гуртэ, калыклэсь кырӟан-веранъёс, такмакъёс гожъяса, ветлӥмы.

— Луысал ке, улонысьтыды мае воштысалды?

— Улонын ваньмыз мылкыдъя гинэ уг луы вылэм. Чутрак ваньзэ ӧй воштысал. Дышетӥсь луонэ Инмарен сётэмын. Тау, кузпалы но нылы вань шуыса. Сюлэмы шуг одӥгезлы: медаз быры вылэм удмурт филологияя кафедрамы. Удмурт школаослэн лыдзы тросгес луысалзы ке, соосты пытсаны но шуггес луысал. Тани Глазов ёросэз ик басьтоно ке, кӧня ӟеч шор ёзо школаосты покчи классъем кельто. Анай-атайёслэсь уг юаллясько. Малпасько, соос пумитъяськысалзы ке, ӧй быгатысалзы озьы гинэ школаосты ворсаны. Тани алигес нош ик Золотари школаез пытсазы. Дышетӥсьёслэн коллективзы но ӟеч, музейзы но туж узыр. Табере нылпиос сьӧрлось школае автобусэн ветло.

Любовь Тихонова

Удмурт Дунне
By Удмурт Дунне Апрель 12, 2013 14:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<