«Сюанам но сокем ӧй дасяськы!»

Удмурт Дунне
By Удмурт Дунне 1 апреля, 2013 15:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Сюанам но сокем ӧй дасяськы!»

Татьяна Колесникова

Татьяна Колесникова

29-тӥ южтолэзе Пичи Пурга черкогуртын ортчиз витетӥез юбилейной «Чеберина» вожвылъяськон. Вормиз Бобья-Учалась дас укмыс аресъем Татьяна Колесникова.

«Чеберина» ёросазы «Чеберина» ик кылиз, нимзэ ӧз вошты, пусъе ӝытлэн радъясез, ёрос культура юртын ужась Елена Пименова. 1995-тӥ арысен кутскыса, шаерамы ортчись ужрадлэн гимнэз чузъяське: «Коть бикини, коть зыбын-а…» Туэ но пичи пургаос йылоллэсь ӧз палэнске — ӵошатсконэз усьтыса, гурзэ задор мылкыдын мытӥзы Сергей Никандров но Петр Денисов.

Ижысь ӟечкыланы вуэм егитъёсын ужанъя министр Владимир Соловьев та тодмо гурез «Алнаш мылкыд» ансамблен кырӟамзэ тодаз вайиз, луоз: кутсконаз ик ушъяз, пурга чеберина элькунамы ортчись вожвылъяськонлэсь золгес адске ни шуыса. Та палъёсысь нылъёслы синмаськемзэ вератэк ӧз чида ужрадлэн нуисез Алексей Ложкин но.

Ӵошатсконэ пыриськизы 7 нылашъёс. Е. Пименовалэн верамезъя, мылкыд карисьёс трос вал, но бырйизы юромо ӧжытсэ. Ужрад капчиен, ӝог ортчиз. Нылъёс ӧз возьдаське, сцена вылын асьсэды эрико возизы. Визитка конкурсын висъяськиз Татьяна Колесникова. Нылаш удмурт рэп дасям, но… кылъёссэ вунэтэм. Озьы ке но, мусо пальпотэмез но эктэмез ас палаз берыктӥзы. Залын кылӥськизы «Молодец! Оригинально!» шуыса шыпыртэмъёс. Пурга нылъёс кельшизы удмурт луэмзэс, кылзэс, водскем интыоссэс данъяменызы. Ваньзы дасяллям тунсыко слайд-шоу. Вальёнысь Ангелина Абрамова али гинэ школазэ йылпумъя ай, нош Аксакшурысь Марина Николаевалэн кык пиналыз вань ини. Улын Юриысь англи кылъя дышетӥсь Алёна Ильина — ӝужыт, мотор, синмальдымон, черсыны но быгатэ, пе. Брангуртысь шаплы апок Надежда Ермачёва «Тулыс ортчиз ни» йыре пырись гуреныз тодматӥз, нош Вуж Моньялась мусо нылок Наталья Емельянова малы ке дыртыса кырӟаз, «Мальвиназэ» сураз.

Быгатонлыкъёссэс возьматэм сяна, нылъёс туала удмурт дэремен дефиле возьматӥзы. Дӥсьсэс асьсэос вуриллям. Тужгес но чебер костюм дасям Куреггуртысь Мария Васильева. Та нылаш соку ик висъяськиз аслаз шуныт мылкыдыныз, зал но со понна висиз, чабиз-шулаз. Аспӧртэм адскиз арган улсы кык казакпиосын гур ӵоктэт вылын эктэмез.

— Машамы герой, шуыны луоз, — верало куреггуртъёс. — Арня талэсь азьло тодыса, оломар куспын дасяськиз. Ай солэн толэзь талэсь азьло сюанэз вал. Сюанам но сокем ӧй дасяськы, пе. Тани пияшъёсмы но репетициосы юромо Ижкарысь ветлӥзы.

Чеберай Таня Колесникова гуртысьтыз ик Ярослав Никифоровен ӵош шулдыр буги-вуги эктӥз. Нылаш дышетске Можгалась педколледжын, азьланяз школаын покчиосты дышетоз. Пыриське Россиысь егитъёслэн огазеяськоназы. Вормемезлы чик ӧз оскы, шуэ. Бобья-Уча клубысь ужась Екатерина Королёва дышетскисез понна шумпотэ: Таня нырысьсэ огназ потӥз таӵе бадӟым сцена вылэ.

Учкисьёс сётӥзы куаразэс Н. Ермачева понна, Визьнодӥ луиз М. Николаева, Мусокай — М. Васильева, Устокай — А. Ильина. Утӥзы сяська бичетъёс, 4 утюг но 1 бумбокс. Пичиосыз — Н. Емельянова но А. Абрамова — косметикаен кудыосын бертӥзы. Радъясьёс валэкто: тау карыны кулэ спонсоръёслы, ӵапак соос приз фондлы 12 сюрс висъязы. Огеныз, «сьӧд» ужбергатӥсен, чай но юоно луиз, возьдаськыса пальпотэ Пименова.

Возьдаськонэз татын чик но ӧвӧл. Таӵе шаплы вамышъёс ик юртто ӟеч ужрад пӧрмытыны! Пургаос шумпоттӥзы: зал люкам сяна, соос куаш-куаш удмурт ужрад нуыны быгатӥзы, котькуд пыриськисез дуно кузьымен ческытатӥзы.

Дарали Лели
Туспуктӥз Лена Пименова

 

Удмурт Дунне
By Удмурт Дунне 1 апреля, 2013 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<