Спортэн вырисьёслы, дуннеез котыръясьёслы

Удмурт Дунне
By Удмурт Дунне Апрель 12, 2013 13:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Спортэн вырисьёслы, дуннеез котыръясьёслы

111

Ижын 18-тӥ-21-тӥ апреле ортчоз «Туризм. Спорт. Отдых» адӟытон. Нырысьсэ со радъяськоз Ижлэн Шор карлудаз — адӟытонъёслы чаклам мобильной павильонын. Озьыен, зэмос праздниклы пӧрмоз. Ижын улӥсьёсты ас котыраз люкалоз адӟытонлэн тунсыко экспозициез но 40 пала ужрадэн узырмытэм программаез. Ми висъямы соос пӧлысь тужгес но яркытсэ — дассэ.

1. Ужрадэз сӥё-дано усьтон
Адӟытонэз сӥё-дано усьтонэ пыриськозы ёросъёсысь вуэм кырӟась-верасьёс, спорт шоу луоз. Та бӧрсьы калык тодматскыны быгатоз адӟытонлэн экспозициеныз.
Кытын но ку: 18-тӥ апрель, сцена, 11 часын.

2. Удмуртиысь турмаршрутъёсын тодматон
Пичи Пурга ёрос возьматоз туризмъя кӧня ке маршрутъёссэ, со пӧлысь тужгес но пусйымонэз — «Кытын вал? Песянай дорын?» Сюрес вуттоз «Брангуртысь песянайёслэн» вордскем гуртазы. Со сяна, пургаос тодматозы «Дышетэ пужей пӧйшурась», «Зарни ыж гон» но мукет тунсыко проектъёсынызы.
Якшур-Бӧдья ёрос возьматоз «Кут лэсьтон», «Одӥг гуртлэн историез» туръёссэ. Со сяна, ивортоз этнофутуризмлы сӥзем «Тӧдьы юсь» огазеяськонзы сярысь.

Балезино ёрос тодматоз таӵе маршрутъёсыныӟ «Кестымын одӥг нунал», «Юндаын одӥг нунал», «Люкын одӥг нунал», «Паймымон Сергинской музъем». Та гуртъёсы вуылыса, тодыны луоз бигеръёслэн, удмуртъёслэн, бесерманъёслэн но ӟучъёслэн сям-йылолъёссы сярысь.

Огъя вераса, сцена вылысен асьсэлэсь тунсыко проектъёссэс возьматоз 17 ёрос.
Кытын но ку: 18-тӥ-21-тӥ апрель, мобильной павильон.

3. Розыгрышъёс но турпутёвкаосты вузан
«МДС-тур» огазеяськон калык пӧлын шудон ортчытоз — тужгес шудоез утоз Казаньысь аквапарке яке Санкт-Петербурге путёвкаосты. Учкисьёс утыны быгатозы «Ува» санаторие, «Турист» фирмалэсь Волга шур кузя теплоходэн ворттылонъя путёвкаосты. Мылкыд карисьёс басьтыны быгатозы Удмуртиез, Россиез, дуннеез котыръяны чаклам путёвкаос.
Кытын но ку: 20-тӥ-21-тӥ апрель, мобильной павильон.

4. Санаторийёсы путёвкаос
Пермь, Киров улосысь, Удмуртиысь санаторийёсы путёвкаос вузаськозы. Куд-огъёсыз дунтэматэмын луозы.
Кытын но ку: 18-тӥ-21 апрель, мобильной павильон.

5. Спортлы но шутэтсконлы чаклам арбериосты вузан
Пӧртэм арлыдъем туристъёслы, спортэн эшъяськисьёслы ӵектэмын луозы туала технологиосъя дасям дӥськут, котомкасо но сумкаос, мугорез кыдатыны тӥрлык, сиён-юон, чорыган арбериос.
Кытын но ку: 18-тӥ-21-тӥ апрель, мобильной павильон.

6. Спортлы сӥзем центр визь-кенеш сётоз
Мугорез кыдатон, спорт сярысь трос выльзэ тодыны луоз, Мугорез кыдатонъя, спортъя но туризмъя министерствоысь ӧтем куноосты, Иж город администрациысь, спортъя пӧртэм школаосысь но федерациосысь лыктэм адямиосты кылзыса. Ижысь техникая университет бордын кылдытэм Спортъя но мугорез кыдатонъя А. И. Тихонов нимо институтысь специалистъёс экспресс-диагностика ортчытозы, озьы шараяны луоз спортлэн кыӵе удысэз тужгес но тупа соиз я таиз адямилы.
Кытын но ку: 18-тӥ-21-тӥ апрель, мобильной павильон.

7. Усточиослэн мастер-классъёссы
Куролэсь мунёос, кызьпу туйлэсь чеберъяськонъёс, пунэм кускерттонъёс, пӧраськонын кутӥськись арбериос но уно мукет… Удмурт шаермылэн пӧртэм сэрегъёсаз улӥсь усточиос дышетозы киуж лэсьтыны.
Кытын но ку: 20-тӥ-21-тӥ апрель, мобильной павильон, мастер-классъёслы висъям инты.

8. Спортсменъёслэн выступленизы
Быгатонлыкъёсынызы паймытозы единоборствоен, черлидинген, велофристайлэн, велотриалэн но мукет удысъёсын вырись спортсменъёс. Шаерысьтымы валтӥсь тренеръёс боксъя, тхэквондоя, ситорюя мастер-классъёс ортчытозы.
Кытын но ку: 18-тӥ-21-тӥ апрель, мобильной павильонын но ульчаын.

9. Ярмарка кар
Адӟытонын веръяны быгатоды калык пусъёсын чеберъям кампетъёсты но преникъёсты, озьы ик чечыез, чак-чакез но уно мукет. Басьтыны быгатоды сусыпулэсь, кызьпу туйлэсь, керамикалэсь, етӥнлэсь арбериосты. «Лудорвай» музей-заповедникын тыршисьёс гурын пыжозы зыретэн табань.
Кытын но ку: 18-тӥ-21-тӥ апрель, ульчаысь но павильонысь ярмаркаослы чаклам инты.

10. Концерт но интерактив
Шулдыртозы Удмуртиысь кырӟась-верась ансамбльёс. Капчи мылкыд сётозы «Музейын сюан» презентация, озьы ик «Уйпал удмуртъёс» экспозиция но шоркарысьтымы байкеръёслэн «Ижысь мадёнъёс» программазы. Туж тунсыко но яркыт ортчоз «Ӟеч зоопарк» проект.
Кытын но ку: 18-тӥ-21-тӥ апрель, мобильной павильонысь сцена.

Адӟытонлэн программаеныз тодматскыны луоз www.rest.vcudm.ru сайтын яке «ВКонтакте» сетьысь vk.com/rest_2013 адресъя. Вазиськыны быгатоды телефон пыр нӧ (3412) 730-730.

Павильонлэн ужан дырыӟ
18-тӥ апрель (покчиарня) — 11 часысен 18 часозь
19-тӥ апрель (удмуртарня) — 10 часысен 18 часозь
20-тӥ апрель (кӧснунал) — 10 часысен 18 часозь
21-тӥ апрель (арнянунал) — 10 часысен 17 часозь.
Адӟытонэ пыроно дунтэк!

Удмурт Дунне
By Удмурт Дунне Апрель 12, 2013 13:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<