Сюлэмъёссы — кык радаръёс

Удмурт Дунне
By Удмурт Дунне 19 апреля, 2013 15:39

Сюлэмъёссы — кык радаръёс

 

Г. Перевозчиков (шорысез) "Надежда" коллективен

Г. Перевозчиков (шорысез) «Надежда» коллективен

Шарканысь социальной юрттэт сётонъя центрен ньылетӥ арзэ кивалтэ Елена Перевозчикова. Пересьёс, шуге-леке вуэмъёс татчы ӵем йыгасько.

— Коллективмы егит, мыло-кыдо, — вера Елена Леонидовна. — Нимысьтыз удмуртъёссэгес бырйимы, уго пересьёсын удмурт кылын вераськоно луэ. Ӟуч сямен вазиськиськод ке, яратэмзы уг поты.

Секыт учыръёсы сюремъёсты дорамы кык арнялы кельтӥськом. Гуртысь вуэмъёс юртамы ик уло. Массаже, гимнастикае ветло. Массажист луыса 20 арзэ ужа ини Людмила Михайловна Перевозчикова. Туэ пенсие потӥз ке но, кошкыны ум лэзиське ай. Пересьёс сое туж гажало. Озьы ик психологмы вань, кулэ дыръяз юристэз но ӧтчаськом.

Ёросысьтымы егит инвалидъёс азьвыл веказы ас понназы, ворсаськыса, ог-огзэс тодытэк, улӥзы. Ӝожтӥськыны, шараяськыны ӧз дӥсьтылэ. Соос понна лагерь сменаос ортчытъяны малпамы. Люкаськиськом сӥзьыл но тулыс, 12 мурт гуртъёсысь вуэ, 25 — Шарканысь. Кварталлы огпол «Алые паруса» клубе ӧтчаськом, сое радъя Ольга Сергеевна Никонова. Кыдёкысь но лыкто, транспорт шедьто! Гужем, ог-огенымы туж тупаса, походэ ветлӥм, тылским, пыжиським. Озьы куинь пармы но кылдӥз ни. Дима Васильев но Таня Широбокова Инвалидъёслэн нуналазы пумиськизы. Дималы Мувыр Вишурысь Таня соку ик кельшем, керпотыса телефонзэ юам, жингыртэм. Кыкетӥзэ татын ик пумиськиллям. Флор Васильевлэн кылбураз сямен, «сюлэмъёссы, кык радаръёс музэн, љог шедьтӥзы огзэс огзы…» Табере Быгиын уло, улыно-вылыно корка пуктӥзы, кролик вордо. Дима Танязэ мусояса Танечка гинэ шуэ. Туж яратыса пизэс будэто, шудонъёсыз маке мында, книгаосыз но лачак. Пиналзы таза.
Таос выллем ик кузъяськизы Ляльшурысь Толя Ульянов но Вукогуртысь Марина Фёдорова. Шумпотӥськом, ми юрттэмъя инвалидъёс пумисько но синмасько-ярато, эшъясько, мылкыдзыя уж шедьто ке.

А. Корепанова но И. Лопатин "Алые паруса" клубын тодматскизы

А. Корепанова но И. Лопатин «Алые паруса» клубын тодматскизы

Кыква гуртын улэ ляб адӟись крезьгурчи Геннадий Фёдорович Перевозчиков. Кырӟанъёсыз 60-лэсь ятыр, гитараен, арганэн, баянэн шудэ, кылбуръёсын книгазэ но поттӥз. «Надежда» нимо коллективез вань. Центрамы но вуыло, концерт возьмато, мылкыдмес ӝуто. Али Геннадий Фёдорович гуртаз корка пуктыны выре. Оло, газет лыдӟисьёс пӧлын солы юрттыны мылкыд карисьёс сюрозы? Кыкваын юрттэтлы шумпотысалзы.

Кызьы луоз Геннадий Перевозчиковез шедьтыны, Шарканысь социальной юрттэт сётонъя центрен кусып возьыны? Елена Перевозчикова центрлэсь телефонзэ сётӥз: (8 34136) 3-39-78, 3-33-70. Асьсэлэн сайтсы яке социальной вотэсын группазы, жаляса верано, ӧвӧл. Ку меда ёросъёсысь та выллем юртъёс Интернетысь пайда поттыны дышозы? Угось тросэз благотворительностен вырисьёс «электронной кошелёк» утчало. Малпасько, азьланяз центрын одно ик кылдоз компьютерез валась мурт, калык понна лэсьтэм ужзы син азьын луоз.

Дарали Лели

Удмурт Дунне
By Удмурт Дунне 19 апреля, 2013 15:39