Шыгырес Паша

Удмурт Дунне
By Удмурт Дунне 23 апреля, 2013 11:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шыгырес Паша

Паша Перевозчиков кино пуктыны быгатэ сценарийтэк

Паша Перевозчиков кино пуктыны быгатэ сценарийтэк

Павел Эль, со ик Павел Перевозчиков — Шарканысь усточи. Электрон крезьгур малпась, кино пуктӥсь, «Зангари» центрын егитъёсын ужась. Паша ӵем ӝожтӥське, гуртын солы уг тырмы яркытэз, зумытэз. Нуналмысь улон тунсыко пумиськонъёсын тырмемын луысал ке… Со понна пияшлэн лул дуннеез узыр.

Эль но Эли
Кылем толэзе крезьгурчилэн потӥз нырысетӥ пичи альбомез — EP. Татчы пыризы ньыль гань-гань, дыртӥсьтэм гуръёс. Соос суредало гужем ӝытъёсты, тодэ вайыто ульчаысь куараосты, яратоно гурт пейзажез. Альбом потӥз шоркарын, ужзэ синйылтӥзы палэнысь усточиос.

Паша тодмо луэ на Эльвира Панченкоен ӵош ужаменыз. «Тон шуид» кырӟанэзлы со аспӧртэм чилл-стэп ремикс лэсьтӥз. Али Эля Санкт-Петербургын улэ, Chupai Eli проектэн сцена вылэ пота. Паша соку ик синйылтӥз нылашлэсь векчи чылкыт куаразэ — Элялэн гурез вылэ шуак пуксиз выль гур. Умой луысал Элилы сӥзем мини-альбом поттыны, вера Паша. Кылсярысь, «Шара малпанъёс» кырӟанэз дэнскорлы пӧрмытыны! Тунсыко. Зэм но, тросэз-а валалозы, мар со дэнскор? Шарканъёс уз, дыр.

Мар со дрон?
Шарканысь ик мукетыз крезьгурчи, Гоша Гуменников, со ик Порозмафиысь G.I.M dj, калыклы трослы тодмогес. Гоша уго популярной крезьгурез шудэ, удмурт позыръяськонъёсын дискъёс бергатэ. Соин ӵошатыса, Паша Эль — ас дуннеяз улӥсь. Диджей сое уд шуы, со — крезьгурчи. Озьы ке но, пиос огкыл шедьто. Азьлогес соос ӵош шудылӥзы но. Кыксы ик яратӥзы олдскул шуоно вуж крезьгурез: 1990-тӥ аръёсысь 2000-тӥ аръёсы выжемзэ. Туэ ӝог техно но транс модаын ӧвӧл ни. Нош Паша мода сьӧры уг уйиськы. Удмурт дискотекаосы но чуртнаськыны уг выры.

Паша Перевозчиков — зэмос удмурт андеграунд. Соин ик со туж тупаз «Лад-лад» промо-огинлэн ужрадъёсылы. Берло дыре ӵем гинэ эмбиент шӧмо дрон кылзӥсько, шуэ Паша. Рос-прос валатэк, мар со дрон, юасько: шат та крезьгур удмурт пельлы кельшымон? Нош Паша, нокыӵе кариськытэк, валэктэ: шат удмурт пельлы мурт луоз чашка борды пичи пуньыен кокам куара?
Иське, дрон — со пуньы шуккем куара. Мар бен, оло, туж удмурт куара та… Кин тодэ.

Чыры-пырыос вормо
Удмурт кылэн али укыр трос кыл шудон кылдӥз, чыры-пырыослы кыскало удмуртсэ, ӝот-ӝот вера пияш. Эльлэн мылкыдыз валамон: сюлмыз куре бадӟымгес но оскымонгес проектъёсты. Кӧня ке ар талэсь азьло куашетэм «Новая песня древней земли» этнофестивальлы синмаськемзэ уг ваты. Али та выллем вӧлмыт ужрадъёс интые «Удмурт мыйык» фестиваль каро ке шат.

Удмурт дрон фестивальлы нош Павел пумит луысал меда? Чыры-пырыослэсь бадӟымез люкаське. Нокудӥз но мултэс ӧй луысал, дыр. Тани ачиз но со Шарканын удмурт шведингъя ӵошатскон радъяз. Швединг — со тодмо киноосты ас синмыныд суредан.

Ашихминэн брит-поп
Попсалы пумит луон огазеяз, лэся, Паша Перевозчиковез Саша Ашихминэн. Ашихмин «Вишур мылкыд» ансамбльын шудэ ке но, самодеятельностьын гинэ арган вик-вак кысканы уг малпа. Пияш яратэ экспериментъёсты. Таиз ик висъя сое, шуом, Иван Котельниковлэсь. Ашихмин — лирик но выльзэ утчась. Перевозчиковен сое эшъяськытэм… брит-поп. Шонергес вераса, Coldplay огин. Ӵапак та группалэн нёжъямъёсыз Шаркан палась пиослы удмурт шоу-бизнеслэн валтӥсь ӧръёсызлэсь матынгес потӥзы. Озьы вордскиз «Капкаед медло ӝубис» гурлы ремикс. Саша Ашихмин яратэ мур пуштросо крезьгуръёсты. 11-тӥ классын дышетскись пияшлэн верамъёсызлы сокем ик ӧй оскысалмы но — гуръёссэ кылзоно ке, ваньмыз соку ик валамон луэ.

Брит-поп — со удмурт инди-поп ӧвӧл. Иван Белослудцевлэн кырӟам-верамез Пашалы укыр вольыт потэ. Гольтрес Белослудцев — но укыр шонер шудӥсь 4 чебер пиос. «Тау тыныд» кырӟанзы нош кельше ик, пе. Учком, оло, Перевозчиков лэсьтоз та гурлы кыӵе ке эмбиент-ремикс? Вольыт интые шыгырессэ ватсалоз.

Паша яратэ пост-рок ӧрез. Солы кельше ваньмыз, мар ӧжытак ке но шонер ӧвӧл: кырсьгес, зэмосгес, улонысьгес.

Киноман
Нош крезьгурась сяна, Паша Эль — зэмос киноман но кинокритик. Со ӧз кельты чаклатэк удмурт «киноиндустриез» но. «Узы-боры» фильм солы тумошо потӥз, кызьы со ачиз вера (та веранэз кытысь ке пеляз понэм но ӵем кутэ), сюжетэз, пе, «восьмибитной». «Тямыс битъем» нимаське компьютер шудонъёсысь кадь примитивной куараосын гожтэм крезьгур. Ум ӝожомиське. Зэм но, «Узы-боры» — туж валамон кино. Паша эскеронъёссэ вера: киноез вакчиятыны но умой луысал. Шумпотэ, премьерае вуэм ӟуч эшез, киноын пукыкуз, кӧтсэ посыса серекъям. Кин тодэ, оло, соку ик, удмурт кино премьера бере, ӟучомем Перевозчиков удмурт лулчеберет пала берытскиз?

Кино пуктыны Паша Перевозчиков сценарийтэк быгатэ. Кияз — камера, йыраз — ужан рад. Кызьы ваньмыз азинскоз, тодмо ӧвӧл на — ӵапак соиныз ик тунсыко. «Вечное сияние чистого разума» учкид-а? Та кино быдэсак импровизация амалэн снимать каремын, пе. Нош Питер Джексонлэн нырысетӥ картинаез воксё сценарийтэк лэсьтэмын. Паша любительской кино сярысь реферат гожъяз. Та темая со пумтэм-йылтэм вераськыны дась!

Камера кутыса, али котькуд шузиед кино пуктыны быгатоз. Жаль, «мыло-кыдоослэн» амалзы укыр ӵем кутӥськыны кутскиз: «Реальные пацаны» сериал яке «Наркоман Павлик» сярысь роликъёс дунтэмен лэсьтэм киноосты жуг-жаглы пӧрмыто.

Паша режиссёр синмаське кема кыстӥськись кадръёслы. 30 секундъемъёсызлы, 2 минутъемъёсызлы… Тодам вайисько: таӵеосты мадьяр режиссёр Бела Тарр яратэ. Со дорозь кема ай будонэз шаркан пилы. Нош элькунамы вормонъёсыз Пашалэн вань ини: Егитъёсын ужанъя министерствоен кичӧлтэм «Объективное» ӵошатсконын Паша Перевозчиков 1-тӥ инты басьтӥз. Отын со «Мынам Шарканэ» кинозэ возьматӥз.

Кин сярысь кино пуктэ Паша Эль? Огшоры калык сярысь. Школаын дышетскисьёс, пересьёс, нуналысь нуналэ улонзэс улӥсьёс, синмаськисьёс сярысь. Малы ке туала кино огшоры адямиос сярысь ӧвӧл, кунэрске Павел. Экранын — яке пересьмись узыръёс, яке висись егитъёс. Огшоры муртъёс нош кытын?

Паша — огшоры мурт, улэ аслаз шыгырес улонэныз. Озьы ке но, со чик но огшоры ӧвӧл. Мон шуысал, со гений. Шарканысь огшоры гений! Нош тужгес но яркыт ужъёсыз ай азьпалан.

Дарали Лели

Удмурт Дунне
By Удмурт Дунне 23 апреля, 2013 11:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<