Пинал песятай

Удмурт Дунне
By Удмурт Дунне Апрель 26, 2013 13:32

Пинал песятай

М. Андреев

М. Андреев

Удмурт воргорон, арганчи, Кизнер посёлокысь ветеранъёслэн «Зори Кизнера» калык хорзылэн хормейстерез Михаил Андреев культура удысын тырше ини 1973-тӥ арысен. Мылысь-кыдысь ужамезлэн емышез син шорын. 1988-тӥ арын Совето Союзысь Культурая министерство данъяз сое «За отличную работу» гадьпусэн. 1999-тӥ арын Михаил Иванович Удмуртиысь культура удысысь дано ужась луиз. 2000-тӥ арын республикаысьтымы Данъян пулэ пыртэмын вал «Зори Кизнера» хор. Нош туэ М. Андреев басьтӥз Удмуртиысь Правительстволэсь «Сӥлы карон» («Признание») премизэ.

— Михаил Иванович, тӥ пичи дырысеныды ик арганэн шудӥськоды-а?

— Тодӥсько ай, 4-5 арес дыръям шудӥсько вал ымдур гармошкаен. Бускельёсмы кытысь ке шедьтӥллям трофейной губной гармошка. Собере киям шедиз полухромка арган. Ас поннам ик сое кысканы дыши. Атае Иван Андреевич балалайкаен моггетэ вал, нош арганэн со таки ӧз дышы, бур но паллян киосыз ог-огзылэсь ӧз кылзӥське, лэся. 10 арес дыръям мон усто арганчи луи ни.

Пичи дыръям кушем нимы вал Пинал песятай. Малы озьы? Гур вылэз яратӥсько вал. Азьло туж трос юон дыръёс, юмшанъёс ортчылӥзы ук. Куноос корка пыро гинэ — монэ арганэн шудыны ёрто. Соин ик гур вылэ пегӟисько вал. Будэмъям ини мон, арган кыскаса, уксё поттылӥ. Ачим ик инструмент но басьтӥ. Гужемзэ атаен ӵош пастукай но 45 манетэн хромка арган басьтӥ. Со вакыт бадӟым уксё вал со. Но атае эн басьты ӧз шуы. Кытчы ке шудыны ӧтё ке, со мынэсьтым зол шумпотылӥз. Уго инструментэз нуллыны уг вормиськы вал ай. Атай арганэз нуэ, мон шудӥсько, сое куно каро.

Мон Кизнер посёлокын вордскемын ини, нош атае но анае Ольга Васильевна Лака-Тыжмаысь татчы лыктэмын. Лакае шудыны ӵем ветлӥсько вал. Собере отысь ик клубе ӧтчаны шӧтазы. Валэн нуо, валэн ик ваё вал. Шорам Лака Мики шуыса гинэ вазьылӥзы.

— Ялан арган кыскады яке йӧнтэмъяськыса но вуттылӥды-а?

— О-о! Мон туж шаян вал. Семьяямы пичиез пи. Ми ньыль кузя пиналъёс вал. Одӥг ласянь, аслым туж нод-нод, малпаськись потылӥ, весь бадӟымъёс, пересьёс пӧлын улӥ бере, арганэн шудон вискам соослэсь вераськемъёссэс кылзӥськылӥ. Но со дыре ик шаянэ, пӧяськонэ потылӥзы.

Тодам лыктэ радио пыртэмзы, кыӵе сюлмысь сое кылзӥськылӥ. Умме усисько вал радиопостановкаосты кылзон сямен. Но туж умой тодӥсько на, кызьы нырысетӥ радиомес сэрттӥ, пушкысьтыз адямизэ утчаса. Мыным соку 5-6 арес вал. Атай бертэмлэсь азьло сое выльысен лякылыны но, керттылыны но выри, но радио ӧз ни вераськы. Зол сюриз. Верасько ук, шаян вал мон. Ӧз, атай еэн ӧз кышкатъя. Со 12 ньӧр дасялоз (араз 12 толэзь ук), самой адӟиськись интые, ӧс янак йылэ, соосты поноз вал. Мон шӧдымтэ дыръяз куд-огъёссэ тӥялляй но. Уго тыбырез со векчи ньӧр вӧсь ик карылӥз.

Куддыр йӧтэ вал лябгес дышетскеме понна. Мон ньыль классэз туж умой йылпумъяй. Нош 5-тӥ классын синмаськи одӥг ныллы, какой отын кыӵе ке урокъёс на. Нырысетӥ яратон — со кужмо маке, али но со ныллэн тусбуйыз син азям. Нылашлы кельшон понна уката но мыло-кыдо арганме кыскасько вал. Нош кыӵе кильтыръяськыны выри. Соку модаын вал сюбег штаньёс. Агае но сыӵеосын ветлӥз. Бадӟым пиослэсь адӟем карыса, мон брюкиосме кык палтӥз ик вурисько но, «дудочкаос» пӧрмо вал. Соосты котькуд ӵукна утюгаса ветлӥ. Анай адӟе но вурысъёсме кеся, нош мон, ӵукна султыса, нош ик штаньме сюбегатӥсько.

Школаын куд-ог дыръя эшъёсылы вожъяськылӥ: соос урамын бызьыло, нош монэ перемена дыръя но арганэн шудыны косылӥзы. Ма, пӧламы вал усточиос — Коля Шаранов, Слава Храмов. Кизнерын крезьгуръя школа усьтӥськем бере ӵош дышетским. Но мон сое ӧй быдты.

— Малы?

— Ӧз кельшы. Одӥг ар гинэ тодон-валан люкай. Отчы мыныкум, мыным 10 арес вал, но арганэн сяна, баянэн но шудӥсько ни вал. Атае нылпи садэ стороже интыяськиз. Мон сьӧраз эшлы ветлылӥ. Нылпи садын син шорам «Искра» баян йӧтӥз, кузь маке. Уйёсы дыши та инструментэз кысканы. Бур палыныз шудыны соку ик кутски, нош паллян палзэ синучкон пыр дышетӥ (отын кнопкаосыз шугесьгес). Нош крезьгуръя школаын мӧзмыт йӧтылӥз. Дышетӥсьмы — егит нылмурт — занятиын, пряникен чай юыса, пуке вал. Мыным кыӵе ке гурез возьматэ, мон сое соку ик шудӥсько ини. Крезьгурез шӧдонэ мынам туж ӟеч вал. Тани 1-тӥ классысен радио пыр кылӥ «На прививку, первый класс» кырӟанэз. Ну, со мыным сыӵе кельшиз ини, чидан ӧвќл. Кык-куинь нунал куспын бичай ведь гурзэ, шудыны пӧрмытӥ.

Мар ке чеберзэ кылӥсько ке, крезьгур сюлмам пыре ке, мон, уйшоре султыса но, сое дышето, мылкыд маза уг сёты.

— Тӥ, школаез йылпумъяса, крезьгуръя училищее вамыштӥды, луоз.

— Да-а, 8-тӥ класс бере, нокинлы вератэк, Иже лыктӥ. Шедьтӥ крезьгуръя училищеез. Кема лёгаськи, укно улын кылзӥ шудӥсьёсты, нош ӧсэз усьтыны ӧй дӥсьты. Удмурт сямы люкетӥз-а, мар-а? Али малпасько ке, пыр вал отчы, шуд вал сюлмысь, одно ик кутысалзы ук. Малы ӧй дӥсьты, паймисько, городэ потамын ӧй вал, оло, соин возьдаськи. Берытски но доре бертӥ.

Кытчы мынод, строительно-монтажной управление вамыштӥ, рабочий луи. Кык ар отын тырши, собере райпоын ик лэсьтӥськись луыса ужай. Кивалтӥсьёс дэмлазы Нальчикысь лэсьтӥськонъя техникуме пырыны. Отчы шедён понна экзаменъёс сётоно вал Ижысь кооперацияя техникумын. Вань документъёс бичай, экзаменъёсме сётӥ, направление киям, но ӵап со вакыт кылӥськиз, Нальчикын, пе, кузёяське холера. Агае монэ отчы мыныны ӧз лэзьы. Атай улэп ӧй вал ни, соин ик агайлэсь мон кылзӥськи. Озьы мон Нальчике мынытэк кыли. Соин ик кошки Люда апае доры — Пермь улосысь Березники городэ. Дышетскыны пыри слесаре 40 номеро училищее куинетӥ курсэ.

— Кызьы куинетӥ курсэ?

— Мон пичияк алдаськыны яратӥсько вал. Училищеын шуи: Нальчикын дышетскисько вал, но отын холера алям бере гуртэ бертӥ. Направлениосы мынам киям вал. Трудовойме ӧз куре, оскизы, лэся. Озьы мон куинетӥ курсысь студент луи. Со аръёс тужгес шулдыр, творчество пӧлы выйыса улон вакытъёс вал. Мон гитараен, баянэн шудӥсько вал бере, нылпи юртысь пиналъёс бордам кариськизы. Ми самодеятельность пушкы зымим. Быдэс Пермез котыръям концерт бригадаенымы. Йыр ужа, ки мынэ — диплом но басьтӥ, троллейбус тупатъясь слесарь луи, соку ик 4-тӥ разряд сётӥзы. Отысен ик монэ армие басьтӥзы.

— Тӥ армиын но кырӟады, дыр.

— Нырысетӥ араз лэсьтӥськи. Монэ басьтӥзы стройбатэ, Казахстанын шахта лэсьтылӥм. Собере киям баян кутӥ. Мон шудӥсько, Лысьваысь Юра Моисеев туж чебер эктэ. Частьмылэн командирез, арлыдо пиосмурт, милемыз учкыса, бӧрдыса пуке. Кыкнадэс ик музвзводэ гожтӥсько, шуиз со. Тӥни озьы, кытын дышетски, ужай — крезьгур но творчество весь бордам вал. Служба бере Иже ветлӥ, но, пропискаед ӧвӧл шуыса, уже ӧз кутэ. Кизнере бертӥ, ӵап соку посёлоклэн нуналыз вал. Стадионын — бадӟым праздник. Эшъёсы куризы арганэн шудыны. Мон шудӥ. Собере сцена вылэ тубыны косӥзы. Сцена вылысен калыкез шулдыртӥ. Соку Кизнер черкогуртысь клубен кивалтӥсь монэ дораз ужаны ӧтиз, художественной руководительмы, пе, ӧвӧл. Озьы мон культура удысын тыршыны кутски. Кык ар ортчыса, ӧтизы посёлокысь культура юртэ ужаны.

— Секыт вал-а крезьгуръя тодон-валантэк клубын ужаны?

— Капчи ӧй вал, визь-нод ӧз тырмылы, но мабыдӟа мылкыд вал. Уйёсы пукылӥ, нотаосыз дышетылӥ. Но ӵукнаяз мон дась аккомпанементэн репетицие вуисько вал. Туж усто духовой оркестр кылдытӥ. Кык пол Иже марш-парадэ но ветлӥм. Кизнерысь крезьгуръя школаысь дышетӥсь, кылбурчи, музыкант Аркадий Иванович Кузнецов нуналлы быдэ сямен монэ индылӥз: Миша, тыныд дышетсконо, Миша, ку мынод ини. Ижысь культурая училищеын соку заочной люкетэз ӧй вал бере, мон вамыштӥ Пермьысь культурая училищее. Ар дышетскыса, басьтӥ академической отпуск: монэ, 8 классэз йылпумъям макеез, со химия, алгебра шуонъёс пачкатыны ӧдъязы. Бертӥ Кизнере, мон соку кышнояськемын ни вал. Кузпалэным ӵош мынӥмы ӝыт школае. Куриськи соку ик 11-тӥ классэ, кутӥзы. Озьы ар куспын шор ёзо школалэсь программазэ ортчыса, выльысен дышетсконме азьланьтӥ. Но мар мыным кулэ, ваньзэ басьтӥ. Тодон-валан люкасько вал калык инструментъёсъя ёзэтын. Но туж мыло-кыдо ветлӥ калык кырӟан люкетаз, ӧй келля хор занятиосты но. Мон соку валай: тон коть, уӵы кадь, шулдыр кырӟа, но культура удысын тыршиськод ке, одно ик дышетскемед луыны кулэ.

1985-тӥ арын калык инструментъёсъя оркестрлэн кивалтӥсезлэсь дипломзэ басьтӥ. Со арын ик Кизнерысь калык хорлэн кивалтћсез луи. Кык ар ортчыса, посёлокысь ветеранъёслэсь ансамбльзэс кылдытӥ, бӧрысь со хор луиз. Али «Зори Кизнера» нимаське. 1989-тӥ арын ини та коллектив калык ним басьтӥз. Ми соосын вить пол лауреат луим ни «Салют Победы» фестивальын. Коллективмы бадӟым, ог 30 адями, 8-эз — воргоронъёс. Шоро-куспо арлыдзы 70 арес котыр.

— Арлыдоосын капчи-а одӥг кыл шедьтыны, кырӟан куспазы кылъёссэс уг вунэтъяло-а?

— Мон егит дырысеным соосын ини. Весь шуисько: ачим но тӥледын визьмаськи но, пересьми но ини. Арлыдзы ведь бадӟым, толэзь уг кырӟало ке, кылъёссэс вунэто. Соин ик репетициос ӵем ортчытъясько. Соослы шуисько: тӥ татчы уже ветлӥськоды. Арлыдоос ведь нылпиос кадесь. Мон соосын каллен гинэ вераськисько, куараме будэтъятэк. Уно аръёс ӵоже соосын ужатозям, валай: макем шыпытгес вераськиськод, сокем ӟечгес соос кылзо но сюлмысьгес кырӟаны тыршо. Учке ай, кыӵе чебер культура юртын ужаськом. Кырӟамед ке но ӧз поты, кырӟалод. Вань луонлыкъёс кылдытэмын ук, ужа гинэ. Арлыдоос но татчы мыло-кыдо лыкто, репетициос вискын чай но юо, кырӟаса-вераса но вутто.

Но тани огкыл шедьтон пумысен ке, берло дыре соос йыртэманы кутскизы. Кылем арын 60 аресэ тырмиз но, соос монэ эш карыны ӧдъязы, тон но, пе, таре милям радамы ини.

— Асьтэос но юмоке сюриськоды-а?

— Луо олокыӵе но дыръёс, улон ук со. Но шӧдӥ: мылкыды урод ке, кырӟан нёжъяны кутскисько. Адямиос ӝожтӥсько, бӧрдо, нош мон сыӵе дыръя кырӟасько. Ма, серекъяны но мугъёс шедё гинэ. Тани огполаз ӵукна вазь ик уже лыктӥ, со нунал концерт сётоно вал. Нош гуртын тылэз кысӥзы. Пеймытын дӥсяськоно луиз. Ма, ваньзэ шедьтӥ: дэремме но, костюмме но. Сцена вылэ потӥ но, огшап улыса, нырысь радын пукись кышноос пырсйылыны кутскизы. Маке умойтэмзэ шӧдыса, котырак учкылӥсько ини. Синъёсме уллань лэзи но, одӥг пыдам лыз пыдвыл дӥсямын, мукетаз — вож. Кырӟан бырем бере чаляк гинэ катанчи сьӧры потӥ но аккомпаниатормылы Владимир Ситниковлы шуисько: чаляк кыль носкиостэ. Озьы солэн пыдвылъёсыныз концертэз ортчытӥ.

— Семьяды сярысь но вералэ, кузпалды но хорын кырӟа-а?

— Бен, кузпалы Галина Ивановна Кизнер ёросысь ик Арвазь-Пельга гуртысь. Кышноелы тау карисько мыным куинь нылъёс кузьмамез понна. Нылъёсмы бадӟымесь ини. Соос но культура удысэ вамыштӥзы. Бадӟымез — Светлана — йылпумъяз Воткинскысь крезьгуръя педколледжез, Гракысь крезьгуръя школаын дышетэ, шоретӥез — Ольга — дышетскиз Ижысь культурая училищеын, собере Удмурт кун университетын. Али Глазовысь «Россия» ДК-ын хормейстер. Пичиез, Нина, Ижысь крезьгуръя училищеез быдтыса, Глазовысь ик крезьгуръя школаын дышетэ. Мынам котьку нырысь интыын вал крезьгур но творчество, семья кыкетӥ интые кыльылӥз. Нош нылпиос туж чаляк будо вылэм, внукъёсы 7 ини. Шумпотӥсько, нылъёс сюлэмзыя удыс бырйизы шуыса, малы ке шуоно адями ужаз капчи мылкыдын мыныны кулэ, тыршемезлэн емышез лычсузён мед ваёз. Нош нылъёсы мыло-кыдо нуо удыссэс. Тани Ольгае туэ (О. Перминова) М. Кастрен нимо обществолэсь крезьгур удысын премизэ басьтӥз. Нылы «Сяська кадь» кырӟан гожтӥз. Крезьгур малпаз 1935-тӥ арын Вавож ёросын гожтэм кылбурлы. Кырӟанзэ быдэстэ егитъёслэн «Пумитан» ансамбльзы — сое Ольга кылдытӥз. Атай но крезьгурчи сямен мон шумпотӥсько нылъёсылэн вормонъёссылы.

Семьяеныз

Семьяеныз

— Тӥ асьтэос но кӧня ке ансамбль кылдытӥды ук.

— 1994-тӥ арын Лакаын кылдытӥ нылпиослэсь «Радуга» ансамбльзэс. Отын вал арганчиос, пуньыен шудӥсьёс, кырӟась-эктӥсьёс. Куинь ар ортчыса, та ансамбль калык ним басьтӥз. Али соин кивалтэ Геннадий Бускин. Ма, мынам ветеранъёслэн хорзы бордын ик эшшо кӧня ке ансамбльёс ужало. Кылсярысь, «Потеха», сое учкисьёс туж шуныт пумитало. Удмурт гуръёсты яратӥсьёс ветло «Кырӟан вакыт» ансамбле. Кемалась ик ӧвӧл кылдытӥ «ДИМА» квартет. Уг яратӥськы огинтыям лёгаськыны. Ялан маке выльзэ утчам-эскерем потэ. Мае ачим быгатӥсько, солы ик дышетыны тыршисько котырысьтым эшъёсме но, ансамбле ветлӥсьёсты но.

— Тӥледыз ӟечкыланы кулэ «Признание» премиез басьтэменыды.

— Шонерзэ вераса, мон сямыя данъяськись, ушъяськись ӧвӧл, шыпыт адями мон. Соин ик уг яратӥськы юбилейёсты. Собере, со мынам гинэ премие ӧвӧл, со быдэс хормылэн вормонэз. Кепыраса мынӥ премия басьтонэ но. Шумпотӥ ке но, возьдаськытӥз арлыды. Малпан кылдэ, али сыӵе премия сёто ке, озьыен, 60 аресын гинэ «признали». Мон малпасько, сыӵе бадӟым премиосты сётоно 45-50 аресъем адямиослы, куке творчество ласянь но соос кисьмамын ни, ужам ужзы но — ныпъетсы — вань ини. Данъетэз малы сёто? Азьланяз адями эшшо золгес мед тыршоз, выль инвисъёсы кыстӥськоз шуыса, лӧпкытон-бурдъян вылысь. Нош 60 арес бере алилэсь но зол ужалод на меда? Со мынам малпанэ.

— Мар бен карыны малпаськоды азьланяз?

— Ма, тазалыке луиз ке, тазьы ик ужало ай клубын. Собере мынам туж потэ фотоужен выреме. Агае усто туспуктылӥсь вал, мынам та ласянь тунсыке алигес гинэ шараяськиз. Азьланяз малпасько «Мынам Кизнере» альбом дасяны. Компьютерен мон кемалась эшъяськисько ини, нотаос но отын гожъясько. Тани фотошопен вырыны дыши ке, туспуктэмъёс борды умой-умой басьтӥсько. Крезьгуро инструментъёсты но тупатъяны мыным кельше, арганъёсты, баянъёсты выльдӥсько. Уксё понна уг, мылкыд куремъя. Кизнерын азьло инструментъёсты тупатъя вал Иван Чупаков. Солэн атаез Москваысь крезьгуро инструментъёсъя фабрикаын ужа вылэм. Иван Марковичлэсь ужамзэ сак учкылӥ, кутски но, аслам но пӧрмиз. Та кибашлы улонысь кошкиз ини, табере адямиос мон доры куажгам арганъёссэс тупатыны вутто.

— Михаил Андреевич, тӥ 40 ар культура удысын тыршиськоды ни, мар сярысь жаляськоды?

— Мар сярысь жалясько? Кыкез пумысен гинэ. 8 арес дыръям Кизнере куное вуылэм Кронштадтысь полковник. Капка азямы кылзыса улэм мынэсьтым шудэмме. Атаелы дэмлам монэ сьӧраз нуыны. Лэзь, пе, пидэ Нахимовской училищее дышетскыны, визь-нод но люкалоз, оркестрын но шудоз. Кин ке атаез кышкатэм, пиед вир сяласькыны кутскоз, али котыр чахотка вӧлмемын шуыса. Озьы мон Санкт-Петербурге мынытэк кыли. Жалясько на, Иже ветлыса, крезьгуръя училищелэсь ӧссэ усьтыны дӥсьтымтэе пумысен.

Но озьы луыны кулэ вал, дыр, улон ук со. Котьма ке но, мон культурае вуи ук, дышетски, ужасько. Чик уг жаляськы, та удысэз быръемысьтым. Мон 4-тӥ классысен сочинениям гожтӥ вал, композитор луэме потэ шуыса. Анаелэн куараез туж чебер вал, чылкыт сопрано, оло, со выжые мынӥськем. Крезьгуро инструментъёсын шудэм сяна, кырӟанъёс гожъясько. Яратоно уже вань, творчествоен вырисько. Мар кулэ на?

Аръёс ортчемъя адями воштӥське. Мынам но пуштӥсь сямы басылске ини. Адямиослы урод кылъёс веранлэсь возиськисько, чыры-пырыослы луыса уг керӟегъяськиськы. Улонысь чеберзэ, чылкытсэ адӟыны, ӟечсэ лэсьтыны вырисько. Улоно-ужано озьы, аслыд но, нылпиосыдлы но тон понна возьыт медаз луы. Котьку озьы уг пӧрмы ке но, одно ик тыршисько, шуг-секытъёс но янгышъёс шоры учкытэк, азьлань мыныны.

Галина Семёнова

Удмурт Дунне
By Удмурт Дунне Апрель 26, 2013 13:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<