Ойдолэ, песянайёс!

Удмурт Дунне
By Удмурт Дунне 16 апреля, 2013 10:52

Ойдолэ, песянайёс!

Сюмсиысь зарни песянайёс

Сюмсиысь зарни песянайёс

Сюмсиысь культура юртын 4-тӥ апреле ас быгатонлыкъёссэс возьматӥзы ёросысь тямыс удмурт песянайёс. Конкурс ортчиз «Удмурт дунне» газетлэн элькунамы ялэм «Зарни песянай» акциез улсын но дано кылбурчилы Ашальчи Окилы 115 ар тырмонэн валче.

Ӵошатсконэз радъянэ пыриськизы Сюмси ёросысь культура юрт, «Удмурт Кенешлэн» но Удмурт нылкышно кенешлэн ёрос ёзъёссы.

«Ойдолэ, песянайёс!» конкурсэз радъяз Сюмсиысь «Удмурт Кенешлэн» ёзчиез, ёрос культура юртысь миниатюраосъя «Браво» калык театрлэн кивалтӥсез Елена Иванова.

Песянайёс вуизы пӧртэм гуртъёсысь: Муки-Каксиысь, Зунысь, Гурыысь, Калмезысь, Васькаысь но Сюмсиысь. Ёрос культура юртлэн фойеяз песянайёслэн киужъёсынызы адӟытон усьтӥськиз. Самой усто но зарни киё песянайёсты туж шуг вал пусйыны. Озьы ке но дунъясьёс тужгес ӟечен лыдъязы Зун гуртысь Надежда Николаевна Суворовалэсь но Васька гуртысь Татьяна Леонидовна Кузнецовалэсь ужъёссэс.

Асэнызы тодматон-веранын песянайёслы нылпиоссы, нуныкайёссы, эшъёссы юрттӥзы. «Мынам семьяе — мынам узырлыке» люкетаз тодматскон ортчиз туспуктэмъёс пыр. Та презентациын ик песянайёс адӟытӥзы-веразы, кыӵе сям-йылолъёс возисько семьяосазы. Тани Варвара Чураева (Муки-Какси) вань туспуктэмъёсызлы серемес кылбур чуръёс дасям, кылсярысь, «Мынам эше, пурысь кече», «Миллион утӥ — трактор басьтӥ» но мукет. Маскара кылбуръёс гожъямзэ мукет вожвылъяськонъёсын но возьматӥз. Варвара Никифоровна «Кыллы усто» номинациын пусъемын.

Калмез черкогуртысь Таисья Чернова тужгес мыло-кыдоез луиз. Таисья Захаровна пыриське гуртысьтызы библиотекаысь «Шуныт пумиськон» клубе, нунокъёссэ но удмурт кыллы дышетэ. Та клубе песянай-песятайёсын ӵош пырисько школаысь покчи классын дышетскисьёс но (дышетӥсьсы С. Скрябина).

Кунояны быгатэменыз паймытӥз Сюмсиысь Анна Пасынкова. Кыӵе усто со мадиз улонысьтыз табань пыжонэн герӟаськем серемес учыръёссэ! Анна Петровналы «Ӟечлыко» лента керттӥзы.

Песянайёслэсь пӧрась-кемъёссэс но дунъязы. Пӧртэм пумо табаньёсты, перепечъёсты, жюриын пукисьёс сяна, залысь калык но шќмъяны быгатӥз. Ма, вӧзаз пӧсятэм но вайиллям, кызьы-о, пе, сотэк! «Усто пӧрась» нимез басьтӥз Сюмсиысь Елизавета Ивановна Шишкина, нош «Устоез кузё кышно» луиз та черкогуртысь ик Лидия Викторовна Захарова. Со котькытчы вутске: керттӥське, пужыятске, пӧраське. Ваньзы та куинь кышномуртъёс Сюмси культура юртысь ветеранъёслэн «Ивушка» хоразы ветло. Соос понна висизы та хорысь песянайёс.

Творчествоя ӵошатсконын песянайёс возьматӥзы кырӟаны-эктыны, кылбураны, маскаръяськыны быгатэмзэс. Гурыысь Раиса Зеленцовалы юрттӥсьёсыз кырӟан малпаллям, тыпырак эктӥзы но. Пиезлэн пиез но возьматӥз песяеныз ӵош задор эктэмзэ. Раиса Гордеевна «Зарни песянай» ним басьтӥз. Со пусъемын элькунысь Удмурт нылкышно кенешлэн но «Удмурт дунне» газетлэн кузьымъёсынызы.

Конкурсэ пыриськем котькудӥз песянай данъямын пӧртэм номинациын, пусъемын кузьымъёсын, нимаз дунъямын самой егитэз но самой арлыдоез песянай. Кузьымъёс понна бадӟым тау «Удмурт дунне» газетлэн редакциезлы, элькунысь Удмурт нылкышно кенешлы, ёрос кенешлы, ёросысь ужбергатӥсьёслы П. Кунавинлы, И. Фалалеевалы, А. Алабужевалы.

Редакцилэсь:
Раиса Волкова — Сюмсиысь «Знамя» газетысь журналист, дас аръёс ӵоже ини кивалтэ Удмурт нылкышно кенешлэн ёрос ёзэныз, озьы ик пыриське элькунысьтымы Нылкышно огазеяськонэ (кивалтэ Зоя Степнова). Семьяослы но нылпиослы юрттэт сётон ужпумъёсты сэрттон-пертчонэ ёросысь Атайёслэсь кенешсэс но бордазы кыско.

Калыкен ужанын Раиса Михайловна бадӟым саклык висъя нылкышно клубъёслы. Ёросазы укмыс клубъёс кылдытэмын, куинез огазеяз удмуртъёсты. Сюмсиын ужа «Табань» клуб, Гурыын — «Пукон корка», Калмезын — «Шуныт пумиськон». Арлы быдэ вань нылкышно клубъёс пырисько кыӵе ке ужпумлы сӥзем ёрос фестивале, акциос ортчытъяло. Кылсярысь, апреле ортчоз «Чылкыт село» ужрад.

Раиса ВОЛКОВА,
Сюмси ёросысь Удмурт нылкышно кенешлэн кивалтӥсез

Удмурт Дунне
By Удмурт Дунне 16 апреля, 2013 10:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<