Нурскетӥсь иськавынъёс

Удмурт Дунне
By Удмурт Дунне 5 апреля, 2013 15:21

Нурскетӥсь иськавынъёс

Пыдад кут кутчаса гинэ, удмурт уд луы

Пыдад кут кутчаса гинэ, удмурт уд луы

«Удмурт дунне» газетысь 15-тӥ южтолэзь понна «Удмурт нерге» статьяез лыдӟыса, пушкам бугырскизы таӵе малпанъёс.

Ассэ гажась удмурт нокызьы сюлэмшугъяськытэк уз кылзы удмуртъёслэсь куспазы ӟуч кылын вераськемзэс. Мынам но виры кисьтӥське, ӟуч кылэз тодэменызы ушъяськисьёсты адӟыса. Йӧно мурт дораз но, поездын но, лавкаын но, уж дураз но кыре поттоз анай кыл тодэмзэ но, данъяськоз ас дӥненыз (выжыеныз), вашкала сямъёсын, кемалась кылдытэм чебер культураен.

Малы нош Шаркан школаын ваментӥсько Россилэсь Конституцизэ улонэ пыӵатыны? Отын меӵак гожтэмын ук: котькуд калыклы ас кылзэ утьыны луонлык сётоно. Ай корреспондент Елена Сараматова верамъя, директор ачиз удмурт. Паймод ук!

Та югдурез сэрттон-пертчонэн вырыса, мон таӵе валанэ вуӥ ваньмыз потэ асьме калыкмес ултӥян бордысь. Уно дауръёс ӵоже асьмелы пыӵатыны тыршизы алама (урод) мылкыд: тӥ — пӧрмостэм калык, тӥляд ӧвӧл узыр историды но, вашкала чебер культурады но — дуннелы номыр пайда ӧд вае. «Вотяк» кушем ним но лякизы на. Сокем-сокем мыскыллязы вӧсяськонмес но, лякыт сяммес но! Кырсь ужлэн кырсь емышез быгыльскиӟ удмуртэд ассэ «мон — вотяк» шуыны ӧдъяз, удмурт луэмзэ бератаз ватыны шӧтаз. Юнме вераллямтэ ук: адямиез сю пол парсь шуид ке, сю одӥгетӥяз нурскетыны кутскоз. Соин валче тӥни асьмеос пӧлын нурскетӥсь иськавынъёсмы пумиськыло.

Нош мар шуэм со «вотяк»? В. Дальлэн словаряз тазьы валэктэмын: вотяк — со тышкаськон но серекъян кыл, «дурак, разиня, болван» шуэм.

Мае уг валало Ольга Бородулина выллемъёс? Адямилы (нылпиосмылы но) удмурт семьяын вордскемезлы, удмурт луэмезлы шумпотон но данъяськон мылкыд ӧд пыӵаты ке, со личность уз луы. Инмарен сётэм быгатонэз уз пушйы, кызьы со пушйиз дано удмуртъёслэн: Трокай Борисовлэн, Кузебай Гердлэн, Ашальчи Окилэн, Константин Яковлевлэн, Кедра Митрейлэн, Геннадий Красильниковлэн, Николай Байтеряковлэн, Пантелей Кузнецовлэн, Геннадий Корепанов-Камскийлэн, Степан Широбоковлэн…

Ольга Бородулина выллемъёс уг валалӧ математикаез но, физикаез но, инкуазез но школьникъёс капчиен дышетозы, асьсэлы асьсэос кыкетӥ сортъем ӧз потэ ке. Нош шӧдӥзы ке пӧрмостэм луэмзэс, улонлэсь ӧрзэ уз шедьтэ, йыромозы, шонер сюреслэсь палэнтӥськозы, математикаез но, физикаез но, мукет предметъёсыз но кулэтэм карозы, 500 час дышетыса курадӟизы ке но, йыразы уз басьтэ.

Малы бен тае уг валало уноез директоръёс но бадӟым пуконын пукисьёс? Соослы нылпи садын но, школаын но, черкын но, университетын но нокин пыӵатымтэ мур пуштросъем калык визеӟ удмурт калык тужгес интеллигентной, тужгес адямилыко, тужгес ужась, тужгес асьык — котькинлы ӟеч лэсьтыны тыршись. Нокин верамтэ, маиныз удмурт данъяськыны кулэ. Нош пыӵатӥллям удмурт луэмезлэсь, удмурт вордӥськемезлэсь возьдаськон, сьӧд кужымлы нялтас кариськон, уар (раб) луон сям.

Ас выжыедлэсь возьдаськон возьматэ: адямилэн лулсэрыз висе. Тазалыкезлэсь тӥялтӥськемзэ шӧдыны луэ ассэ мыдлань воземезъя: семьяяз тэргаське, вожъяське, кыл вӧлдэ, муртлэн шумпотонэзлы куректэ, муртлы пыдзэ пуктыны тырше, ассэ гинэ тодыса улэ.

Ма кароно асьмелы та вие? Дышетскем адямиосмес кыткыса, валэктон уж нуоно «Шунды», Удмурт нылкышно кенеш, «Дэмен», «Удмурт Кенеш» огазеяськонъёс, газет-журналъёс, радио-телевидение пыр, озьы ик семьяосамы, школаосын, библиотекаосын, пӧртэм люкаськонъёсын.

Жаляса веранӧ туж кема дышетскемъёс пӧлын но палдурес, ылё-кырсё образованиен интеллигентъёсмы пумиськыло. Соосыз тодманы луэ удмурт цивилизацилы вылӥ дунъет сётыны быгатымтэзыя. Сыӵеос мальдо французъёслы, итальянецъёслы, американецъёслы, соослы укшаны тыршо. Сыӵеос мыдланяк шуӧ «Шаркан — это вторая Швейцария». Нокызьы уг валалӧ асьмелэн элькунмы но, инкуазьмы но, сэбедъёсмы но, йылолъёсмы но, кырӟан-эктонъёсмы но быдэс дуннелы синмаськымонэсь, адӟем карымонэсь. Соос нокыӵе Швейцарилы уг тупало!

Университет образование уг сёты — сётэ ма но сое тодон но диплом. Образование басьтон понна нуналлы быдэ лыдӟиськоно, лыдӟемдэ эшъёслы верано но кенешоно. Одно ик тодматсконо философъёслэн ужъёсынызы, Т. Борисовлэн публицистикаеныз, К. Гердлэн диссертациосыныз но статьяосыныз, М. Худяковлэн, Н. Первухинлэн, М. Гришкиналэн но мукет уно тодосчиослэн гожъямъёсынызы. Тодоно уно сюрс аръем историмес, узыр но чебер культурамес, кузьмадёсмес (эпосмес). Пӧртэм амалэн тыршоно йӧнолыкмес утьыны но егитъёслы пыӵатыны. Тани бигеръёс но еврейёс пӧлын асваланзэс будэтон уж туж зол пуктэмын. Соин валче таосыд ас дӥненызы данъясько, соос туннэ котькуд удысын азинскемын. Соин бигеръёслэн но еврейёслэн лулсэрзы уг висьы, мылкыдзы гань-гань, нокыӵе секыт учыре но чыртызэс кыӵесэ уг чуртнало.

Ылё-кырсё образованиен удмуртъёс, асьсэды бере кылем дӥнь кожаса, удмуртлыклэсь палэнтӥсько, удмурт кыллэсь куштӥсько но асьсэлы азинскем, «продвинутой» кадь пото. Нош куд-огез (Ольга Бородулина выллемез) «бере кылем» удмурт калыкез мурт культурае, мурт сяме, мурт вӧсяськонэ, мурт кылэ кыскыны тырше но удмуртъёсыз «азинтэменыз» данъяське.

Альберт РАЗИН,
Трокай Борисов нимо премилэн лауреатэз

Туспуктэмез: udmfoto.ru

Удмурт Дунне
By Удмурт Дунне 5 апреля, 2013 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<