Мылкыдэз веськатэ Лия

Удмурт Дунне
By Удмурт Дунне Апрель 26, 2013 12:47

Мылкыдэз веськатэ Лия

 

"Фитонцида" сценкаез возьмато В. Малых но Л. Пьянкова

«Фитонцида» сценкаез возьмато В. Малых но Л. Пьянкова

Шаркан ёросын юморлы сӥзем «Шудэлэ тӥ, серектэ» фестивальын шӧртчи луэмзэ возьматӥз Вортча культура юртлэн, «Вуюись» калык театрлэн кивалтӥсьсы Лия Пьянкова.

Гуртысь калык театрлы туэ кызь ар тырмоз. Гуртоос туж яратыса ветлэ «вуюисьёслэн» спектакльёсазы, концертъёсазы. Кыӵе ке шулдыръяськон радъяло ке, арлыдоослэн одӥг веранзы: Лияез, пе, учкыны мынӥськом ай. Быгатэ уго Лия Анатольевна калыклэсь мылкыдзэ веськатыны.

— Бередь гуртын улонзэ ортчытэм ӵужмемейме Матрёна Лопатинаез тодӥсьёс, маскаръяськемме адӟыса, шуо: быдэсак Матӥед ук, пе, тон. Мон понна озьы верамзы тужгес но вылӥ дунъет, — маде Л. Пьянкова. — Война вакытэ но ӵужмамае калыклэсь мылкыдзэ ӝутыны, капчиятыны турттэ вылэм. Со вӧзын шуг-секытъёс но вунылӥзы, шуо.

Пересьмыса но Матӥ апай капчи мылкыдзэ ӧз вунэты. Ма, выжыязы ик Лопатинъёслэн маскарчиос киземын. Кык ар талэсь азьло вуылыны кылдӥз Береде. Отын тодматскимы ассэ «пичи баба» шуись песянаен. «Шӧкычез» лыдӟисьёсты но тодматӥмы шулдыр мылкыдо нылкышноен. Зинаида Афанасьевна Лия Анатольевналэн анаезлэн сузэрез луэ.

Пичи бабалэсь верам-мадемъёссэ горытэк кылзыны уг луы. Лия Пьянкова но артист мактал калыкез шулдыртэ. Спектакльёс пуктэ, отын шудэм сяна, юморескаос лыдӟе. Тужгес но ярало, пе, Якшур-Бӧдьяысь Эмма Загребинлэн гожъямъёсыз. Берло дыре син шораз йӧто «Шӧкыч» бамысь серемес гожъямъёс. Синмаське Захар Галилэн ужъёсызлы, матысь дыре репертуарам но пыртыны чакласько, шуэ.

Пьянкова йылпумъяз Ижысь культурая училищеез, луиз культурая ужрадъёсты радъясь. Но сюлмыз туж кыске вылэм режиссёръёсты дасясь ёзэ. Быгатонлыкъёссэ волятыны юрттэмез понна тау каре Анна Евсеевалы. Со вакытэ училищеын ужаса, Анна Яковлевна драмая кружок усьтэ. Егит ныллэсь драмаын но комедиын быгатонлыкъёссэ адӟыса, шуэм: тыныд, пе, артистэ дышетсконо вылэм.

Со кылъёс улонэ сюрес выллем луизы. Лия Анатольевна ачиз гинэ сцена вылын уг шуды, гуртоосты но кыске театрзылэн ужаз. Нош «Маскара» фестивальын но Быгиысь сцена вылын математикая дышетӥсен Владимир Малыхен возьматӥзы «Фитонцида» сценкаез.

Кӧня ке аръёс талэсь азьло та серемес веранэз Лия Пьянкова газетысьтымы шедьтэм. Диалогъёс пыртылыса, ӧжытак тупатъям. Но авторзэ, пе, уг ни тодӥськы. Архивъёсын но бугыръяськыса утчаны вырем. Оло, серемес веранэз гожтӥсь газетмы пыр ачиз вазиськоз?

Лия Малых
Туспуктӥз Владимир Беломорских

Удмурт Дунне
By Удмурт Дунне Апрель 26, 2013 12:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<