Мугорез висъясь гож

Удмурт Дунне
By Удмурт Дунне Апрель 16, 2013 10:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мугорез висъясь гож

Удмуртъёс вӧсяськыкузы куссэс кертто

Удмуртъёс вӧсяськыкузы куссэс кертто

Удмурт дӥськут туж узыр. Соя валаськод адямилэсь пуш дуннезэ но кызьы улэмзэ. Басьтом дӥсьлэсь пичи гинэ люкетсэ — кускерттонэз. Со пӧртэм пумо луэ: путо, е, зар, кускерттон, кал, азьшет кал но мукет. Мар меда вераны быгатэ кускерттон асьме калык сярысь?

Тужгес вашкала дыръёсы со кулэ вал, дӥськутэз ӟырк-ӟырк бордэ ӝиптыса, мугорез шунтыны, бордаз тӥр-пурт, чакма, ньӧл ошыны. Азьло вапумъёсы адямилэн укыр трос вал тушмонъёсыз: сьӧсь пӧйшуръёс, мукет выжы калыкъёс, зор-котъёс, ӟар кезьыт толъёс, тылпу, музъем зуркан, сильтӧл, пумтэм кыж-мыжъёс, шайтанъёс-периос, мунчо-корка кузёос, кыльёс, палэсмуртъёс. Ваньзэ вераса но уд быдты.

Нош кинлы оскиськоно, кин юрттоз та бадӟым дуннеын? Инмарлы, Шундылы, Толэзьлы, Куазьлы но Кылчинлы сяна, осконзы ӧй вал вашкалаосмылэн. Соослэсь юрттэт возьмазы, куриськизы, вӧсяськылӥзы. Инмар юрттоз, малпазы.

Бен, юрттэ но вал, дыр: Шунды котькуд нунал шунтэ, Куазь будосъёслы зоръёссэ сётэ, Мукылчин соослы будыны юрттэ. Нош со понна валаса вӧсяськоно, шонер дӥсяськоно. Янгыш ке дӥсяськид, вӧсям вӧсед кабыл уз луы, Инмарлэсь вожзэ гинэ поттод, пе, озьы, шуо калыкын.

Удмуртлэн дунне чакланаз, дунне шоры учконаз вань туж кулэ пусъетъёсыз, пусъёсыз, гожъёсыз. Огез бадӟымез — инэн музъемез висъясь гож: инвис — горизонт. Со югыт дуннеез сопал дуннелэсь висъя. Соин ик удмуртъёс кисьтонэ шунды пуксем бере гинэ мыныны косо. Соку, пе, шунды сопал дуннеын ӝужа. Уйин вуэм куноез удмуртъёс уг ярато. Бусыын кӧлыса вуиды-а, мар-а, шуо. Вашкала удмуртлэн малпамезъя, кисьтонэ мынон — со сопал дуннее куное ветлон.

Коркан но вань кык дуннеосыз висъясь гож. Со — мумыкор. Солэн огпалаз (ӝӧк палаз) вӧсяськыны яра, нош ӧс палаз сопал дуннее кошкисьёсыз тодазы ваё, сюдо-куясько, кисьтон ортчыто. Адями мугорын со выллем гож луэ кускерттон, путо но зар нимо кускерттонъёс.

Малы удмуртъёс вӧсяськыкузы куссэс кертто? Соос малпамъя, мугор гогы вадьсозь чылкыт, отын адямилэн лулыз улэ. Кулэ ке, со Инмар доры куное кошке. Нош мугорлэн улланьыз — кыж, сьӧлыко. Соин ик кертто путо яке зар нимо кускерттон, бур герд лэсьтыса. Паллян гердэн думем кускерттонэн, путоен, вӧсяськыны уг яра. Вашкалаосмы озьы висъяло вал мугорлэсь вылӥзэ — Инмар палзэ, улӥызлэсь — сопал дунне палзэ.

Со сяна, кускерттон возьматэ на адямилэсь узыр яке куанер луэмзэ, пинал я пересь, пиосмурт я кышномурт, йӧно яке йӧнлыктэм. Йырыз сынамтэ, кускыз керттымтэ муртэ удмуртъёс возьыттэм яке ведӥнь но шуо. Нош ӟучъёслэн вань таӵе веранзы: совсем распоясался.

Улонын, культураын кускерттон бадӟым но дано инты басьтэ. Со асьме калыклэсь ортчем сюрессэ усьтэ.

Семён Виноградов,
Удмуртиысь калык художник

Удмурт Дунне
By Удмурт Дунне Апрель 16, 2013 10:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<