Модель — со модали!

Удмурт Дунне
By Удмурт Дунне 23 апреля, 2013 13:40

Модель — со модали!

Анастасия Тутаева

Анастасия Тутаева

Анастасия Тутаева — будӥсь корреспондентмы но али гинэ быгыльмись удмурт модель. «Эль ныл» мода фестивальын со кужымзэ мерталоз 13 синмальдымон нылашъёс пӧлын. Вормон Настялы сӥзё семьяез но эшъёсыз, Зар-Медло гуртэз, ма, быдэсыз Дэбес ёрос!

Тӥ но быгатоды куарадэс сётыны кельшымон нылаш понна. Вотэсын куара сётон — интернет-голосование — «ВКонтакте» группаын радъямын (vk.com/elnyl2013). Тужгес но яркыт удмурт модель быръемын луоз, вотэсын куараосты чакласа, филармониысь учкисьёслэсь билетъёссэс чотаса но жюриослэсь малпанъёссэс шараяса. Устоез дыды утоз удмурт дэрем но кышет, аспӧртэм синучкон, «Дарт» газетмылэн дырпус вылбамаз туспуксьыны луонлык!

Ар ӵоже ми гожъям, мар дэмла Дина Дэрем, кызьы дӥсясько Пичи Пургалан, кыӵе уксётӥрлык вуро Вера Кузнецова но Ирина Загребина. Табере дыр вуиз ваньзэ тае ас синмыныды адӟыны. Таӵе мода фестиваль удмурт кильтырнаос понна нырысьсэ ортче: учкем сяна, сое но тае басьтыны луоз. Татын ик газетмылы гожтӥськыны быгатоды, магнитъёс но сувениръёс шедьтоды.

Учкисез шулдыртыны вуозы Татарстанысь Павел Александров, Кияса ёросысь Уткин вынъёс, «Эктон корка» студия, Андрей Конышев, Саша Ашихмин, Кристина Ярская… Сомында выль нимъёс! Нош кызьы Уллапалла Бой, Алина Антонова но Ваня Белослудцев кырӟасьёстэк? Ӵапак соос туннэ лэсьто удмурт модаез.

Кызьы меда берыктыны удмурт кылэ «модель» кылэз? Та юанэн ёрмизы «Эктоника» уй эфирын Петя Пушкин но Вероника Ваулина. Кыӵе гинэ валэктонъёс ӧз вуэ: чильтрок, кильтрок, нылашэль, тузӥныл, шогольныл, коштанныл… Ваньзы малы ке малпазы: модель — со чеберъяськыны яратӥсь апок. Кин ке шуиз, модель — со оброс, туспуктэт. Но Mademoiselle Oudmourte агентствоысь дыдыос — улэп лулъёс: соослы тужгес но кельшиз модали шуэм. Иське, модель табере модали луоз!

Оскем потэ, удмурт дэремлы сӥзем ужрад чебер тодэ ваёнъёслы гинэ уз пӧрмы. Нылашъёс чакласькысагес дӥсяськыны ӧдъялозы, ӵемгес кузь юбка но дэрем нуллозы, воргоронъёс но йыразы гын шляпа понозы. Фестивальын котькуд учкись аслаз вурем дэременыз шогольяськыны быгатоз! Удмурт дӥсез понна со удмурт пужыосын пулэсь лэсьтэм флешка но утыны быгатоз!

Модалэсь бере кылемды уг ке поты, 30-тӥ оштолэзе лыктэ филармоние.

Дарали Лели

Удмурт Дунне
By Удмурт Дунне 23 апреля, 2013 13:40