Мисхат

Удмурт Дунне
By Удмурт Дунне Апрель 9, 2013 10:51

Мисхат

6-9-2Верос

Бертӥсько Сибирьысь. Поездмы Екатеринбурге дугдӥз. Татын, пе, со ог ӝыны чассэ сылоз. Ярам, иське. Мон тӧлатскыны кариськи — татысь омырен шокчыны, калыкез адӟыны. Ӝокыт вагонысь, бадӟым вуэ дыртӥсь чорыг сямен, потӥ, йырме сопала-тапала кочыръясько…

Вагонмылэн усьтэм тамбур ӧсэз дорын, перронын, сыло проводницаос. Маке со куспазы лабыртэм карыло, ӝутэм киоссы ултӥ котырак учкыло — шунды яркыт пиштэ. Кыкназы ик соос ньыльдон ареслэсь ортчемын ини, мугоръёссы — кисьтэм кадь буйгытэсь, быгытоесь, ужаноесь. Тусъёссы — котыресэсь, югытэсь. Верасько удмурт сямен. Пельме сакгес карисько: э-э, таос Башкорт палась, шӧдске-кылске… Зэмен но, отысь ик вылӥллям. Кемалась ни, пе, чугун сюрес вылын ужаськом, кузь рейсъёссы вискын дырзы тырме юртъерзы котырын но берганы… Курег вордо, ошпи куайыто, улмо сад возё… Али но тани дышем крещтян сямъя дырын-дырын инме учкыло шугъяськыса — зорез чаклало: картошез но гожъян дыр, пе, вуиз ни… Бертыса соин выроно луоз.

Перрон кузя, бадӟым люкен, куара-лангаё нылпиос дыртытско — асьсэ поездзэс утчало… Сьӧдкуакаос сямен ӟабыльто куспазы. Таос школаын дышетскись пиналъёс, дыр, лымшоре шутэтскыны мыно — зарезьын жомбылляськыны, мугорзэс тём пеймыт луытозь пыжыны… Бигер сямен верасько кадь…

— Адаш*, тынад но картэд бигер ук, лэся? — юаз огез проводница мукетызлэсь.

— Ӧвӧл. Мынамез — чуаш.

— Удмуртэз ӧз басьты-а, мар-а? — пальпотэ лӥятэм кадь карса юлтошез. — Мон понна ке зэмос пиосмурт одно ик удмурт медло. Удмурт кузпалме нокинэн но ноку но уг вошты. Со небыльток ке но, азьтэм сульдэр ке но, супыли губи ке но, сёровно — аслам…

— Кинлы мар ини усе та улонын… Мар карод на: удмуртэз ӧз басьты бере монэ… А ведь кыӵе кӧяз-вӧяз вал монэ, армие кошкыкуз: берто, сюанмес шудомы, ог-огмес весь яратыса гинэ улом, Янаулэ корка пуктом улыно-вылынозэ, дас нылпиосмы луозы, вал вордом но машина басьтом…

— Алдаз-а, мар-а? — пайме Адаш шуонэзлэн юлтошез.

— Озьы, дыр, луыса потӥз ни со, — лулӟе таиз. — Келяй мон сое армие вань калык азьын. Ми ведь салдатозяз куинь арзэ эшлаським ни вал — тодӥсьтэмез ӧй вал… Службаезлы со Москва областьысь Коломна городэ шедиз — город нимыз ик синазькыль: Коломна — иське, кӧлом на, кӧлом на… Тьфу! Кӧня, ява, гожтэт но гожъямы ог-огмылы, уробое но тырыса, уд вормы нуыны…

— Сэре?..

— Мар, пе, сэре? Бертӥз гажанэ армиысь ӟуч кышноен, Коломнаысь ик макеен… Арня улыса, огаз акшан азьын мон доры но со алдаськисе пыриз… Шуэ: прости, пе, ява… Соку мон азяз ик азбар шоре султӥ но пуксись шунды азьын курлай сое…

— Вӧсянэн юриськид-курласькид-а, мар-а? Ой-йы, ява, кӧты-сюлмы…

— Озьы, дыр, луыса потӥз ини… Шуи: та югыт Шундые, утисьмы-вордӥсьмы тон, шунтӥсьмы но вешасьмы, монэ алдам муртлы эн сёт шуддэ-бурдэ, ӟеч улондэ, ноку но медам луы солэн нылпиез!

— Остэ, остэ, ява… Сэре?

— Мар на сэре… Соос гуртысьтымы кошкизы, Коломнаязы ик берытскизы — адскылыны гинэ вуылӥллям угось… Али но, пе, отын ик уло — Коломнаын. Асьсэ корка, пе, пуктӥллям, иномаркаен ворттыло… Нош нылпизы — ӧвӧл…

— Нош ачид сэре кызьы? Улӥд-вылӥд, шуисько…

— Мукетызлы бызи. Палэнысь чуаш пияшлы. Мултэс уг юылы, уг жугиськы, уг кереты монэн, ужзэ тодэ — шофёр со… Кема ни ӵош улӥськомы… Корка но пуктӥм, валмы но вань…

— Нош нылпиос ласянь? Кӧня соос тӥляд?

— Одӥг. Пи. Инмар ӧз сёт огзэ сяна… Сое но куинь арзэ витимы картэным.

— Кызьы-о нимады пидэс?

— Мисхат. Со Уфаын улэ ни ас понназ, заводын ужа, инженере дышетске… Кенмы — удмурт, милям гуртысьтымы ик, бускель урамысь… Ӵап со урамысь, кудаз Коломнаысь Мисхат улӥз, отын ик вордскиз но вал…

— Таиз кыӵе-сыӵе Мисхат?

— Ма, самой со — нырысетӥ удмурт яратонэ… Со но Мисхат нимо вал ук…

— Тынад ваньмыз ни Мисхатъёс, лэся…

— Ӧвӧл. Картэлэн нимыз — Максум…

— Капчи ӧвӧл ик та улон но, Адаш…

— Секыт. Секыт та улон… Но кызьы ке но улоно, — соглаш луиз таиз. — Кылзы ай, тон Тобольскысь чорыг басьтӥд-а? Мынамез ведь ортчыт яратэ муксунэз… Уката ик ӵынатэмзэ, сурен, мунчо бере… Нош мон ведь воксё но вунэтӥськем ук басьтыны…

— Мон басьтӥ… Тыныд но сёто ни, иське, жаль ӧвӧл…

— Чорыгед понна кедра мульы кулэ ӧвӧл-а? Мынам ведь трос. Мимала ке но — умой. Сургутысь басьтэм вал…

— Вай, иське. Нылпиос куадалозы…

…Мон ортчисько на перронтӥ. Калык котыр туж трос. Ваньзы дырто. Кудӥз уйиське кадь кин ке сьӧры, нош кудӥз пегӟе кадь кинэзлэсь ке… Одӥг чугун сюресэтӥ лыдъяны луонтэм адями сюресъёс ортчыло, рельсаосты ик гужлато. Пӧртэмесь, ог-огзылы тупасьтэмесь.

…Тани милям но поездмы вырӟиз. Мыным — гуртам…

* Та кенакъёс верасько камсьӧр удмурт сямен, но мон соосты валай ас сяменым; озьы ик гожтӥ но (авторлэсь).

Вячеслав Ар-Серги
Туспуктэмез: udmfoto.ru

Удмурт Дунне
By Удмурт Дунне Апрель 9, 2013 10:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<