Милемлы колхозэз ӝутоно

Удмурт Дунне
By Удмурт Дунне 2 апреля, 2013 15:23

Милемлы колхозэз ӝутоно

А. Анисимов

А. Анисимов

Алёша Анисимов тодон-валан басьтэ Ижысь гурт удысъя академиысь зооинженерной факультетын. Пияш мушъёсын тунсыкъяське: курсовой но диплом ужъёсыз соосын герӟаськемын.

Туэ Алёша 4-тӥ курсын дышетске ини, мыло-кыдо пыриське академилэн улон-вылоназ.

— Студент луэмедлэсь азьвыл, школаын дышетскыкуд ик, котькыӵе ужрадъёсы пыриськылӥд, луоз?

— Озьы. Милям Кияса ёросысь Лутоха шор ёзо школаысь классысьтымы нылъёс но пиос котьма ласянь мыло-кыдоесь вал. Школаямы гинэ ӧвӧл, районын но республикаын ортчылӥсь олокыӵе конкурсъёсы, фестивальёсы, концертъёсы пыриськылӥмы. Классэн кивалтӥсьмы Вера Романовна Владыкина милемлы мӧзмыса улыны маза ик ӧз сётылы: оломар но выльзэ малпалляз. Я со сочинениос гожтытоз но кытчы ке келятоз, яке мукет уже кыскоз. Спортэз вератэк ни, мукет предметъёсъя но трос вормонъёс басьтылӥмы, борддоръёсмес таукаронъёс но синпель кузьымъёс чебермазы.

— Тон сяна, классысьтыды кин ке академие дышетскыны пыриз на-а?

— Классамы нылъёс но, пиос но визьмоесь вал. Тросэз тодон-валан басьтыны вылӥ дышетсконниосы пырылӥзы. Ми гурт академие Алёша Владыкин эшеным пыримы. Со электрофикациез бырйиз, нош мынам мушъёсты ӟечгес но мургес эскереме потӥз.

— Анай-атаед доры ӵемысь-а бертылӥськод?

— Арнялэсь ортчемзэ гинэ возьмаса пукисько. Кыдёкын ке но гуртэ, сюлэм ялан отчы кыстӥське. Юрт котырын анай-атайлы юрттӥськеме потэ. Уж гуртын мар ке мында, нуналлы быдэ коть уйшорозь пуксьылытэк ужа. Милемыз дышетыны капчи мед луоз шуыса, анай-атае гид тыр пудо-живот вордо. Гужемзэ соослы кӧня турын октоно-калтоно луэ! Та вакытэ атае, висьыны усьыса, койкае шедиз. Мамаеным ӵошеннамы парсьмес вандӥмы. Пуш тӥрлыксэ но ачим ик октӥ-калтӥ. Мамае мыным атаелы кадь оскиське, котькыӵе ужез ужаны монэ гинэ возьмаса улэ. Доре вуисько гинэ но, гидэ потӥсько, пичи дырысен пудоос борды дышемын бере, мон соослэсь мӧзмисько. Озьы ик яратӥсько техникаез, ялан со котырын бергасал.

— Клубе, егитъёс доры, потон понна гуртэ чалякгес вуэмед потэ, кожасько?

— Куд-ог эшъёсы пичиысен клубе потаны кутскизы. Нош мынам сыӵе мылкыды ноку ӧй вал. Школаын дышетскыкум но, академие пыреме бере но клубе одӥг-ог сяна потаме ӧвӧл. Егитъёслэсь мар дауртэмзэс адӟисько ке, тросэз соос юонэн но кысконэн эшъясько, мылкыды гинэ куашка, клуб пала пыдъёсы уг кыско ни. Мынам сыӵе ужен уг поты выреме, дыры но жаль, сьӧрам лыдӟиськон-гожъяськон ужъёсме вайыны тыршисько. Бертӥсько ке, «Удмурт дунне» газетэз но киям кутылытэк уг чидаськы. Мамае Людмила Ивановна школаын ужа бере, со нылпиосты математикалы дышетэ, солэн но улонлэсь бере кылемез уг поты, дыр, почта пыр газетэз басьтэ. Яратыса лыдӟисько егитъёслы потӥсь «Дарттэс».

— Городын лыдӟиськыса кӧтыд уг тыры ке шат?

— Лыдӟиськон отын но, татын но тырме. Ӵем гинэ экзаменъёслы дасяськоно луэ. Нырысь-валысь общежитиын улӥ, собере квартирае выжи. Ас поннам умойгес потэ мыным, урокъёслы дасяськыны капчигес. Нош эшъёсын люр-ляр, малпам уждэ йылаз-пумаз лэсьтыса вуттоно ӧвӧл. Тани диплом басьтон ныр улын ини, солы ӝот-ӝот дасяськыны кулэ.

— Дипломдэ мушъёслэн висёнзы но чечы сётэмзы пумысен гожтӥськод шуиськод?

— Дышетскыны пыреме бере ик мушъёс борды кыстӥськи. Таослы мон пичиысен дышемын. Кельше котыразы берганы. Тросэз мушъёслэсь лекамзылэсь кышкало, нош мон пичи но уг. Атаелэн аслаз пасекаез вань. Со вӧзын ялан ужаса, лэся, мыным мушъёс матынэсь но мусоесь пото. Кыксэ ик практикаме атае вӧзын ортчи. Диплом уже но мушъёсын ик герӟаськемын. Та удысэ студентъёс туж ӧжыт кыстӥсько, шуэ курсовой уженым кивалтӥсь Надежда Алексеевна Санникова. Ми со дорын чылкак вить кузя гинэ.

— Маке туж ӧжыт ук?

— Нырысетӥ аръёссэ группаямы туж трос кузя дышетскимы на ай, собере ӧжытгес но ӧжытгес кылимы. Академиын нокинэ жаляса уг уло, быжъёсыд вань ке, соосты дырыз дыръя уд ке тупатӥськы, тонэ жаляса но кутыса уз возе, кошкытозы гинэ. Кыӵе курсын дышетскемдэ но уз учке, витетӥысь но тузыса лэзьыны быгато. Академия со школа ӧвӧл, татын аслыд ачид тодон-валан люкаськод. Номыр но йырад ӧд ке пырты, кызьы экзаменъёстэ сётъялод. Соин ик котькуд предметлы рос-прос дасяськоно луэ.

— Ваньмон дырыд чик ӧвӧл-а, мар-а?

— Ял карыны дыр шеде, но туж ӧжыт со. Дышетскыны пыреме бере гитараен шудыны курсъёсы ветлӥ вал. Крезьгурен вырыны мылкыд кулэ, сое пичи дырысен валано, дыр. Соин ик со мыным секытэн сётӥськиз ини. Ужлы ёрмыса пичи но уг улӥськы, ӝытъёсы нылъёс общежитие доразы ӧтчало: я соослы ноутбуксэс тупатъяно, я сӧриськем телефонъёссэс лэсьтоно. Ку вуод ни шуыса, возьмаса гинэ уло.

— Компьтеръёсты тупатъясько шуиськод, кытысь тынад сыӵе быгатонлыкед?

— Школаын дышетскыкум ик компьютерез ас поннам, нокин дышетытэк, туж ӟеч валаны кутски. Собере дышетӥсьёсты но, косэмзыя, соин ужаны дышетӥ. Со мыным туж капчиен сётӥськиз.

— Анай-атаед тӥледыз дышетон понна живот вордо шуиськод. Кӧня сузэр-вынъёс бен тӥ?

— Мынам кык апайёсы. Мон самой покчиез луисько. Лиана апае гурт академиез йылпумъяз, со бухгалтер. Апаелэсь адӟем карыса ик мон но отчы дышетскыны пырыны шӧтай. Нош Ирина Удмурт кун университетын биология факультетын 5-тӥ курсын дышетске. Апайёсыным тупаса улӥськом.

— Соос кадь ик кузпал но утчалод ни, вылды. Синмаськымон нылашед вань ни, дыр?

— Удмурт нылъёс лякыт сямоесь ук. Апайёсы но сыӵеесь ик. Конешно, соос кадьзэгес ик кузпал но шедьтоно вал. Но со сярысь вазь на малпаськыны, нырысь ик, дышетсконме йылпумъяса, армиын служить кароно ай.

— Армие ветлыса, улыны гуртэ интыяськод-а?

— Ма, юнме гурт удысъя академиез ӧй бырйы ук. Колхозъёс куашкало ке но, гуртэз егитъёслы ӝутоно, быдтыны сётоно ӧвӧл. Ваньмыз отысь кошкыса, мар луоз азьланьын? Атаелэн юртъерез умой. Кулэ луиз ке, малпасько, мыным но корка ӝутомы, со милям кибашлы воргорон.

Любовь Тихонова

Удмурт Дунне
By Удмурт Дунне 2 апреля, 2013 15:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<