Ми йыромемъёс ӧвӧл

Удмурт Дунне
By Удмурт Дунне 26 апреля, 2013 13:02

Пермь улосысь Чайковский городысь удмуртъёслэн «Дэмен» огазеяськонзы арысь аре сяськая, нылкышноослэн асьсэлэн «Удмурт корказы» вань.

Со коркалэсь борддоръёссэ чебермало таукаронъёс но пӧртэм интыосысь ваем кузьымъёс. Зэмос удмурт корка кадь со чеберъямын: зыбкаез но, гурез но, мудорез но вань. Куиськон станоксы но сылэ. Со юнме инты басьтыса гинэ уг улы, нылкышноос отын куисько, киужъёссэс выставкае поттало. Борддоразы ошылэмын пужъятэм ӵушконъёс, ӝӧк вылын — чильпам тӧдьы ӝӧккышет но трос-трос мукет.

— Нылкышноосын арнялы одӥг пол ке но одно ик люкаськыны тыршиськом, — вера «Дэмен» огазеяськонэн кивалтӥсь Валентина Аристова. — Ӝеганъёс-мар луо ке, соос телефон пыр монэ утчаны кутско ини. Ачим но соослэсь мӧзмисько, сюлэмы чидатэк доразы кыстӥське.

Удмурт нылкышноос татын одӥг семья кадь валче, тупаса уло. Огинэ люкаськыса, чай юон висказы ог-огенызы улон-вылон сярысь кенешо, удмурт кылын кырӟало-верало, анай кылын потэм журнал-газетъёсын но выль книгаосын тодматско. Соосты басьтыны Валентина Петровна юромо Иже ветлэ. Кӧня тодмоосын но эшъёсын пумиськи шуыса, отысь со бурдъяськыса но капчи мылкыдын бертэ. Собере эшъёссэ котыраз люка но Удмурт шаерысь кылэм-адӟем иворъёссэ маде.

— Алигес Степан Широбоков кылбурчилы 100 ар тырмиз, — вераськонмы борды итӥське азьвыл дышетӥсь Зинаида Шихова. — Кылбурчиез буре вайыса, библиотекаын бадӟым ӝыт ортчытӥмы. Степан Широбоков сярысь трос материалъёс люкамы, юромо Эгра ёросысь Зура школаысь тодмо дышетӥсьёслы жингыртылӥ, соос милемлы кылылымтэ-адӟылымтэ материалъёс келязы. Степан Широбоковлэсь плёнка вылэ гожтыса кельтэм улэп куаразэ но кылзӥмы. Кылбурчилэн кылъёсызъя гожтэм кырӟанъёсты кырӟамы. Пьесаысьтыз пичиесь сценкаос возьматӥмы. Писательлэн творчествоезъя но улэм-вылэмез пумысен бадӟым выставка лэсьтӥмы. Та нуналъёсы озьы ик дасяськиськом ини Ашальчи Окилэсь юбилейзэ пумитаны. Солэсь кырӟанъёссэ но кылбуръёссэ дышетӥськом. Ми асьме понна гинэ озьы ум дауртӥське, одно ик дорамы ӧтчаськомы школаын дышетскись пиналъёсты но нылпи садэ ветлӥсь тэшкылиосты. Соосты черсыны но керттӥськыны дышетӥськомы. Котьмарлы паймо нылпиос, тросэз выльысь дорамы курисько.

Алигес удмурт кенакъёс библиотекарьёсын ӵош удмурт дэремлы но удмурт мунёлы сӥзем адӟытон усьтӥллям.
— Удмурт шаерен артэ улӥськомы бере, удмуртъёслэн улэм-вылэменызы, сям-йылолъёсынызы но дӥськутэнызы тунсыкъяськисьёс уно гинэ, — шуэ город библиотекаен кивалтӥсь Светлана Соколова. — Тросэз сое юромо учкыны лыкто. Удмурт дӥськутлэн тужгес но данэз ӝутӥськиз Брангуртысь песянайёс быдэс дуннелы тодмо луэм бере. Паймоно кадь, ӟуч нылпиос соослэсь кырӟанъёссэс дышетыны косо, кылъёссэс куро.

Кибашлы нылкышноос асьсэ киужъёсынызы но адӟытонъёс ортчытъяло. Тани Зинаида Шихова огшоры басма вылэ ворпо буёло лентаослэсь туж чебер суред пӧрмытъя. Собере сое рамка пушкы тыре. Валентина Аристова мунёослы турлы пумо удмурт дэремъёс вурылэ. Евгения Никитина паймымон чебер пужъятске.

«Дэмен» клубе одӥг-ог воргоронъёс но пыриськыло. Соос но кибашлыос. Тани Владимир Менладшин туспуктэмъёсызлэсь бадӟым выставка лэсьтылэ, удмурт калыкез возьматыны тырше.

— Вордӥськем палъёслэсь медам мӧзме шуыса, ялан Удмурт шаере вуылыны турттӥськом, — вера Глафира Шихова. — Алигес, автобус курылыса, юромо Воткинскысь черке вуылӥмы. Озьы ик малпанмы вань Шарканысь Тол бабай доры ветлыны. Гужемзэ одно ик Гербере мынӥськом. Кӧня тодмоосмес отын пумитаськом, выльёсыныз тодматскиськом. Ай куд-огзэ дорамы ӧтчаны быгатӥськом. Собере соос но милемыз пунэмзэ доразы ӧтьыло. Ӟеч кусып тупатӥм ини Дэри черкогуртысь «Мӧзмон» клубе ветлӥсь нылкышноосын. Ми асьме пушкын гинэ пӧзьыса ум улӥське, дорамы коми-пермякъёсты но, ӟучъёсты но, бигеръёсты но ӧтчаськом. Ужаммес адӟыса, соослэн но мылкыдзы ӝутӥське ми сямен ик ужаны, калыксэс огинэ люканы.

Чайковскийын улӥсь нылкышноослэн шумпоттӥз эшшо одӥгез ӟеч ужзы: доразы пукись инвалидъёс дортӥ ветло, соосты праздникъёсын ӟечкылало, книга-газет кузьмало.

Любовь Тихонова

Удмурт Дунне
By Удмурт Дунне 26 апреля, 2013 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<