Мар пӧрме, диссертация пӧра ке менеджер?

Удмурт Дунне
By Удмурт Дунне Апрель 23, 2013 13:28

Мар пӧрме, диссертация пӧра ке менеджер?

Россиысь наукалэн радлыкез кылдӥз ай кылем даурлэн шораз

Россиысь наукалэн радлыкез кылдӥз ай кылем даурлэн шораз

Наукаен вырон сяменым мон малпаськонэ усисько: кыӵе азьлань сюрессы егит тодосчиослэн, вань-а ӟечезлы осконзы? Маин герӟаськемын туала чиновникъёслэн но бизнесменъёслэн наукая степеньёс басьтыны тыршонзы?

Россиын улонзэс наукаен герӟаны мылкыд карись егитъёслэн лыдзы сокем трос ӧвӧл. Уноезлэн соин вырыны луонлыксы ӧвӧл. Наукае вамыш лэсьтоно малпаськыса, тодыса: тон солы быдэс улондэ сӥзёд. Мынам Москваысь М. Ломоносов нимо университетысь уноез эшъёсы — дышетсконзэс горд дипломен быдтэм макеос — аспирантурае мыныны пумит луизы: ӧз поты диссертация гожтонлы 3-4 арзэс быдтэмзы. Соин ик вераме потэ: наукаез яратыны, соин вырыны мылкыдыд луыны кулэ. Аспирантурае горд дипломедлы яке дышетӥсьёсыдлэн косэмзылы луыса вамыштоно ке — талэсь номыр умоез уз пӧрмы. Наукая эскеронъёсты секыт кыӵе ке ужен ӵош нуыны. Менеджер луыса ужаны но ваньмон дыръяд гинэ диссертацидэ гожтон борды кырмиськылыны — тазьы берганлы трос кужым но чидан кулэ.

Егит тодосчиослы коньдон дурыны капчи ӧвӧл. Соослы тыршоно луэ институтъёсын но бизнес-структураосын.

Кыӵе юрттэт ӵектӥське туала егит тодосчилы? МГУ-ысь — кунысьтымы валтӥсь вузысь — аспирант толэзяз басьтэ 2 сюрс 500 манет. Россиысь Наукаосъя академиысь сотрудник толэзяз Москваын басьтэ 12 сюрс манет. Луоз меда Москваын 12 сюрс манет тыр улыны? Уз! Уг вераськы ни улон инты, Интернет, билетъёс понна тыриськонъёс сярысь. Таӵе дыръя наука сярысь малпаськыны луоз меда?! Егит муртъёс тыршо фирмаосы интыяськыны: самой ӧжытсэ 30 сюрс манет уждун басьтыны урод шат?

Егит тодосчиослэн уждунзы — лэчыт ужпум, соин ик азьпал радэ потэ наукая учреждениослэн, институтъёслэн но бизнес-структураослэн егит тодосчиос понна нюръяськемзы. Та учырын ини егит тодосчи быръе аслыз кельшымонзэ — угось котькудӥз институт сое киыныз-пыдыныз кутыны дась. Валамон, егит учёнойлэн быръем сюресэз ӵем дыръя наукалэсь палэнэ кошке. Кемалась ик ӧвӧл наукая но дышетонъя министр Дмитрий Ливанов Россиысь Наукаосъя академиез дунъяз «бесперспективной» шуыса. Академилэсь секыт югдуре шедемзэ со герӟаз РАН-ысь тодосчиослэн бадӟым арлыдэнызы. Валаны луэ ай 60-80 аресъем тодосчиосты, кудъёсыз нуналмысь маке эскеро. Но трос ук сыӵеосыз но — ар куспын одӥг чур но уг гожто, со вие ик ӟеч интыын пуко.

Иське кыӵе мугъёсын егитъёс мыно наукае? Куд-огез, зэмзэ но, быдэс улонзэ герӟаны дась та удысэн: статьяос, монографиос гожъяло, выль усьтонъёс лэсьто, мылысь-кыдысь пырисько конференциосы, студентъёсты дышето кӧня ке вузъёсын. Мукетъёсыз малпало: тодосчи луыны — модаын, со сяна, наука пыр ӝутыны луоз аслэсьтыд дандэ.

Бен, уноезлэн бизнесменъёслэн но чиновникъёслэн учёной степеньзы вань. Но соос пӧлысь тросэз-а меда басьтӥзы соосты асьсэ визенызы, тыршеменызы? Пусйыны кулэ, пӧяськыса пӧрам диссертациосты пумитаны луэ тодмо тодосчиослэсь но.

Амало чиновникъёс табере дась котькӧня уксё тырыны пӧяськыса пӧрам диссертациоссылэсь палэнскон понна. Медаз гинэ шеде журналистъёслэн ки улазы, медаз гинэ шараяськы соос сярысь умойтэм ивор! Та вакытэ тыро-пыдо эскериське ВАК — аттестацияя вылӥ комиссия, озьы ик син шоры йӧтэмын ни университетъёс бордын кылдытэм учёнойёслэн кенешъёссы но. Одӥг ласянь, умой кадь: наукалы таӵе ке но саклык висъяны кутскизы. Мугез сокем ик умой ӧвӧл ке но. Оскем потэ, азьланяз наукая ужъёслэн ӟечлыксы котыр ласянь ушъямон луоз, кунмы наукаез дунъяны но ӝутыны кутскоз. Кин тодэ, оло, таӵе но решение кутэмын луоз: одӥг университетлы но лэземын уз луы ар куспын сюрс (!) диссертация утьыны. Оло, буйгано араз 10 диссертациен? Озьы лэсьто Европаысь, Америкаысь университетъёс. Эшшо ке диссертациосты Интернетэ пуктоно — соосын тодматскыны мед быгатоз котькудӥз мылкыд карись. Соку лушкаськон шараяськоз!

Анастасия Соломенникова (Чушъялова)

Туспуктэмез: udmfoto.ru

Удмурт Дунне
By Удмурт Дунне Апрель 23, 2013 13:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<