Мар понна янгыш 2 аресъем дыды?

Удмурт Дунне
By Удмурт Дунне 26 апреля, 2013 15:38

Мар понна янгыш 2 аресъем дыды?

Куштэм юрт, куштэм нылпи

Куштэм юрт, куштэм нылпи

Туэ куинь толэзь куспын нылпиослы пумит 353 йыруж лэсьтэмын. Кылем арынлэсь со 9,7 процентлы ичигес. Но МВД-ысь быдэ вуымтэосын ужанъя ёзэн кивалтӥсь Светлана Селёва верамъя, таин нокызьы буйгатскыны уг яра.

Котькуд йыруж сьӧрын — нылпилэн адӟонэз. Туж шуг вераны, кыӵе луоз солэн азьланьын улонэз.

— Мӧйы воргорон 9 аресъем нуноксэ эриктэмаса возем, — маде Светлана Юрьевна. — Ярам, учыр шараяськиз. Нош та сярысь тодмо ӧй луысал ке, кыӵе пинал будысал? Соин али психологъёс ужало. Пияш ведь песятаез пумитэ номыр уг вера, гажа сое. Малпа вылэм: озьы ик луыны кулэ, тросаз семьяосын озьы уло.

Ӵемысь оскиськыны уг яра сюратайёслы. Кизнер ёросысь нылкышно 1,8 толэзьем пиналзэ огдырлы кельтэм ӵош улоно воргоронэзлы. Соиз экеез сокем зол чабкем, макес лызэ ик пилем. Нылпи али но йырсазьтэк кылле больницаын.

Ӧжыт ӧвӧл пӧрмымтэ анайёс но. Шуэрскытӥз Пичи Пурга ёросын луэм учыр: нылкышно дораз нуны вордэм но сое кезьыт корказе поттэм. Нылпи кулӥз. Нош Сарапулын но Вавожын кык юись нылкышноос вож нуныоссэс, улазы пачкатыса, вииллям.

— Туж валантэм, кытын таӵе дыръя бускельёс, кытын гурт администрация? — пайме С. Селёва. — Соос адӟытэк уг уло ук таӵе семьяосты, малы нокыӵе ивор уг сёто быдэ вуымтэосын ужанъя ёзъёсы? Сарапулын ик февраль пумын учыр вал: куинь быдэ вуымтэос — кыкез училищеын дышетскисьёс, одӥгез школаын дышетске на — вазь ӵукна ик юыны кутскиллям. Кыл бӧрсьы кыл — керетон поттӥллям. Одӥгзэ пуртэн бышкалтӥллям. Кин дорын юиллям, солэн анаез бертэм, куноосты уллям. Нокыӵе ик кариськымтэ, огез пияш сӧсыртэмын шуыса. Малы со ӝог юрттэт сётӥсьёсты, полициез ӧтьымтэ? Малы дышетскон учреждениослэн кӧберзы но ӧй вал, пиос дышетскыны вуымтэысь?

Светлана Селёва эшшо но эшшо маде быдэ вуымтэослы пумит учыръёс сярысь. Огезлэсь кышкыт мукетыз. Анай-атайёс тышкало пиналъёссэс — куинь толэзь куспын 74 учыр пусъемын. Кылсярысь, Дэри ёросын нылкышно 2 аресъем нылзэ тыш сюдыса возем, нош бӧрдэмысьтыз поттылэм кезьыт корказе векчи дӥсь коже гинэ.

Но чидан но чиге вылэм. Берлоез учыр луиз та нуналъёсы гинэ. Сюмси ёросысь 8-тӥ классын дышетскись нылаш, пуртэн бышкалтыса, вииз сюратайзэ. МВД-ысь быдэ вуымтэосын ужанъя ёз та учырез али сэрттэ-пертче, Светлана Селёва ачиз отчы вуылӥз ни.

— Нылашлэн ӵыжы-выжыосызлэн, дышетӥсьёсызлэн синмазы учкеме потӥз, кытын соос вал нылашлы урод дыръя? Малы нокытчы ивортӥллямтэ солэн курадӟыса улэмез сярысь? — вера полициысь полковник. — Тодмо ни: одӥг-ог со кӧлаллям анаез дорын, нош отын — сюратай. Вуылэм атаез доры, нош соиз ялан юэ, нылыз вылэ кизэ ӝутка. Куке-соку нылаш куриськылэм апаез доры…

Элина Кумачёва
Туспуктэмез: udmfoto.ru

Удмурт Дунне
By Удмурт Дунне 26 апреля, 2013 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<