Малы кулэ кисьтон?

Удмурт Дунне
By Удмурт Дунне Апрель 5, 2013 11:37

Адямилэн улонэз кыклы люкиське: югыт дуннеын но сопал дуннеын улонлы. Тросэз шуозы: сопал дунне ӧвӧл, но сыӵе малпанэз шонерен лыдъяны уг луы.

Учке ай, кызьы пересьёсмы кисьтонъёс ортчытъязы но ортчытъяло кулэм ӵыжы-выжыоссылы. Со вашкала дырысен озьы вал.
Калыкез мар уте: кыл, йылолъёс, ас калыкедлэсь ортчем сюрессэ тодон, ас инмаръёсыдлы вӧсяськон, выжыдэ тодон но тодын возён (исторической память). Асьме калыкын веран вань: йӧно удмурт, пе, сизьым полэс выжызэ тодыны кулэ. Озьыен, лыдъялэ, кӧня полэс ӵыжы-выжыостэс тодӥськоды, соку адӟиськоз, йӧно-а тӥ, огшорыгес-а.

Удмурт йылолъёс сярысь верано ке, нокызьы но палэнэ кельтыны уг луы кисьтонъёсты. Мон сыӵе малпанэ вуисько: кисьтонъёс ортчытъяны кулэ. Соку асьме кулэм ӵыжы-выжыосмы сярысь малпаськиськом, соосыз тодамы вайиськомы.

Тросэз егитъёс кисьтонъёс сярысь уг тодо ни. Нош соос луо пӧртэм-пӧртэм. Кулэм муртлы ортчыто куинь уйзэ (тазэ табере ватон нуналазы ик ортчыто), сизьым уйзэ, ньыльдон уйзэ, арзэ. Арен ӝыны яке 2-3 ар луэм бере, йыр-пыд сётыса, бадӟым кисьтон ортчыто. Мумызылы скал йыр-пыд сёто, айызылы — вал йыр-пыд. Куинь, сизьым, ньыльдон уй ортчытонъёс лыдъясько выль кулэмлы кисьтонэн. Выль кулэмъёслы кисьтонын, соосын улэп муртэн сямен верасько, номыр мыдлань эн каре, огазьын сие-юэ шуо. Кулэм нэнэзэс куро: нэнэй, ачид сюд, секта.

Нош со сяна удмуртъёс лэсьто сӥзьыл-тулыс кисьтонъёсты. Со сярысь пыр-почгес вераме потэ. Таосыз вань кулэмъёсты, кемалась-кемаласьёссэ но куно каронэн лыдъясько. Соосты удмуртъёс арлы кык пол ортчытыло бӧлякен-бӧлякен пӧртэм пыжосъёсын.

Огез ортче сӥзьыл кынтылыны кутскем бере, Пукролэсь азьло (14-тӥ октябрьлэсь азьло). Мукетыз — тулыс Дӧдьыкуштон йылоллэсь азьло (7-тӥ апрельлэсь азьло). Тани ӵуказе кисьтон ортчытыны яра на, собере уг ни. Малы ке шуоно арнянуналэ бадӟым праздник — Дӧдьыкуштон. Со ар йылпумъяськем кадь лыдъяське, вань вужзэ, уродзэ, ортчемзэ кельтон но Быдӟымнуналлы дасяськыны, чылкытатскыны кутскон вакыт луэ. Тулыс-сӥзьыл кисьтонъёс дыръя кирос тырыны, вќсяськыны уг яра. Берыкъяськоно шундылы пумит гинэ. Коркалэн тӧршор палаз куяськыны уг яра, со вӧсяськон инты. Вӧсяськон — со инмаръёслэн дуннезы, нош куяськон — со сопал дуннее кошкем адямиослы вазиськон, соосты куноятон. Соин ик куясько ӧс пала. Кулэмъёс номыр мыдлань медаз каре, сьӧразы медаз кыске, вожзэс медаз поттэ шуыса, соосыз «сюдо», «сектало».

Сӥзьыл, тулыс ортчылӥсь кисьтонъёсын паськытгес вазисько: «Пересь кулэмъёс, чеке быремъёс (Нырысетӥ дунневыл войнае быремъёс), кыре-буре, Герман оже быремъёс, выль кулэмъёс, ӧксызъёс — азяды мед усёз, ваньды огинын сиелэ-юэлэ» шуыса, сиён, юон куяло муръё вӧзы пуктэм тусьтые яке пичи тусе. Азьвыл, кужез сюсен зыраса, сюсьтыл лэсьто вал но сое куяськон тусьты доры ӝуатыса пукто, али черкысь басьто. Ӧксызъёс шуэмез туалаос уг валало ни. Соос пӧлы пыро бызьытэк-басьтытэк огназ кылем но нылпитэк пересьмыса кулэмъёс, сӧсырмыса быремъёс, кураськисьёс но мукет со выллемъёс.

Тросэз уг валало, мар со келиськон. Келиськон — сопал дуннеысь кисьтонэ бертэм ӵыжы-выжыосмес ӧс, ыбес сьӧрозь келяса потон, кырын, бакча капка сьӧрын куяськыса, кырӟаса-вераса соосты келян. Бакча сьӧры потыку, куяськыны аракы, пыжосъёс потто на. Сое огзэ но берен пыртыны уг яра. Куяськемез тылобурдоос, писэй-пуныос мед сиёзы. Сое кулэмъёслэн азязы усем шуо. Келиськыса пырыку, одно ик муръё борды йӧтӥськоно. «Мар шуизы, милемыз ӧтизы-а?» — пырисьёсты та юанэн пумитало корка кылемъёс. «Салам веразы, тӥледыз уг возьмало, уждэс, пе, быдтэ али», — валэкто соосыз. Келиськыны потыку, ӝӧк сьӧры тӧро бырйыса кельто, кияз одӥг стакан аракы сёто, пырисьёсыз со пумита, ваньзылы веръятэ. Келиськем бере (куяськемез куштэм бере) котьмар карыны яра ни.

Тани тазьы ортчыло тулыс-сӥзьыл кисьтонъёс. Удмуртъёс та йылолэз медаз вунэтэлэ вылэм.

Семён Виноградов

Удмурт Дунне
By Удмурт Дунне Апрель 5, 2013 11:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<