Ма сярысь сипыртэ ӵуж сяська?

Удмурт Дунне
By Удмурт Дунне 12 апреля, 2013 14:12
Нюлэс корам бервыл

Нюлэс корам бервыл

Россилэн Президентэзлэн В. Путинлэн указэзъя туэ ар Россиын инкуазез утён арен лыдъямын. Мар со сётоз? Луозы-а шуръёсмы муресьгес, нюлэсъёсмы љужытэсьгес, омырмы чылкытгес? Та сярысь кенешиськом биология наукаосъя докторен, профессорен Виктор Туганаевен.

— Виктор Васильевич, «Огъя Россия» партия выль проект ӵектӥз, сӥземын со инкуазез утёнлы. Удмуртиын та проектэз пыӵатыны оскизы тӥледлы…

— Ачим та партилэн ёзчиез уг луиськы. Но со таӵе ӟеч уж борды басьтӥське, мыным но отчы пыриськыны ӵектэ бере, малы мон палэнтӥськыны кулэ? Жаляса верано, инкуазь туж зол сӧсыртэмын. Огкадь югдур быдэс дуннеын. Кӧня ошмесъёс, шуръёс куасьмемын! Нюлэсъёсты но шып гинэ корало, нош кӧня кызъёсты кибы быдтӥз!
Бен, али тросэз бусыос куштэмын, отын писпуос будо. Тазьы ик луиз ке, кӧня ке аръёс ортчыса, омырмы но чылкытгес луыны кулэ кадь. Но табере котькуд азбарын сямен машина сылэ, Ижын гинэ 160 сюрс пала соос. Шаерамы улӥсез но трос ӧвӧл, озьы ке но калык лёгамтэ интыос кылемын ӧвӧл ни. Берло сю ар куспын ог 15 пумо будосъёс выжытэк быризы.

— Тӥ шаермылэсь Горд книгазэ дасян борды басьтӥськиды вал, собере та ужлэсь малы ке палэнтӥськиды.

— Ог дасо ар талэсь азьло ваньмыз сямен улосъёс асьсэлэсь Горд книгаоссэс дасяны кутскизы. Палэнэ ӧз кыльы Удмуртия но. Зэмзэ но, мон ачим та уж борды ӟырдыт басьтӥськи, угось оски, шонер сюрестӥ мынӥськом шуыса. Но берло валатски: нокин уз быгаты будосъёсты но пӧйшуръёсты нимысьтыз чакласа возьыны. Москва но Горд книгаослэсь кулэлыксэс адӟемысь дугдэ ни, вала: быдэс Россилы одӥг кельтоно.

Эшшо: Горд книгае пыртэм будосъёсты, пӧйшуръёсты йӧтылэм понна тыриськонъёс чакламын. Но адямиез инкуазе потанлэсь алыны яра шат? Со — ваньмылэн узырлыкмы, ваньмы солэсь чеберзэ адӟыны кулэ. Мукетыз ужпум: сое медам сӧсыртэ, утьыны мед тыршом. Котькуд будослэн, лулослэн улыны правоез вань. Бен, калыклы валэктоно, сыӵе нымы-кибы, пӧйшур, сыӵе будос асьме палан шер пумиськыло шуыса — таин со мед данъяськоз, арам медаз кары.

— Республикаямы заповедникъёс пӧлы пыртэм интыос, археологической синпелетъёс вань — пӧлысьтызы тросэзлэн кузёоссы ӧвӧл, соос понна нокин кыл уг куты…

— Та эшшо одӥгез сюлмаськытӥсь ужпум. Сыӵе интыос республикаямы ог 300 пала, но куинь-ньылез гинэ Россилэн яке республикалэн лыдъясько, кылемъёсызлэн статуссы ӧвӧл, документъёсын юнматымтэ. Вань сыӵе адямиос — соос вашкалаосмылэн улэм интыостӥзы ветло, бугыръясько, ма но со шедьто, асьсэлы капырто. Но сыӵеосты законъя котьку ик кыл кутытон улэ но али кыскыны уг луы.

Туж кулэ выль закон, сое туала улонлы тупамон кароно. Кылсярысь, Кам шур кузя куинь иськем пасьта нюлэсъёс кыстӥськыны кулэ, пе. Ӧйтӧд, кытысь соосты шедьтод на меда? Пётр I эксэй кивалтон вакытъёсы сыӵе нюлэсъёс вал, соку ик озьы луыны кулэ шуизы. Паймоно кадь: татчыозь со курон законын кылемын.

Али бугыръяськисько пӧртэм документъёсын, отын инкуазьмы сярысь гожъямын. Соос вылэ пыкиськыса ик, кылдытоно шаермес азинтонъя программа — экономика но мед азинскоз, инкуазь но медаз сӧриськы. Одно чылкытатоно шуръёсты, нюръяськоно жуг-жаг куясьёсын. Законэн ик юнматоно, юнме интыосты кырсёмытӥсьёсты кыл кутытон улэ кыскыны мед луоз шуыса.

— Выль закон гинэ инкуазез гажаны дышетоз меда?

— Европаын но вазен югдурзы асьме дорын кадь ик вал. Но соос воштӥськыны быгатӥзы. Котьма ке но кун политика бордысь туж тросэз потэ.

Пичи дыръёсме тодам вайисько. Школаын дышетскон йылпумъяське гинэ, колхозэ ужаны мынӥськод вал. Мон уг малпаськы, со туж шонер вал шуыса. Колхозэ одно, оло, потонэз но ӧвӧл. Но гуртын котькудӥзлэн бакчаез вань. Али нылпиос школаысь берто, нунал лумбытэн я компьютер азьын пуко, я урамын шудо. Но соосты бакчае поттыны уг луы шат? Зэм, кароно озьы, соослы отын тунсыко мед луоз — бордазы чаклась, валэктӥсь, ужез радъясь кулэ. Мерттоно, гудоно шуыса гинэ медаз ужалэ, мед малпаськозы, макем кулэ со тыршемзы-сюлмаськемзы.

Но мон тани мае ватсасал на: инкуазен валче улон удмуртлэн вираз пыӵамын. Асьмеос умгес дӥсьтӥське пӧйшурез чик дауре быдтыны, писпуэз тӥяны. Вашкалаосмы, писпу коракузы, Инмарлэсь вожзэ медаз потты шуыса курылӥзы. Удмуртъёслэн вӧсяськон интыоссы вал, али отчы уг люкаськыло ни ке но, соосты туж утьыса возё.

Вашкалаосмы пӧлын сыӵе но веран вал: ӵуж сяськаосты исаны уг яра — Инмарлэн йырыз кур луоз, ӵашъёз. Таос пӧлы пыртылӥзы италмасэз но. Вань адонис сяська, Алнаш палъёсын со адњиськылэ. Нырысьсэ сое 1920-тӥ аръёсы шараязы, туннэ нуналозь но трос ик уг буды. Но ӧз но быры ук! Песянай-песятайёсмы шуо вал, сое кутылӥд ке, юртъеред ӝуалоз. Али но калык сюлмыныз-пушкыныз вала, та сяськалы вӧсь кароно ӧвӧл шуыса. Удмуртъёс гинэ уг, артэ улӥсь бигеръёс но тае шӧдо ни.

— Виктор Васильевич, асьме шаермес ошмесо, италмасо шуиськом, та веран туннэ тупа на-а?

— Ошмесъёсмы куасьмо. Италмасэн шобырскем возьёсмы вань ик, но соос артэ улосъёсын но, кылсярысь Пермь шаерын, ӧжыт ӧвӧл. Шонерзэ вераса, азьло но югдур пӧртэм ӧй вал. Но кылбурчиосмы озьы шуизы. Чебер кылӥське ук! Иське, малы талы пумитъяськонэз? Вордскем палъёсмы асьмелэн, зэмзэ но, туж чебересь. Тае адӟыны-шӧдыны быгатӥм ке, ошмесъёсмы чылкытэсьгес, возьёсмы турлы сяськаосын кисьтаськисесь одно луозы.

Элина Кумачёва

Удмурт Дунне
By Удмурт Дунне 12 апреля, 2013 14:12