Лулчеберет дуннее кык поллы узыргес

Удмурт Дунне
By Удмурт Дунне 23 апреля, 2013 13:01

Лулчеберет дуннее кык поллы узыргес

Надежда Сапожникова (кыкетӥез) ортчытэ "Шудон корка"

Надежда Сапожникова (кыкетӥез) ортчытэ «Шудон корка»

К. Герд нимо гимназилэн бурд улаз ужась «Шудон корка» 4-тӥ арзэ ни ас дораз люкалля Ижысь удмурт семьяосты. Толэзьлы одӥг пол анай-атайёсынызы ӵош нылпиос удмурт сям-йылолъёслы дышетско, киужен выро, удмурт выжыкылъёс но кырӟанъёс кылзо. Кивалтэ соосын гимназиысь удмурт кыллы дышетӥсь Надежда Сапожникова.

— Тон азьло востэм вал. Нош али кыӵе но проектъёсын уд выриськы. Кылсярысь, дауртӥськод удмурт физкультминуткаосын видеоролик дасяны но нылпиос пӧлын сое вӧлмытыны. Удмурт атайёс понна семинар радъяськод.

— Мон пичи дыръям огшоры востэм нылаш вал. Шаплы луонэ, котькытчы пыриськон мылкыды усьтӥськизы, Можга педколледжын дышетскыкум. Нош ма со сыӵе удмурт культура но кыл мон понна — валай, «Шунды» огазеяськонэ сюрыса. Со понна бадӟым тау Марина Прозоровалы (Карпова) но Юлия Никитиналы. Соос монэ отчы кыскизы.

Эшъёсы туннэ ке но паймо: малы, пе, «Шундыын» дырдэ быдтӥськод, эшшо дунтэк ужаськод. Мон чик но уг жаляськы — татын дыши калыкен вераськыны, ужрадъёсты дасяны, сценарийёс гожъяны, пӧртэм шуг-секытъёсты вормыны. Нош кӧня тодмо но тунсыко адямиосын пумиськи!

Берло дыре эскерисько асме «Шундыын» психолог луыса. Ачим уго йылпумъясько ни УдГУ-ысь психологияя факультетэз. Таиз но уже туж тунсыко: пӧртэм шудонъёс, тренингъёс радъям бере пиналъёслэсь ӝуатскем синъёссэс адӟисько ке, юн шумпотӥсько. Гимназиысь тэшкылиосты пӧртэм шудонъёс пыр дышетӥсько удмурт кыллы. Возьматъясько соослы удмурт сям-йылолъёсты, «Шудон коркае» асьсэос но пырисько.

Гимназиын радъяськомы удмурт нуналъёс. Туннэ, нылпи садэ пырыса, кылыны луэ удмурт кылын вераськемез, крезьгурез, дӥсяны удмурт дэрем, сиыны удмурт пӧрам, куное вуо удмурт выжыкылысь геройёс. Та урод шат?

Туала городысь семья дырзэ тросгес висъя ужлы. Яке семья суро-пожо. Валамон ни, таос удмуртлыклэсь пумен палэнско но палэнско. Мылкыдъёссэс бералтон понна малпамын семьяен шудон-шутэтскон удмурт клуб «Шудон корка». Татын волятӥськом семья куспын эркын удмурт кылын вераськонэз. Вераны кулэ: таӵе пумиськонъёс нылпи садын ке но ортчо, ветло отчы «шундыос», артистъёс, УдГУ-ысь удмурт филология факультетысь, культурая колледжысь студентъёс, 56-тӥ но К. Герд нимо гимназиысь бадӟым классъёсын дышетскисьёс. Таос мыным юртто: я выжыкылысь герой дӥсясько, я крезен но арганэн шудо, я концерт возьмато. Туж бадӟым тау соослы!

— Гуртысь потэм егитъёс, городэ сюрыса, ӟучъяськыны кутско. Нош тон ӧд кышка удмуртлыкез ӝутон удыс борды басьтӥськыны.

— Алнаш ёросысь Туймыйыл гуртын будыса, пӧртэм луод шат? Зэм, городэ вуэм егитъёс малпало: удмурт кылзэс шараязы ке, соосты «вотякъёс» шуыса серекъялозы. Калыкын малы ке кылдӥз таӵе валан: вотяк — со гуртысь потэм, бере кылись, возьдаськись, вакчи визьем адями. Нош удмуртъёс макем чебер кырӟало-экто, шулдыръяськыны, куно пумитаны быгато, киужен выро. Та калыкмылэн данъяськонэз. Но тае куд-огез уг вала. Соин, лэся, гуртысь тросэз егитъёс вылтуссэс воштыны выро, кинлы но солы шаплыгес кариськоно луэ городысь калыклэсь бере кылёнтэм вылысь. Та ласянь тужгес но капчи амал — со ӟучъяськыны кутскон.

Кынгыль-конгыль но акцентэн бӧтьыртытозь, умойгес луоз удмурт кылын вераськыны. Чебер но дуно дӥсь сьӧры одно уйиськоно ӧвӧл — шӧмзэ валаны турттоно. Кинлы ке возьдаськон сямыз люкетэ ке, пыриськоно пӧртэм ужрадъёсы, соосты радъянэ. Калык огазеяськонъёсын но вань луонлык астэ выль сямен возьматыны, малпанъёстэ вераны. Городэ лыктэмъёслы ортчоно шуг-секытъёс пыр, но, соосты вормыса гинэ, кужмо, визьмо азьветлӥсь луоно.

Аръёс ортчо, городысь егитъёс малпанзэс, асьсэды возён амалзэс вошто. Соос уг кепырало вераськыны удмурт кылын, удмурт шӧмо дӥсь дӥсяло, удмурт крезьгур кылзо, удмуртлыкез азинтыны юртто.

Огпол пыри магазинэ, октӥськи. Касса сьӧрын пань-пань ымныро нылмурт пуке. Адӟиське: таид удмурт. Кызьы талы ӟуч кылын вазьыны ымыд пыроз меда? Вордскем кылзэ кылӥз но туж шумпотӥз: татын, пе, удмуртъёс но вань-а, мар-а. Со дырысен удмурт кылын вераське монэн. Ачим но дораз черодэ султылӥсько. Но, жаляса верано, трос уг пумиськыло таӵе мылкыдэз бурдъясь учыръёс. џемгес ӵапак мыдлань югдур.

Ветлӥмы Пермь улосэ форуме. Ми эшеным куспамы удмурт кылын вераськиськом. Адямиос паймыса ик учко шорамы, паймыса юало кыӵе кылын бӧтьыртэммес. Мон юан вылэ юан сётӥ: асьтэос кызьы малпаськоды? Чех кыллы, пе, кельше. Ми бускель улосысь удмуртъёс шуыса тодэмзы бере синъёссы уката вылэгес тубизы.

Уг ваты, ачим но нырысь-валысь «святой» ӧй вал. К. Герд гимназилэсь азьло ужай ӟуч нылпи садын воспитатель луыса. Туж яра вал. Но одӥг нуналэ «Шундылэн» ужрадэз улсын лыктӥ удмурт нылпи садэ. Соку пушкам оломаиз вырӟиз. Татын удмурт пиналъёс, воспитательёс, улон-вылонзы но мукет. Дорам кадь асме шӧди. Соку малпан кылдӥз: мон удмурт дышетӥсь, шаплы, котьмаин тунсыкъяськись нылаш — малы мон удмуртъёсын уг ужаськы? Озьы мынӥ кивалтӥсь Анжелика Семёновна Михеева доры. Ас пельёсылы нырысь-валысь ӧй оскы кутом шуыса верамзэ кылэме бере. Йырам соку ик трос малпанъёс-проектъёс кылдӥзы.

Табере валасько: улонэз шӧдон, адӟон, со шоры учкон, анай кылын сяна, ӟученыз но ортче. Мон кык поллы тросгес тодон-валан, быгатонлык басьтӥсько. Озьыен, мынам лулчеберет дуннее кык поллы узыргес.

— Карт но аслыд удмуртсэ быръёд-а?

— Карт но аслым удмуртсэ шедьто, пиналме но удмурт кыллы дышето! Нырысь ик, ог-огмес каньылгес валалом. Ог-огдэ валан, анай кылыныд шӧдэмдэ но малпандэ гажан муртэдлы сюлэмаз пырымон веран понна мукет амалъёс ӧвӧл, дыр. Удмуртъёслы инкуазен сётэмын жалян, валаны турттон. Соин ик умой луысал, удмурт карт шедьтысал ке. Зэм, мукет кылын ке со вераськиз, солэн аслаз лулчеберетэз луоз. Та ӧй люкетысал, дыр, узырмытысал гинэ. Но пиналме одно ик дышето удмурт кыллы. Туала улон трос кылэз дышетэмез но тодэмез кулэ каре.

Елена Сараматова

Удмурт Дунне
By Удмурт Дунне 23 апреля, 2013 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<