Кунянъёс будо… карын

Удмурт Дунне
By Удмурт Дунне 12 апреля, 2013 15:05

Кунянъёс будо… карын

"Дружба" эштослэн тӧроез Н. Богатырёв

«Дружба» эштослэн тӧроез Н. Богатырёв

Дэбес ёросысь Ӟӧтым палъёсысь калык муш кадь тыршись: гыро-кизё, етӥн будэто, пудо вордо. «Дружба» эштосэн 14-тӥ арзэ валаса кивалтэ ни асьсэ бӧляксы Николай Богатырёв.

— Николай Александрович, пумен матэ вуо тулыс бусы ужъёс. Туэ кызьы соослы дасяськиськоды?

— Урод ӧй шуысал. Тулыс кизёнлы дасяськон сӥзьыл ик кутскиз, 1 сюрс 700 гектар муосмес, кын улэ гырыса, кельтӥм. Со, веранэз ӧвӧл, юрттоз бусы ужъёсты дыраз, ӝоггес но агротехникалэн куронъёсызъя быдэсъяны. Туэ 983 гектар валэс юос кизём, одӥг аръем турынъёс — 52,8 гектар, етӥн — 500 гектар, аръем турынъёсмы — 1 сюрс 270 гектар, ӟегмы — 235 гектар. Будосъёсмы умой толйизы.

Ю тысь кидысмы окмымон кисьтэмын. Кӧня ке уг тырмы на етӥн кидысмы, 15 тонна пала кулэ луоз на. Берло дыре бадӟым саклык висъяськом таза сортовой кидыс уськытонлы. Арлы быдэ элита кидыс басьтӥськом. Миым Вавож ёросысь Мичурин нимо эштосысь 19 тонна «Ирень» сорт чабей вайим. Нош Глазов ёросысь «Чура» огазеяськонысь 7 тонна «Неван» йыды вуттӥм. Али милям палэнэ вузаны чабеймы вань. Асьмеос гурт калыклы чабей пызь изӥськом. Гуртоос асьсэос буй-буй ческыт нянь пыжо. Пызьмы уго вылӥ ӟечлыко: няньмес химия ватсэтъёсын ум будэтӥське. Калык сое вала. Но минерал сылалъёсын воксё ум выриське шуыны уг луы. Музъемлэсь удалтонзэ ӝутон вылысь гектарлы быдэ 40 килограмм сылалъёс пазяськом. Со понна 40 тонна изваскаен суро аммиак селитра басьтӥм ни. Таӵе удобрение музъемлэсь чырссэ кулэстэ. Озьы юосмы чебер будо. Юнме шат кӧс гужеме, 2010-тӥ арын но, ми котькуд гектарысь шорлыдын 15,6 центнер ю тысь кутсам. Табере со лыдпусэз данаклы ортчим, арлы быдэ пудолы тырмыт сиён дасяськом. Нош со юрттэ пумен тросгес сӥль-йӧл поттыны.

Скал кыскисьёс

Скал кыскисьёс

— Пудо вордон удысты кызьы азинске, мар выльзэ пыӵатӥськоды?

— Та удысэз азинтонлы нимысьтыз саклык висъяськом. Сотэк угось эштос кассае коньдон уз вуы. Соин ик арлы быдэ пудо уллёмес но йӧл поттонмес йылэтӥськом. Со понна берло дыре трос лэсьтӥм ни.

Тани Сылӥӟдурысь вуж фермаез 2009-тӥ арын ӟеч-ӟеч тупатъям-выльдӥм: пуктӥмы молокопровод, 4 тоннаем йӧл сӥятон танк но мукетсэ. Азьмынӥсь фермаен 20 ар ёрос кивалтэ ни Надежда Корепанова. Пудо утисьёслэн туж чебер шутэтскон интызы, нимаз душсы но кылиськон интызы вань. Котыр чылкыт. Дояркаос тол но, гужем но пуж-пуж йӧл кыско, али но нуналаз котькуд скаллэсь 14 килограмм люкаське. Но со, азьло аръёсысь та дырен ӵошатыса, ичигес луэ. Мугез: туэ скалъёсмы бергес кунян ваё. Со сяна, аръем турынъёслэсь ӟеч сенажмы быриз ни. Сое силосэн но музон сиёнъёсын воштыса, азьланьын йӧл поттонмес йылэтом.

Нош ужъёсмы, зэмзэ но, урод уг мыно: йылэ пудо йырмы но будэ йӧл поттонмы. Тани али сюро таза пудомы 1 сюрс 235 йыр, соос пќлын скалъёсмы — 499, яке, 2010-тӥ арен ӵошатыса, скалъёслэсь лыдзэс 49-лы будэтӥм. Озьы миым быдэс хозяйствоя скаллы быдэ шорлыдын 5 сюрс 644 килограмм йӧл люкам ке, Сылӥӟдур фермаысь куинез дояркаосмы — Ираида Богатырёва, Надежда Максимова но Татьяна Тимофеева — 7 сюрс но ӝынылэсь уно йӧл кыскизы. Кызьы соосты уд ушъя но тау уд кары! Азьмынӥсьёслэсь адӟем каро мукетъёсыз скал кыскисьёс. Туэ но кылем арынлэсь ичи йӧл ум кыске, оло, тросгес но луоз.

Туннэ эшшо одӥг аспӧртэмлыко амалмы сярысь вераме потэ. Кунянъёсмес, кезьыт азьын возьыса, будэтӥськом. Туж огшоры, липет ул выллем гидэ вож кунянъёсмес интыяськом. Со котыр лач-лач ӵоксамын, тӧл уг пыры, татын котьку кӧс, мускыт уг луылы. Пудо небыт куро вылын улэ, ялан выльзэ куро тыриськом, кунянъёслы кӧланы пичиесь полиэтилен каръёс лэсьтэмын. Соосты Москва котырысь одӥг фирмалэсь шедьтӥм. Тазьы 3-тӥ арзэ ужаськом ни. Пайдаез бадӟым: пинал пудо уг висьы, ӝог будэ — нуналаз 1200 граммлы телеӟе. Эльвира Щетникова соосты, ас пиналъёссэ кадь вешаса, утялтэ. Соин ик 16 толэзьем ветылъёс ог 350 килограмм кыско. Усто пудо утись синмаськымон тырше, уждун но умой басьтэ.

Пудо вордон оскемын Марина Симаковалы. Дэбесын вордӥськем нылаш, 1988-тӥ арын Ижысь гурт удысъя институтэз йылпумъяса, дорамы ужаны лыктӥз. Тыршемез пусъемын Удмуртиысь Гурт удысъя но сиён-юонъя министерстволэн Данъян грамотаеныз. Музъем ужанэз 3-тӥ арзэ валаса нуэ ни валтӥсь агроном Алексей Иванов. Марина Симакова, Алексей Иванов но валтӥсь бухгалтер Надежда Андреева мынам тужгес матысь юрттӥсьёсы луо. Вань специалистъёсын огкылысь, тупаса, ог-огмес валаса, ужаськом. Кылсярысь, Сылӥӟдур фермаын 20 арлэсь кема скалъёсты бызьылытэ Алевтина Богатырёва. Арлы быдэ сямен сю скалъёслэсь 85-91 кунян басьтэ. Йӧлэз но быдэс фермая вылӥ сортэн вузаськом. Отчы пыре ваньмызлэн утисьёслэн тыршемзы.

— Николай Александрович, техникадэс выльдӥськоды-а? Етӥн заводды кызьы шока?

— Заводамы вакчи куж лэсьтӥськом. Сое вузанэн шуг-секытъёс кылдыло ке но, басьтӥсьёс шедё. Отын ваньмыз сямен воргоронъёс тыршо, нош ужъёсты быгатыса радъя-нуэ мастер Константин Шкляев. Со татын завод ужаны кутскем дырысен 11-тӥ арзэ тырше ни. Калыкен одӥг кыл ӝог шедьтэ. Ужасьёсты автобусэн нуиськом-вайиськом.

Али милям хозяйствоямы кык кужмо туала «Дон» но «Вектор» комбайнъёсмы. «Нива» комбайнмы 1987-тӥ арысен ужа, но сое куштыны ум дыртӥське. Тракторъёсмы тырмо. Миым автобус басьтӥм, соин калыкез нуллӥськом. 2009-тӥ арын Бадӟым Ӟӧтыме газ вуттӥм. Табере уноез семьяос корказэс чагыр эстӥськонэн шунто но пӧрасько ни. Эштос зернотоке газ пыртӥз на. Мукетыз шумпотонмы — 2010-тӥ арын 1-тӥ сентябрь азьын ӧсъёссэ усьтӥз ӵыжак-выль, шукрес чебер школа-нылпи сад. Озьы быдэс гуртмы син азьын воштӥськиз-чеберскиз. Азьланьын сюресъёсмы но умоялозы шуыса, оскиськом. Озьы калыклэн улон-вылонэз ялан капчия, арлы быдэ уждунмес но йылэтӥськом. Ужась мурт бусьтыр улыны кулэ.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 12 апреля, 2013 15:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<