Куинетӥ луизы

Россиысь следж-хоккеен шудӥсь команда та нуналъёсы Лымшор Кореясь вуизы. Дуннелэн чемпионатаз Россиысь спортсменъёс нырысьсэ пыриськизы, азьвыл соос кыкетӥ дивизионын (В групаын) нюръяськизы. Спортсменъёс азе одӥг курон пуктӥзы — тямыс команда пӧлысь витетӥ интыозь ӝутсконо. Ӵапак соку гинэ сюрес усьтӥськоз Сочиын ортчоно Паралимпиадае.

Азязы пуктэм ужпумзэс Россиысь паралимпиецъёс усто быдэстӥзы. Пусйыны кулэ, национальной сборнойын куатез Удмуртиысь спортсменъёс луо. Полуфиналын Россиысь комнада США-лы келяз, нош куинетӥ инты чехъёсын шудӥзы но 3:0 лыдын вормизы. Нырысетӥ но кыкетӥ гол пыртӥзы Можга ёросысь пиос Руслан Тучин но Евгений Петров.

Куинетӥ интые шедьыса, Россиысь следж-хоккеистъёсмы нырысьсэ пыриськозы Паралимпиадае.

Валентина Емельянова