Книгаос уг кӧло, ми кӧлӥськом!

Удмурт Дунне
By Удмурт Дунне Апрель 23, 2013 13:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Книгаос уг кӧло, ми кӧлӥськом!

Книга - огшоры кыл гинэ ӧвӧл

Книга — огшоры кыл гинэ ӧвӧл

20-тӥ оштолэзе Россиысь книгаез гажась но лыдӟиськыны яратӥсь адямиос изён сярысь вунэтӥзы. Уго та уе ог 750 библиотекаос, музейёс но книга вузась магазинъёс вань мылкыд карисьёслы ӧсъёссэс усьтӥзы.

«Библиоуй» ортчытӥське ни кунамы 2-тӥ арзэ. Та ужрадлэн малпанэз — возьматыны, Россиысь калыклэн улоназ лыдӟиськон али но бадӟым инты басьтэ шуыса. Книга — адямиосты огазеяны быгатӥсь зол кужым.

Ижкарысь 15 библиотекаос книга яратӥсьёсты ӧтизы куное. Котькудӥз лыдӟисьёсты ас сяменыз кыскыны тыршиз. Пӧртэм викторинаос, выставкаос, книга лыдӟонъёс, спектакльёс, мастер-классъёс но йырвизез сынась шудонъёс пӧлысь бырйыны луэ вал аслыд тупасьсэ. Пичи лыдӟисьёс но вунэтэмын ӧй вал: соос понна ортчизы «Библиоӝытъёс».

Тужгес кема ӝуазы тылъёс Некрасов нимо библиотекаын, татын радъямын вал «Кылбуретъя быдӟым путешествие». Быдэс нунал но уй ӵоже чузъяськизы кылбур чуръёс, кырӟанъёс, книгаос сярысь вераськонъёс-споръяськонъёс. Туала литератураен тунсыкъяськисьёслы тужгес кельшиз, луоз, «Ижевск-Москва-Лондон-Ижевск» телевыж: люкаськем калык видео пыр кылзӥз туала тодмо ӟуч писательёслэсь — Л. Улицкаялэсь, Д. Быковлэсь, В. Познерлэсь — вераськемзэс, улон, литература сярысь малпанъёссэс. Жаляса верано, ваньмыз вольыт ӧй вал: адямиос ӧз быгатэ асьсэлэсь юанъёссэс сётыны техника тӥяськемен сэрен.

Лыдӟисьёс пӧлын книгаосын тодматскон тунсыко амалэн ортчытэмын вал: модая театр возьматӥз аспӧртэмлыко дефиле, кудаз модельёс интые вал… книгаос. Озьы ужрадэз радъясьёс веразы кадь: лыдӟиськон модаысь ноку уз поты.

Книгаосын тодматскем сяна, литература дуннее куное лыктэмъёс пӧртэм мастер-классъёсы пыриськизы: дышетскизы карвинглы (емышъёс вылын пӧртэм пужыос каронлы), открыткаос лэсьтыны, анимационной фильмъёс кылдытыны.

Книга лыдӟисьсэ котькыӵе дауре но интые вуттыны быгатэ. Озьы «Новый Акрополь» клубе пыриськисьёс ӧтизы сьӧразы — Шор даур шулдыръяськонэ. Вань мылкыд карисьёс та вакытысь эктонъёслы дышетскизы, вагантъёслэн (со вакытысь калгись кылбурчиос) вожвылъяськоназы пыриськизы, нош пиосмуртъёс рыцаръёслы пӧрмылӥзы.

Ма ватонэз, туала вакытэ ӧжытгес но ӧжытгес адямиос киязы книга кутыло. Литературалэсь интызэ пумен басьто Интернет, телевидение, кино. «Библиоуй» акция возьматӥз: вань на сыӵе адямиос, кин понна книга — огшоры кыл гинэ ӧвӧл. Оскисько, ӵукнаяз султыса, «Библиоуе» пыриськисьёс ӧз малпалэ, со уйвӧт гинэ вал шуыса.

Анастасия Шумилова
Туспуктэмез: udmfoto.ru

Удмурт Дунне
By Удмурт Дунне Апрель 23, 2013 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<