Китайёс вузэнызы сого!

Удмурт Дунне
By Удмурт Дунне Апрель 5, 2013 15:43

Россия Дуннеысь вуз каронъя огазеськонэ пырем дырысен Удмуртиысь промышленностьлы капчи ик уг йӧты. Тужгес зол со шӧдӥське капчи промышленность вылын. Кызьы таӵе югдурын ужано? Та юанлы Александр Волков Президентэн ӵош дэмен валэктон утчаны выризы Промышленностья но энергетикая министерстволэн 2-тӥ апреле ортчем коллегияз.

Казахстан пыр Россие трос вуыны кутскиз Китайын но Вьетнамын тыпыр-тапыр вурем дӥськут. Начар улӥсьёс сое дунтэм шуыса басьто. Удмуртиын вурем дэремъёс-кофтаос таин сэрен вужере кылё. Таӵе секыт югдурын Шарканысь, Сарапулысь, Глазовысь, Можгаысь предприятиослы нимысьтыз субсидия висъяны луысалыз ке, соослы Азиысь вузъёсын нюръяськыны капчигес луысалыз. Удмуртиын вуриськон удысын ужа 3 сюрс нылкышно, вераз министр Олег Радионов.

Ма, капчи промышленностез гинэ уг ӝокато китайёс. Секыт йӧтэ «Ижнефтемаш» огазеяськонлы но. Мувӧй поттон удыслы пӧртэм арбериос лэсьтонэн вырись предприятие азьвыл йырзэ сокем уг тӥя вал — ас ужзэ нуиз, тӥрлыкъёссэс басьтӥсь котьку сюриз. Табере соос азе курон пуктӧ дундэс ӧд кулэстэ ке, китайёслэсь вуззэс басьтом. «Ижнефтемаш» ӧжытгес вуз поттыны ӧз кутскы, но барышез ичигес люкаське, шуэ предприятилэн кивалтӥсез Игорь Мочалин.

Вань предприятиос пӧлысь тужгес капчи шока, шӧдске, Ижысь радиозавод. Татысь профкомлэн кивалтӥсез Сергей Бакулев верамъя, заводын ужа ог 5 сюрс мурт. Нылпиоссэс «Радист» лагерьын воземзы понна анай-атайёс путёвкалэсь 8 процентсэ гинэ тыро, кылемзэ завод ас вылаз басьтэ. Со сяна, али предприятие пуктэ трос квартираем кык юртъёс. Со чакламын 2 сюрс ужасьлы. Одӥг квадрат метрез 35 сюрс манетэн. Завод аслаз специалистъёсызлы квартира дунэз берыктыны сётэ 5 ар. Ужасьёс кредитэ пыро ке, со пунэмлэсь ӝынызэ завод ачиз кысэ.

Зэм, сюлмаськонзэс но С. Бакулев шараяз ик: пуктӥськись коркаос вӧзы нылпи сад но усьтэмзы потэ. Документъёсъя со музъем заводлэн, но отчы кызьы ке чуртнаськыны быгатэм заправка. Интыез бушатыны косӥськомы, но бензин вузасьёс дун бадӟым пукто. Та югдурез кызьы ке берыктоно вал. Ужасьёсмылэн нылпиоссы интыяськизы ке, эшшо ӟечгес ужаломы, оскытӥз С. Бакулев.

Президент та пумысен одно малпаськом, шуиз. Промышленность умой азинскиз ке, Удмуртия но ӟеч улоз-вылоз ук. О. Радионов пусъемъя, кылем арын та удысын 121 сюрс ужасьёс поттӥзы 316 миллиард манет. Шоро-куспо уждунзы 20 сюрс манет.
2013-тӥ арын предприятиослы азинскыны республикалэн бюджетысьтыз 49 миллион манет тыр юрттэт вуоз. Туэ выль техника басьтэм огазеяськонъёс мозмытэмын луозы ваньбурлы налог тыронлэсь.

Елена Фёдорова

Удмурт Дунне
By Удмурт Дунне Апрель 5, 2013 15:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<