Калтак Колтымак

Удмурт Дунне
By Удмурт Дунне 26 апреля, 2013 16:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Калтак Колтымак

 

А. Губкинлэн но корказ ву пыриз

А. Губкинлэн но корказ ву пыриз

Тулыс тудву арлы быдэ сямен сьӧраз нуыны турттэ Балезино, Ува, Сюмси, Дэбес ёросъёсты. Зол кышкатэ со Пичи Пурга районысь Яган каргурт котырын улӥсьёсты, Ижысь «болото» нимаськись интые пуксемъёсты. Нош алигес кускозязы уязы Алнаш ёросысь Кизекгуртын улӥсьёс но.

Котькуд тулыс сямен тапалась Колтымак шур ӧрысьтыз поталля. Мыд-мыд палаз сылӥсь коркаос, бакчаос дорозь ву куддыр вуылэ, соос ярдурысен ог 50 метр кемын ке но. Но туэ кадь куалекъязы кизекгуртъёс 1979-тӥ арын гинэ. Со кыдёкысь аре лымы трос люкаськиз, тулыс ӝог вуиз, ву ӧраз нокызьы ӧз тэры. Нош туэ кӧс но кыльысалмы, выжмы йӧнала луысалыз ке, лулӟо гуртоос.

Выж тупатон пумысен татын кыкетӥ арзэ бӧрдо ни. Кылем арын вылаз пырыны воксё но алэмын вал 3 тонналэсь секыт машинаослы. Пичиосты школае нуллӥсь автобус гинэ но нылпиосты гурт пумын возьмалляз, сисьмем выж куашкалоз шуыса. Тылпу потоно ке, пожарнойёс но Кизекгуртэ шедьыны уз быгатэ. Ма, «скороед» но выж вамен потыны уз дӥсьты, ассэ утёно луоз.

Азьвыл та выж но сюрес понна кыл кутэ вал «Удмуртавтодор». Отысь кивалтӥсьёс вылазы мултэс сюлмаськон басьтэмзы потымтэен, лэся, «ныпъетсэс» куштӥзы «Молодая гвардия» хозяйство вылэ. Кизекгурт уго отчы пыре. 1990-тӥ аръёслэн кутсконазы выж быдэсак пулэсь вал. Сисьмемын. Калык понна сюлмаськыса, «Молодая гвардия» ас кужыменыз выльзэ ӝутӥз. Но быдэссэ кортлэсь но бетонлэсь гинэ кисьтыны кужымез ӧз тырмы. Озьы куать метр пасьталаё выжез юнматӥзы зӧк коръёсын. Но ваньмыз со 20 ар ӵоже зор-кот улын бумага кадь небӟиз. Ӵапак таин сэрен кылем арын котькинэ чакласькыны косэмын вал. Зэм, шумпричъёсыз легковой машинаен но вылтӥз ворттылӥзы. Трасса вылэ сотэк кызьы шедёд? Уноез гуртсылэсь палэнэ ужаны ветло. Егитъёслэн дискотекае но сюлэмзы кыске. Ярано коть, магазинзы, нылпи садзы но медпунктсы асьсэлэн. Сотэк солань-талань выж вамен ветлӥсьёс эшшо тросгес луысалзы. Кин тодэ, оло, тулысозь ӧз но чидасалыз ни со.

Визьмоосызгес гырем бусы шортӥ лёгем сюрес кузя ворттылӥзы ик. Но таид гуртлэсь ог 5 иськем палэнын. Но зор-кот дыръя отчы тракторен гинэ пырод. Соид но выёз ай.

* * *
Кышкыт югдурез валаса, «Молодая гвардиен» кивалтӥсь Михаил Крылов бызьылӥз-шедьтӥз ни вал ог 20 метръем зӧк корт гумыосты, шур дуре вуттӥз. Соостэк выжез нокызьы уд тупаты ук. Но гумыосты «ӟеч киос» лушказы, гуртоос сисьмем выженызы ик эшшо одӥг арзэ но потозы ай шуыса малпазы, вылды.

Ёрос администрациын кылем арын та пумысен огпол гинэ ӧз малпаськылэ. Но Алнаш районлэн йырыз Сергей Токарев соку вераз вал: берло аръёс ӵоже «Удмуртавтодорен ӵош ёросысьтымы 10 выжез рос-прос лэсьтӥмы, Кизекгуртысьсэ ӝутыны бюджетамы али уксёмы воксё ӧвӧл. Отысь выж уго ёрос вылэ усемын.

Но тулыс матэктэмъя ваньзы валаны кутскизы: кортнась выжез Колтымак «ньылоз». Озьы луиз ке, гурт быдэсак люкемын луоз улонлэсь: бусытӥ но, ӟеч куазен сяна, отысь уд поты. Нылпиос но дышетскыны мыныны уз быгатэ. Татын соос 15 кузя, асьсэлэн школазы ӧвӧлэн визь люканы ветло Байтэрек шор ёзо школае. Шурлэн тапалаз гурт пуме ӝутэм фермае но скал кыскисьёс нокызьы уз сюре. Нош кизекгуртъёсты туэ республикамылэн Данъян пул вылаз пыртӥзы вал ай котькуд скаллэсь 7 сюрс килограмм йӧл кыскемзы понна. Нёшто 250 йыр скалзы арам луоз ни? Со сяна, сюдоно 53 ветылэз, 40 кунянэз.

Ёрос администрация но хозяйство аслаз кужыменызы выжез кесязы. Рос-прос выж ӝутытозь, огдырлы шуыса, паськыт гумы понӥзы, вылаз векчи из, горд сюй кисьтазы. Но ӧръяськем тудву, гумые тэрытэк, ярдуръёсысь потыны кутскиз, выж нерге вылтӥ шукыяськыса ик уртчиз, коркаос дорозь вуиз. Адямиос мазэ-созэ валатэк ик кылизы. Быдэсыз сямен гурт ас кожаз кылиз.

* * *
Михаил Крылов возь-матӥз зэмос кивалтӥсь луэмзэ. Со соку ик бусыоссэ эскериз: котыр мускытэз тӧлӟе ни. Озьыен, гуртэ бусы шортӥ пырыны луоно. Озьы калыкез оскытӥз: маке кулэ луиз ке, аслэсьтыз но машиназэ сётоз. Ма, скал кыскисьёссэ шофёрез нуналаз куинь пол фермае нуллӥз. Озьыен, Данъян пулэ ӝутэм данзэс секыт югдурын но кизекгуртъёс ӧз ыштэ: пудозэс сюдӥзы но, кыскизы но. Гуртоос но кызьы ке чидазы.

— Гидам кускозь ву шуак пыриз, — тодаз вае Александр Губкин. — Курегъёсме гид сиге куяй, ошме бускельёсы доры поттӥ. Отын со кык арня ӵоже сиськиз. Ачим Галя кузпалыным ӵош мурӝолысьтымы кӧнязэ ке картошкамес поттамы, выж выламы вӧлдӥмы но куасьтӥмы. Мае ке сиыны кулэ ук. Нош кылемез мерттыны сяна уз яра ни, дыр — туннэ ву дорысьтымы кошкиз ни ке но, мурӝолын сач-сач кот на. Бакчаысьтым артанае люкам пу ву кузя кошкиз. Ярдурын йӧн-йӧн будӥсь тополез гинэ но сьӧраз нуиз со тудву.

Гуртоос кивалтӥсьёсты пышкылыны выро ик: выжез, пе, азьло ик лэсьтоно ни вал — нокин ӟургетэммес ӧз кылы. Соин таӵе кышкыт югдуре сюримы, пе. Но туннэ, ву пуксем но буйгам бере, татчы вуттэмын ни техника. Музъеме пыро ни юбоос. Тӧдь-тӧдь выль пуктылэм пиньёс кадь чиляло соос. Оскон сёто: тани-тани зэмос выжлы пӧрмом.

— Выжлэн кузьдалаез табере 48 метр луоз. Гуртэ 1 но ӝыны иськем кузьда кисьтомы на гравийлэсь сюрес. Ваньмыз со усёз 35 миллион манет тыр. Сентябрь кутсконозь вань ужъёс йылаз-пумаз вуттэмын луыны кулэ, — оскытэ Сергей Токарев.

Елена Сараматова
Туспуктӥз Владимир Беломорских

Удмурт Дунне
By Удмурт Дунне 26 апреля, 2013 16:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<