Йырез поромытӥсь сирень

Удмурт Дунне
By Удмурт Дунне Апрель 9, 2013 10:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Йырез поромытӥсь сирень

6-9-1Верос

Сӥзьыл куазь каллен ыштэ-ӵушылэ аслэсьтыз яркыт буёлъёссэ: тани ыркыт тӧл лакыр ишка писпуосысь берпуметӥ куаръёсты, зарнивуаськем куарез сапта, солань-талань ветлӥсьёслэн пыд улазы дэриен сура. Тӧл весь но весь шиетэ ӝож гурзэ. Дырын-дырын пужнэ кезьыт зор. Яркыт буёлъёс ӵушиськизы. Кылизы пурысесь, куренесь но пеймытэсь виштыос гинэ. Токма шорысь ураме потэм ик уг поты. Тужгес но ӵукнаосы — быдэс инбам пурысь пилемъёсын шобырскем дыръя.

Таӵе куазен уг поты шуныт валесысь султэм, нош уж дуре дыртоно. Соин Светлана аслыз небыт шобрет улын кема кылльыны ӧз сёты, сое зӥрак сэрпалтӥз но лёгиськиз кезьыт выж вылэ. Сюрс векчи веньёс мертчиськизы кадь пыдтышказ, кезьыт тӧл чупыштӥз пельпумъёссэ.

Автобус возьмаса сылыкуз, инмысь усьыны кутскизы векчи-векчи зор шапыкъёс. Кышномурт усьтӥз яркыт-чагыр зонтсэ. Оло, та яркыт вишты ӝутоз мылкыдэз? Света вӧзысьтыз синйылтӥз кык пияшъёсты: утюгам сьӧд штаниосын, пельпум сьӧразы ошемын рюкзакъёс. Экеос ас куспазы верасько выль компьютер шудонъёс, дышетӥсьёссы сярысь. Света валатскиз: таослы 14-15 арес сяна ӧвӧл ай. Пияшъёс воксё но воштӥськизы, соос пала нылаш лыктэм бере. Таос ӵош дышетско, луоз. Пияшъёс ог-огзэс ӧз ни кылэ кадь: сураськыса мадьыны кутскизы серемес учыръёсты. Дыды котыр улосэз улӟытӥз аслаз жингрес серекъяменыз.

Мынектӥз Светлана но. Но солэн пальпотонэз кыӵе ке но лушкем, ӝожмыт пӧрмиз. Кык пияшъёс но одӥг нылаш… Светлана тодаз вайиз, кызьы ачиз но тазьы ик возьмалляз школа пала нуись автобусэз, нош мышказ котьку но сылӥз ӵош дышетскись Юра эшез. Котькин паймылӥз эшъяськемзылы. Угось Света дышетскылӥз «витьёслы» гинэ, нош Юра «куиньчи» вал, со понна котьку но олокытчы но пыриськылӥз. Ваньмыз воштӥськиз, 8-тӥ классын дышетскыкузы. Соку классазы лыктӥз выль пияш. Сергей синйылтӥз классысь тужгес муспотон нылашез, чалмыт Светаез. Ваньзы возьмазы, кинэ Света быръёз: чупрес Юраез яке визьмо Сергеез. Нош пияшъёс туж ӝог шедьтӥзы огкыл. Соосты герӟаз одӥг яратон.

* * *
9-тӥ классын Испаниысь писательлэсь Мигель Сервантеслэсь «Дон Кихотсэ» лыдӟыса, пияшъёс асьсэдыз Светалэн рыцарьёсыз малпазы. Рыцарьёслэн яратоно сеньоритазы котькинлэсь но чебер, визьмо но кышкасьтэм. Нылаш туж яратӥз сирень сяськаосты. Соин, лэся, пиос, вазь тулысысен кутскыса, нылашлы кузьмаллязы быдэс ӟыгыртэт сирень сяськаос.

Нош берпуметӥ гырлы шуккиськыку, кык эшъёс уйзэ ортчытӥзы милициын. Сергеен Юра шонтӥллям, площаде, Правительстволэн укно улысьтыз вань сирень сяськаосты тӥяллям. Сяська керттэтъёссы чебересь пӧрмизы, коть быдэс коркадэ соосын чеберма, но Света соосты ӧз адӟы. Пияшъёсты кырмиз милиция. Мозмытӥз соосты Юралэн песятаез — Быдӟым ожысь ветеран.

* * *
Школа бере куинь эшъёс дышетсконзэс азьланьтӥзы институтъёсын. Юра мынӥз песятаезлэн сюресэзъя — юристлы дышетскыса, ужаны пыро, пе, милицие. Сергей пичи дырысен синмаськыса учкылӥз инметӥ лобась вертолётъёс шоры. Улонзэ со герӟаны малпаз инмен. Нош Света котьку но яратылӥз лыдӟиськыны, соин со бырйиз литературалы дышетӥсьлэсь ӧрзэ. Ваньмон дырзэс эшъёс озьы ик ортчытъязы куиньназы. Света берло дыре малпалляз: солэн сюлэмызлы матынгес Сергей. Юрик, ваньзэ шӧдэм кадь, ассэ мултэсэн ӧз лыдъялля, котьку но висказы чуртнаськыны дыртылӥз.

Оло, соин но Юра люказ ваньзэс «Сирень» нимо кафее. Ӧз ни чида, шонерак юаз Светалэсь:

— Бырйы ми пӧлысьтымы кудзэ ке но огзэ! Кин мултэс, со пыраклы ышоз, уз люкеты!

Света серектӥз, малпаз: со ваньмыз огшоры серекъян, шудон гинэ. Но пиос шораз учкизы тэльмырыса кадь, чалмыт витизы нылашлэсь ваземзэ. Нылаш мынектӥз:

— Мон кузьмало сюлэмме солы, кин али, сӥзьыл, ваёз мыным сирень сяська.

— Нош мукетыз весяклы палэнскоз! — чурыт йылтӥз на Юра.

Сергей шып пукиз. Света ас понназ серектӥз гинэ, угось туж умой тодӥз: солэсь куронзэ быдэстыны нокудзы уз быгатэ. Соин ӵуказе но, ӵуказе бере но соин артэ луозы кык эшъёсыз. Ӝыт ортчиз шулдыр: егитъёс эктӥзы, тодазы вайизы серемес учыръёсты, нош берло пияшъёс Светаез келязы улон интыозяз, бамаз чупыштӥзы. Соин но, лэся, нылаш воксё но вунэтӥз аслэсьтыз куронзэ.

Ӵуказеяз эшъёсыз чиптэм-чаптэм ышизы. Нылаш валаз: та егит пиос сяна, солэн умой-умой эшъёсыз но вылымтэ. Кӧтыз ӝож луиз: кызьы-озьы, огшоры серекъямлэсь гинэ соос ӝоже усизы? Озьы ке но, номыр шоры учкытэк, Света возьмаз соосты.

Экзаменъёслы дасяськон сяменыз Светалэн йырысьтыз воксё но тӧлӟиз та керетон. Но одӥг ноябрь ӝытэ Светалэн ӧсаз йыгаськись луиз. Ӧс куспы чалмыт кылдӥз Юра, со мычиз бумага бинет. Мае ке тӥямезлэсь кышкаса кадь, нылаш бинетэз кияз кутӥз, вискысьтыз синйылтӥз ненег бездыт сирень сяськаез. Быдэс гадь тыр шокчиз солэсь ческыт зынзэ. Озьы Юра вераз кема аръёс ӵоже ас пушказ нуллэм яратонэз сярысь. Нош Сергей ӧз вуы, ӧз жингырты, озьы ик ышиз. Светлана нырысь возьмаз ик эшсэ, нош берло вунэтӥз кадь, сюлмысьтыз выриз ӵушыны.

Ӝоген Светаен Юра ортчытӥзы сюан. Отчы люкаськизы анай-атайёссы но эшъёссы гинэ. Нылаш быдэс ӝыт учкылӥз ӧс шоры: оло, вуоз Сергей? Бер ӝыт егитъёс понна лэзизы сирень сяська но яратон сярысь кырӟан. Шыпыт кышномурт шуд, нылпиосын узыр юрт но лушкем яратон сярысь нёжъяз ӟазырес куара. Тодысалзы ке егитъёс, улонзы быдэсак та кырӟанлэн кылъёсыз кадь ортчоз шуыса…

Одӥг ӝытэ Юра Светалы вераз, кытысь со сӥзьыл куазен шедьтӥз сирень сяськаез. Юрттэм солы песятаезлэн лымшор палъёсын улӥсь тодмоез — садаз сяськаям сирень. Тае тодыса, Юралэн песятаез герӟаськем тодмоеныз — озьы сяська вуиз пияш кие.
Куд-ог дыръя Света тодаз вайылӥз Сергеез, но ноку ӧз жалялля Юраен герӟам улонэз сярысь. Со ассэ котьку но лыдъялляз шудо кышномуртэн.

Нош одӥг нуналэ Светалы жингыртӥсь луиз: «Юрий Васильевичлы уж дураз урод луиз. Сюлэмыз кутӥз, эмъясьёс номырин юрттыны ӧз быгатэ ни». Шулдыр куазен инмын гудыртӥз кадь, Светалэн пыд улысьтыз музъем вырӟиз. Но кышномурт кайгулы ӧз сётӥськы. Быдэс выйиз ужаз.

* * *
Таиз нунал но кутскиз огшоры. Студентъёс книга ӝажыос вискын бергазы, пенсионеръёс, арлыдоос книгаосын бугыръяськизы — тодмоесь но тодмотэм ымныръёс. Светлана гинэ кытын ке палэнын кадь. Берло дыре со ӵемгес но ӵемгес тодаз вайылӥз Сергеез но малпанэ усьылӥз: нош кызьы солэн улонэз радъяськысал, бырйысал ке со кык пиос пӧлысь Сергеез? Одӥг ӝытэ кышномурт Интернетысь шедьтӥз Сергейлэсь вотэс бамзэ, солы гожтэт келяз. Мадиз мукет кунын улӥсь нылыз, ужез сярысь… Нош пумитаз одӥг чур но ӧз басьты.

— Мае возьманэз на? Эшъяськеммы дырысен трос аръёс ортчизы ни. Ма, оло, кемалась вунэтӥз ни мон сярысь? — лулӟылӥз кышномурт.

Нош ӝытазе подъезд дораз, трос аръёс талэсь азьло кадь, сое возьмаса, сылӥз воргорон… Сергей.

— Тон кытын вал таӵе кема? — ӵоксузиз Светлана, бамъёссэ сутӥз пӧсь синкыли.

— Утчай сирень сяська… Зэм, сӥзьыл куазен шуг шедьтыны сое. Оло, та розаос умойгес, яркытгес возьматозы мынэсьтым яратонме…

Светлана шыпытак басьтӥз розаосты, кемалы долказ воргоронлэн бездыт-чагыр синъёсаз. Отысь со, книгаысь кадь, лыдӟиз яратонэн пачылмем сюлэм сярысь, ӵуказелы оскон сярысь…

Елена Вахрушева

Удмурт Дунне
By Удмурт Дунне Апрель 9, 2013 10:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<