Юалэ — валэктом

Удмурт Дунне
By Удмурт Дунне 1 апреля, 2013 14:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Юалэ — валэктом

avto

Ӵуж номеръёс 

Алигес синйылтӥ ӵуж номерен машинаосты. Куд-огезлэн со быдэсак ӵуж, нош кинлэн ке — огпал сэрегыз гинэ. Мае возьмато ӵуж номеръёс?
Владимир Иванов,
Можга ёросын улӥсь.

Юанлы валэктон сётэ Удмурт Республикая ГИБДД-ен кивалтӥсьлэн воштӥсез Алекасндр Коробейников:

— 2002-тӥ арозь ӵуж номеръёс сётӥськизы кунгож сьӧрысь ваем машинаослы гинэ. Со аре ик куд-ог воштонъёс пыртэмын вал, 1-тӥ мартысен ӵуж номеръёс сётъян ӧдъязы калыкез нуись-ваись машинаослы — автобусъёслы, маршруткаослы.
Кылем арын та удысын нош ик выльдӥськонъёс улонэ пыӵазы. Тӧдьыё-ӵуж номеро машинаос транзитной луо, азьвыл аръёсы сыӵе номеръёс бумагалэсь вал, водительёс соосты машина укно бордазы лякылӥзы. Транзит номер сётӥське 5-20 нуналлы, нош сотэк ворттылӥсьёсты штраф тырытыны яке 1-3 толэзьлы правотэк кыльтыны луэ.

Кытысь потӥз 18 лыдпус?

Куд-ог дыръя паймисько, кыӵе амалъя люкылэмын машина номеръёслэн улос пуссы. Алфавитъя учконо ке, Татарстанлэн 16 номер, нош асьмелэн — 18. Алфавитъя учконо ке, «Т» но «У» букваос куспын мукет улосъёс но луыны кулэ на кадь.
Михаил Матвеев,
Эгра ёросын улӥсь.

Номер люкон дыръя лыдэ басьтэмын улосъёслэн статуссы. Нырысетӥ номер сётэмын Россиысь республикаослы (соосты алфавитъя пуктыса), собере крайёслы, областьёслы, Москва но Санкт-Петербург городъёслы но автономной округъёслы.
Машина возисьёслэн лыдзы арысь аре йылэ. Туж трос корт вал возё Москваын улӥсьёс. Соослэн улос номерзы 77, 97, 99 вал ке, табере сюосын но кутскисез вань — 177, 197, 199. Машинаен ворттылӥсьёслэн лыдзы трос Башкортостан, Татарстан, Чувашия республикаосын, Краснодар, Приморск но мукет улосъёсын. Отын но улос номеръёссы сюосын кутско ни. Ӝоген таӵеос пӧлы Удмуртиез но пыртыны луоз.

Дас арлы огпол

Водительской удостоверение дас арлы сётӥське, сое воштыку, экзамен сётоно луоз-а? Кунгож сьӧры но ворттылэме потэ, кӧня арлы сётӥське кунгож сьӧры потан удостоверение?
Николай Касимов,
Балезино ёросын улӥсь.

Шонер, водительской удостоверение дас арлы сётӥське. Сое воштыку, нокыӵе экзаменъёс сётоно ӧвӧл. Кунгож сьӧры потан вылысь калыккуспо водительской удостоверение луыны кулэ, со сётӥське куинь арлы.

Удмурт Дунне
By Удмурт Дунне 1 апреля, 2013 14:03