Ишан

Удмурт Дунне
By Удмурт Дунне Апрель 5, 2013 10:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ишан

golubiОксиння апай — восьтэт мугоро, ӝикыт тусо мӧйы кышномурт. Со — пыдйылчи. Аслаз юртэз-семьяез ӧвӧл, тодӥсьёс верамъя — ӧй вал но… Толэзен-кыкен ӟеч адямиос дорын патерын улэ. Угось ӝыны гуртмы — солэн бӧлякысьтыз. Ми но. Кин ке дорын маке но со керттӥськылэ, мукетыз дорын дӥсь миськылэ, куинетӥяз — бакча котырын, юрт котырын, эсьма, ужъёс — дурыстэмесь. Калык сое сюдӥз, вордӥз, нош ӟечсылы со котьку но ӟечен вазиськылӥз — озьы улӥз… Ми доры но вуылӥз. Мыным туж кельшылӥз, соин артэ пуксьыса, ӝытъёсы чай юылыны. Та адями угось вашкалаез но ортчемез сярысь туж быгатыса, кыло-буро мадиськылӥз. Тодам вайисько огзэ сыӵе артэ пукеммес. Мон соку студент вал ай, Ижын дышетски, нош арня пумын, ыбем ньӧл кадь, вордскем гуртам дыртылћ — мӧзмылӥ…

— А тодскод-а, Ыславике, мае мон тыныд верало ведь али — мон ведь ишанэз но улонам адӟылӥ. Инмар понна, ява! Вот тани Микола! (кирос пуктэ)… Щас жо мон тыныд ваньзэ ик тупен-тупен но мадисько, ява… Тон тыр пеляд, сэре ини куке-соку, пурысьтано дыръяд, оло, тодад но вайылод та верамме — монэ шайвылэ нуэмзы бере… (Озьы ик со собере луиз…) Кылзы. Алиын Ижевск ниманэз ми котьку ведь азьло Завод да Завод гинэ шуылӥмы. Кытчы мынӥд? Зауодэ, Залдэ! Кытысь бертӥськод? Зауодысь, Залдысь!..

Нош та мадён югдуре мынам пинал дыръям-ай вал на… Мон но ведь куке-соку пинал но вал — ачим али уг оскиськы ини ке но солы… Война вылтӥ но солэн бервыл аръёстӥз милям калык сокем ик со Заводазы ӧз ветлылы, матын ке но — ог кызь иськем гинэ… Валъёс сокем ик но ӧз шедьылэ, нош пыдын уд латькетъя ялан, да и гуртын ужъёс но кабзэ ӧз бырылэ…

Уксёмы но ӧй вал, маке-со басьтоно ке… Ваньзэ угось асьмеос асьмелы лэсьтылӥм: дӥськут но, сиён-юон но сямен… Заводэ ини воксё ёрмыса гинэ вуылӥм… Но одно ик — трос кузяен. Ичиен яке огнын отчы ветлыны курдамы. Угось городъёс ялан мыскыл но серем карылӥзы милемды: куддыръя вузъёсмес но талаллязы, йӧл-аръян сарбаосамы сялазы, губимес-палэзьмес музэ пазязы, кут гозымес кыскаса, канжатъязы… Вӧсен исаськизы: мышь саврасой да «вотяк — г…-й башмак!» карса. Ми-то ӟучез сокем ик ӧм тодылэ ке но, ултӥямзэс ӟеч валамы… Пиосмес ведь куддыр воксё но лыз-вож кельтылӥзы отын… Егит нылъёсмылэсь одно ик выризы дэрем но выл дӥсь сќзыоссэ ӝуткалляны — серемлы… Ох, ява, сэре нош асьсэос горылӥзы… Шудо калык сямен…

Нош ми — сютэмесь, атай-агайёс фронтын быремын. Соку ведь ачиз Ысталин но вуж шинель коже гинэ ветлӥз, мискинь… Буш но кӧш улӥмы…

— А ведь мон тыныд тани торт нерге но вайи Ижкарысь, Оксиння апай, — кыл висказ пырыса, мон ӵектӥсько солы басылатыса. — Та, пе, лэсьтэмын… Тодскод-а марлэсь? Тылобурдо йӧллэсь… Нимаське «Птичье молоко».

— Фу, тьфу! Оломае но тодод ведь тонэныд, Ыславик!.. Ма, таид ческыт ик, лэся, — кышномурт пальпотэ саламме пичи гинэ куртчемез бере… — Тӥни озьы… Урод адӟонэ медам ӝиме шуыса, ми шер гинэ со Заводэ, Сенной базаре, ветлылӥм… Но сэре ми шедьтӥм ик амал. Таре ми сьӧрамы Щилькиез басьтылӥм. Щильки — со бак, кылтэм-ымтэм маке, гондыр быдӟа воргоронмы вал гуртамы. От, ява, батыр ик вал но со — дагаосты, ыльнянез сямен, куасалляз… Огназ кабын ведь со Сеннойын но вить-куать муртэ, кучапиосты сямен, бордысьтыз ури-бери пазялляз-сапкытъяз! Ачиз — бурсэ, тусыз — шимес… Кышкало вал заводъёс солэсь: «Немтой! Немтой идёт!» Отынъёс сое тодмало ни вал, соин ик Щильки дыръя милемды нокин ӧз дӥсьты ёртыны… Тӥни озьы — улӥм, Заводазы но вуылӥм ганяк… Милемдыз возьмамез понна Щилькимылы маке но со сиён сётылӥмы, со ортчыт шумпотылӥз соизлы… Ыгы-гы-гы! карылӥз. Тау, пе, ява… Милемын ведь со вож нылпи кадь лачмыт но кылзӥськись вал… Ӧз кышкатъя со милемдыз… Нош музон удмурт гуртысь, Оӵ шур сьӧрысь, Завод базаре ветлӥсьёс, ми муген-амалэн ик, сьӧразы егит сќсыр нылкышнозэс вайылӥзы. Пыдтэм макеез, пиналысен, пе, поезд улэ Балезино чугун сюрес вылын шедем… Мискинь маке… Тазэ заводъёс вегин кышно кожало вал — кышказы юриськемезлэсь… Тупатъяз ке — бырод… Ми но марлы ке оскылӥм, та адями вегин но пӧртмо шуыса… Со ноку но ӧз керттылы йыраз кышет, толалтэ но, гужем но. Кузь будэтэм ӵуж йырсизэ ӧз пунылы — ошылыса нуллӥз-ветлӥз… Тусыз чебер ке но — шимесгес ик вал милем, синъёсыз — паськытэсь, мыр-мыресь, кылъёсыз — мултэсэн визьмоесь… Солэн, пе, вань выжыысьтыз кышномуртъёс тунаськизы-пелляськизы, котыр ёросъёс ӟеч тодылӥзы мудронъёслы быгатэмзэс, шуге-леке вуэмъёсты бурмытъямзэс…

— Оксиння апай, ма, тон ведь кабзэ но уд юиськы чайдэ, — кылзэ лӥятӥсько кышномуртлэсь…

— Ма, чай уз пегӟы, дыр… Тон кылзы ишанэз, — шонске гинэ Оксиння апай. — Тӥни озьы, значица, ми нодъяським со вакытэ Завод базаре ветлыны… Пилем пис но ведь отчы нуллылӥм, турын но… Мар шедем ини: чыры-пыры копейкалы… Щильки но Ӟольгыри (озьы вазиськыло вал гуртоосыз со вегин нылкышнолы) ваньысь исась ӧз лу милемды… Ӧз дӥсьтэ заводъёс… Нош со нуналэз али кадь ведь син азям возисько… Ог сӥзьылэ, куазь урод ке но, ми, люкенак кариськыса, озьы ик со Иже вуим. Щильки но Ӟольгыри соку ик пуксизы артэ, уробо куро вылэ, ог-огзылы пальышало. Инмар обидиз ке но соосты, а ведь соос пиналэсь ай вал на… Пуко, ява, ворпо дыдыкъёс сямен но куспазы лушкем гурлало, ог-огзэс валало: базарлы пальпотон кузьмало… Нош со вие, остэ но, ява, инмын шуак но шимес гудыртӥз — ву пыдсы тюам кадь, котырак ӝом-пеймыт луиз… Нуназе куазен! Коть синмад донгы — номыр уг адскы… Но озьы кема ӧз лу… Югытскем бере ми котырак учким но ортчыт паймытским: Щильки но Ӟольгыри — ышиллям! Ӧвӧл ни соос… Кытын? Нош куазед, ява, сэре ох! но чеберскиз. Инмар кадь шулдырскиз… Шунды яркыт пиштӥз, инбам чылкытаз но лызэн ворекъяз… Нош ӧлексыосмы — ӧвӧл ни… Таре мон тыныд гинэ тазэ верало: а ведь мон соку адӟи кык тӧдьы дыдыкъёсты, базар вадесэтӥ лобась-бергасьёсты… Мон али но малпасько тазьы: Щилькилэн но Ӟольгырилэн сьӧлыктэм лулъёссы тӧдьы дыдыкъёслы озьы пӧрмизы… Ведь ас кожазы соос ӧй кошкысалзы дорысьтымы, уробоысьтызы… Ноку но… Укыр, дыр, ми акыльтӥмы соослы — дыдык тусын пегӟытскизы бере…

— Иське, тӥ Щилькитэк ик бертӥды?

— О-о. Сотэк… Ӧм шедьтэ ни сое — кема утчаса но. Сэре гинэ, кема улса — арня, толэзь оло, со вуиз гуртэ ас кожаз. Кабзэ но валантэм, кытысь… Но милемын ӧз ветлы ни со Заводэ, ӝотрак пумит кариськылӥз, вожез но потылӥз… Со Ӟольгыри шуонзэс но ми ӧм адӟылэ ни… Шуылӥзы сэре: нылпиез, пе, солэн кылдэм… Туж умой, мусо маке… Но алдаме уг поты — ӧй адӟылы ачим…

— Нош Заводэ ӧд дугдэ ук ветлэмысь? — выжыятэм потэ мынам.

— Конешно, ӧм. Кытчы пырод? Ветлӥм. Шергес ке но. Сэре ведь вакытъёс но воштӥськизы. Милям калык но нодлыкогес луиз, заводъёс но лапказы… Но мон тани алигес удмурт радиоысь мае кылӥ ведь: удмуртъёс, пе, возьдасько городын ас кылынызы вераськыны… Эк, пӧй, пие, пие… Кинэз, пе, возьдаськоз ас кылызлэсь? Возьдаськон да стеснячкон со ӧвӧл, со — кӧберан но курдан, кудъёсыз ини асьме вире виымозь пыӵатэмын… Улон сыӵе бере… Я, вай на ай со марымдэ, «тютю йӧлдэ». Сиё на пичияк юдэс. Ческыт ик пыжиллям ведь тайдэ завод албастыос… Огез сярысь, Ыславике, али но малпасько: ведь котькуд ишан кылдэ урод адӟон азьын… Со учыр бере ар ортчыса, ми ивор басьтӥмы — карт луонэ мынам Дальнёй Востокын, каторгаын кулэм. Отчы сое месӥллям вылэм войнаын пленэ шедемез понна… Нош куддыр тазьы но малпасько: оло-а, пӧй, та вань улонэлы сыӵе ишан возьматскылӥз мыным… Инмар уз кушты шуэмлы…

…Гуртмы умме усе ини. Инмын кизилиос, буре ваён сюсьтылъёс сямен, лыдъяны луонтэм, югыт ӝуатскыло. Огез, кыкез, куиньметӥез, сюэз но кык сюэз… Таӵе дыре улэп лулъёс, уйлы дасяськыса, тодэ ваён синву шурын гылтӥськыло, ӵуказелы дасяськыло — эркын но чылкыт сайканлы.

Вячеслав Ар-Серги

Туспуктэмез: www.google.ru

Удмурт Дунне
By Удмурт Дунне Апрель 5, 2013 10:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<