Эн шуд, арган

Удмурт Дунне
By Удмурт Дунне Апрель 9, 2013 10:40

Вакчи верос

Ивановнаез Лёнид эмеспиез яратӥз мемизэ кадь. Ма, Ивановна но «пие, пие» гинэ шуылӥз. Катяелы мужикен удалтӥз, малпалляз. Лёнид выль мунчо пуктӥз — сандык кадь ӝикыт. Петя но Оля нунокъёсыз пересь понна самой дуноесь луизы. Инмар бӧрдоз, кожаз, люкиськемзы сярысь тодыса. Нылзэ урод карылӥӟ культпросветучилищеын дышетскыкуз, тамакен но сурен тодматскем уга. Валамон, кытын юон, отын даллашон, калгон но мукет уродэз.

Лёнидэз Катя «кизер кыед поттӥсь» шуыса тышкаськылӥз. Кырмиськиз, пе, фермаез борды, фирмаын ужам интые. Тани Володь кык лавка усьтӥз ни, коньдон пӧлын пылаське. Нош Лёнид… Серем вераны уждунэз сярысь. Володен тодматскыса, чайылэсь шубаен ветлӥсько, зарезь палан шутэтским ни. Лёнид нокытчы уз пыры. Калго но семьяям берытско. Чик возьдаськытэк, тазьы меӵкытъялляз нылыз мумизлы.

Ивановналы гуртоос азьын возьыт. Татын Ижкар ӧвӧл — ваньмыз син азьын. Лёнид туж жаль. Пизэ нылыныз бӧрдыса пуння: туж, пе, яратӥсько ук, кызьы мон соостэк улом. Петяез но Оляез Ивановна ӟыгыртэ но бӧрдэ: мумызы-бубызы ванен сиротаос будо ук. Катялэн сюлэмыз из, лэся, пигонэз но уг вырӟы. Володен пыро но полторашка сурез бушато. Уйин койка ӟукыртэ. Ивановна нылзэ кекатыны дась. Малпа: воксё юскиськиз, мон но янгыш, дыр, нунокъёссэ ӟыгыртэ, шобретэн пытсаське но кӧлэм каре.

Пилиськем тусьтыез лякод на меда. Туж шумпотӥз Ивановна, Лёнидэн Катя ӵош кариськизы шуыса. Черке но ветлӥллям. «Инмарлы тау, Инмарлы тау», — вӧсяськиз пересь. Лёнид Ижкарын шофёрын ужа. Вуж «Жигулиез» ӵыж-выль тупатъям, табере Катязэ но пиналъёссэ ворттылытэ. Но кырыжам бодыез уд шонерты вылэм. Катя нош Володен калгыны кутскем. Лёнид корка пыре — соос мусоясько. Кыкназэсты лыз-вож карем, «Жигулияз» пуксьыса, шузимем кадь ширтэм.

Сое, кык нунал ортчыса, шедьтӥзы. Гаражаз машинаын пуке улэп кадь. «Жигулиез» каллен ургетэ, газъёсыз пушказ пыртэмын. Озьы Лёнид ассэ ӝокатэм. Ивановна милицаослы ӧз оскы. Эмеспиез нылпиоссэ ноку но огназэс ӧй кельтысал. Гуртоос шыпыртылӥзы: сое, пе, Володьлэн эшъёсыз быдтӥзы. Адӟисьёс ӧй вал бере, ма карод. Адӟысалзы ке но, ымазы ву ӟузем кадь улысалзы — сыӵе луиз улон! Ивановналы возьматӥзы Лёнидэн кельтэм гожтэтэӟ «Катя, тон адями ӧвӧл, но мон тонэ яратӥсько. Дуно пиналъёсы…» Ассэ быдтон азяз, пе, озьы гожтэм. Уг оскы Ивановна нокинлы но.

Бӧрдэм каре Катя. Кырыжак учкыло гуртоос калгись шоры. Лёнидлэн Коля эшез арганэн шудэ. Шулдыресь крезьгуръёс кисьтӥсько. «Шулдырзэ шудыны Лёнид косӥз вал», — ассэ шонере кадь поттыны турттэ арганчи. Нырысетӥ лымы пырыос поръяло кезьыт омырын. Дэриен сурасько, чиптэм-чаптэм ышо-быро. Эн шуд, арган.

Сергей Широбоков

Удмурт Дунне
By Удмурт Дунне Апрель 9, 2013 10:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<