Эмъясь ашапартман

Удмурт Дунне
By Удмурт Дунне 26 апреля, 2013 12:55

Ӵужатае Гайнанша котьку но ӟеч мылкыдо, лякыт сямо вал, ӵемысь тумошо учыръёсы сюрылӥз. Одӥгез сыӵе учыр сярысь мадиз анае.

1950-тӥ аръёсы, котькытын сямен ик, Башкортостанысь Вуколуд гуртын улон секыт вал. Ож пыр потэм пиосмуртлэн самой бадӟым сюлмаськонэз — нылпиосты сюдон. Огпол уж бере, ӝытлы пумит, гуртысьтызы ик Садрислам воргоронэн пызь басьтыны пыдын кошкиллям Чернушкае. Ямаш ӟуч гуртэ вуыса, пеймытаны кутскем. Мар кароно?

Гуртэтӥ ортчон сямен кылӥллям: бай улӥсь ӟучлэн нылыз, пе, висе. Садрислам бабай ӵужатаеным кенешиллям, туно-пеллё кариськыса, доразы пырыны. Вуиллям но адӟо: ныл тани-тани кулоз. Удмуртъёс ӟучъёсты оскытӥллям, нылзэс эмъяны быгатозы шуыса. Ӵужатае шоры учкыса, Садрислам бабай пелляськыны кутскем:

— Тынад серемед потоз, серемед ке потӥз, педло пот, серемед ке потӥз, педло пот. Валэд кыткем, шаед гудӟем, нуса кельто мон тонэ.

Та кылъёсты со кык пол верам. Ӵужатае серемзэ кутыны вормымтэ ни, педло потэм. Туночиосты сюдӥллям, изьыны выдтӥллям. Ӵукна вазь султыса, соос нош сюрессэс азьланьтӥллям. Чернушкаын воргоронъёслы удалтэм: быдэн пуд пызь басьтӥллям.

Бертон сюрессы нош ик Ямашетӥ ортче. Гурт калык сабантуй мында люкаськыса, пе, возьма таосыз. Висись ныл пыд йылаз султэм. Атаез, тау карыса, туно-пеллёослы быдэн сукыри нянь сётэм. Ну, шумпото, пе, Садрисламен Гайнанша, тунаськемзы иназ луэм шуыса.

Малпаськоды, висись ныллы «пелляськон» кылъёс юрттӥзы? Адямилы ӟеч кыл, бурмонэзлы оскон кулэ, сотэк нокыӵе эмъюм но, пӧечи туночиос но уз юрттэлэ. Тани мынам ӵужае пелляськись вал. Со улэп дыръя вукогуртъёс больницалэсь кытынзэ но ӧз тодылэ. Мон солэсь пельтон кылъёссэ быдэс тетрадь гожтыса кельтӥ.

Али, арлыдо луэмъя, со кылъёсты тодмоосы вылын эскерисько. Самой золэз амал — висёнлы кокыш (кукиш) возьматон но «кокыш тыныд» шуыса эмъян. Висён кытчы пырыны но уг тоды ни, чиптэм-чаптэм ыше. Анайме но валля арын бурмытӥ. Киы, пе, туж висе. Ойдо, шуисько, пуксьы, массаж лэсьто. Нырысь чечыен кыскай кизэ, собере пелляськыны кутски: «Нунал бертэм, уй бертэм, шунды бертэм, толэзь бертэм, бертса пыласькыса мед кошкоз, мынам кылъёсы ӧвӧл та, ашапартманлэн (тазэ кылэз ачим но уг валаськы, ойдо, кыл бордын ужпум ӧвӧл) кылыз, эмез-юмез та мед луоз, мед быроз-кошкоз» шуи но будто ке выж вылэ сали висёнзэ. Киыз мотор кадь мед ужалоз шуыса, мазен зырай на. Иназ мынӥз ведь, висемез пумысен али шып улэ.

Анна Байдуллина

Удмурт Дунне
By Удмурт Дунне 26 апреля, 2013 12:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<