Ӟеч сиёнлэсь уд ымы

Удмурт Дунне
By Удмурт Дунне 26 апреля, 2013 14:33

Ӟеч сиёнлэсь уд ымы

 

М. Григорьев

М. Григорьев

«Можгасыр» — Удмуртиын огез азьмынӥсь предприятие, нош чурыт сыр поттонъя Россиын тужгес бадӟымез. Можгаослэн йӧл сиёнъёссылы котькытын вылӥ дунъет сёто, зарни, азвесь медальёсын но дипломъёсын пусъё, чурыт сырзы луиз ни элькунлэн брендэз. Предприятилэн кылдэмез дырысен туэ 80 ар тырме. Берло дас арзэ соин быгатыса но валаса кивалтэ удмурт воргорон Михаил Григорьев.

— Михаил Алексеевич, котькуд предприятилэн, адямилэн сямен ик, вань вордӥськем нуналыз.

— Озьы. Предприятие кылдэмын 1933-тӥ арын. Кутсконэз капчи ӧй вал. Нырысь татын вӧй гинэ поттӥзы. Ваньзэ сямен ужъёсты киын быдэсъязы, цехъёсын ужазы киын бергатон сепараторъёс. Нырысетӥез директор вал Иванов (нимыз тодмо ӧвӧл). Со вакытэ котькуд колхозын йӧл бичан интыос усьтэмын вал. Отысь нуналлы быдэ заводэ йӧлвыл нуллӥзы но йӧгуын возизы. 1936-тӥ арын йӧл завод кыклы люкиськиз: кылдӥзы вӧй база но вӧй завод. Берлоез выль интыын усьтӥз сепаратор цех. Собере ужаны ӧдъязы вӧй, творог, сыворотка, мороженой поттон цехъёс. Пуктэмын контора, вуттэмын лаборатория, столярной цех, вал гид но 500 тонна йӧ возён гу. Со холодильник интыын вал, отын возизы йӧл но музон сиёнъёсты.

Война вакытэ нимаз разнарядкая завод йӧл сиёнъёс келялляз солдатъёслы, ож тӥрлык поттӥсьёслы, госпитальёсы, Можга городысь больницаосы но нылпи учреждениосы. Коллектив шутэтскон нуналъёстэк но отпуске потатэк тыршиз. Толалтэ ичигес йӧл вуэмен, картофка куасьтӥзы. Со ожгарчиослы мынӥз.

1954-тӥ арын директоре юнматӥзы задор мылкыдо Александр Павлович Спиридоновез. Со арын ик вань цехъёсты ӟеч-ӟеч тупатъязы но электрокужым сётӥсь локомобиль пуктӥзы. Цехъёсы вуизы электромоторъёс, быризы керосин лампаос.
Берлогес, 1957-тӥ арын 1-тӥ январе, Можгаысь вӧй завод борды юнматӥзы Пыџасысь но Учаысь маслозаводъёсты. Нош 1960-тӥ аръёслэн кутсконазы Можгалы сёто на Алнаш но Кизнер маслозаводъёсты. Озьы со пӧрме валтӥсь маслосырзаводлы. Та вакытэ предприятиын пуктӥзы котельной но компрессор. Берлоез — заводлэн сюлмыз. Партэк но кезьыттэк ӟеч йӧл сиёнъёс уд потты. Озьы магазинъёсы вуизы Можгаын поттэм ческыт йӧл, творог, сыр, йӧлвыл, мороженой но мукетыз.
1970-тӥ аръёслэн кутсконазы маслосырзавод пыриськиз Москваын ортчем смотре. Удмуртиысь вӧй вылӥ дунъет басьтӥз.

— Заводлы азинскыны инъет кылдытэ ӟеч тӥрлык.

— 1973-тӥ аръёсы кунгож сьӧрысь ӟеч оборудование вуыны кутскиз. Соку предприятиен кивалтӥз Людмила Георгиевна Денисова. Собере производствоез выльдонлы трос кужымзэ сётӥз директор Лазарь Емельянович Федосеев. Озьы сырлэн ӟечлыкез уката будӥз. 1980-тӥ аръёсы сыр поттон оборудованиез нош ик выльдӥзы.

1994-тӥ-2004-тӥ аръёсы заводэн кивалтӥз Сергей Николаевич Абрамов. Собере заводэз оскизы мыным. Сыр поттонэз эшшо выльдӥм, туала куронъёслы тупась карим. Та уже ичизэ 150 миллион манет уксё висъямы но, завод араз 9 сюрс тонна сыр поттыны кутскиз. Со понна «Тетра-Пак» фирмалэсь оборудованизэ лизинг амалэн басьтӥм. Озьы сырлэн но йӧл сиёнъёслэн ӟечлыксы уката ӝутскиз.
Алнаш, Кизнер но Грак ёросъёсысь йӧл кутон пунктъёсмес выльдӥм. Али предприятиын технологиен герӟаськем ужъёсты автоматъёс быдэсъяло. Кылсярысь, сыр пӧзьтонэз чакла компьютер, прессовать каре Франциысь вуттэм оборудование. Ваньмыз со луонлык сётэ уно пумо чурыт, ӵыжтэм сыръёс но мукет йӧл сиёнъёс поттыны.

Сыр поттӥсьёс М. Евстафьева но О. Тимофеева

Сыр поттӥсьёс М. Евстафьева но О. Тимофеева

— Михаил Алексеевич, туннэ «Можгасыр» огазеяськон кыӵе сиён лэсьтэ?

— Али ми 10 пумо чурыт, 5 пумо ӵыжтэм сыр, вӧй, 30 пумо йӧл сиёнъёс но мукетсэ поттӥськом. Ваньмыз со калыклы кельше. Тани «Удмуртиысь ӟеч сиёнъёс» конкурсын кык номинациын («Басьяськись быръе» но «Калыклы сиён») вормисе потӥм. Зарни медаль сётӥзы Удмуртиын поттэм вузъёслы сӥзем адӟытонын. «Россиысь 100 ӟеч вузъёс» конкурсын лауреатъёс луим. Оглом вераса, берло 9 ар ӵоже Россиысь но дуннеысь адӟытонъёсын но конкурсъёсын «Можгасыр» 13 пол пусйылэмын, дипломант лыдъямын. Тани миым Екатеринбургын ортчем адӟытонын зарни медаль сётэмын «Юбилейный» но «Российский» сыръёслы, азвесь — «Можгинский отборный» но туй — «Голландский» но «Гауда премиум» сыръёслы. 2009-тӥ арын Адлерын ортчиз йӧл сиёнъёсъя Россиысь конкурс. Отчы нуллӥм 5 пумо сырмес, ваньмызлы зарни медаль сётӥзы.

Вормонъёс люконтэм герӟаськемын выль амалъёсты но технологиосты кутонэн. Кылсярысь, 2011-тӥ арын микробиологияя лаборатория лэсьтӥм но лицензия басьтћм. Нош миым сыворотка поттыны кутским. Со узыр протеинэн, отын нокыӵе химия ватсэтъёсыз ӧвӧл. Калыклы озьы ик кельшо «Ананас», «Абрикос» но «Персик» сыворотка юонъёс, тужгес но гужем. Туж умой мынэ окрошка лэсьтыны. Нош сырлэн ӟечлыкез но пайдаез сярысь веранэз ик ӧвӧл. Та йӧл сиёнъёс юртто тазалыкез юнматыны. Юнме шат басьяськисьёс магазинъёсысь ӵем куро Можгаын поттэм сыр-йӧлэз. Со милесьтым данмес ӝутэ. Быдэс коллектив вис карытэк трос сюлмаське йӧл сиёнъёслэсь ӟечлыксэс ӝутон сярысь. Сыӵе мылкыдын тыршо технологъёс, мастеръёс, лаборантъёс, сыр но йӧл сиён поттӥсьёс. Котькуд цехын вань ёзъёсын технология ласянь куронъёсты ӟеч быдэсъяло. Дас ар пала ужаськом ни бактофугаен. Со кулэтэм микробъёсты быдтэ, тазалыкез юнматӥсьёссэ гинэ кельтэ. Озьы ик туж зол чылкытатӥськом вуэз, нокыӵе химия ватсэтъёсын ум выриське. Соин ик сиёнъёсмы ческытэсь пӧрмо. Басьяськисьёслы со ик кулэ.

Туннэ лэсьтэмезлы шумпотыса но данъяськыса, азьланезлы уката ӟеч малпанъёсын улӥськом. Сыӵе мылкыд сётэ предприятилэн бадӟым юбилеез но.

Геннадий Романов

Удмурт Дунне
By Удмурт Дунне 26 апреля, 2013 14:33