Дышето, кырӟало, книга потто

Удмурт Дунне
By Удмурт Дунне 16 апреля, 2013 10:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дышето, кырӟало, книга потто

Л. Фёдорова

Л. Фёдорова

Таяз удмуртарняе, 19-тӥ оштолэзе, шаерысьтымы усто, визьмо, адӟем карымон нылкышноослы сётэмын луоз Ашальчи Оки нимо Национальной премия.

Нырысь таӵе премиен одӥг муртэ гинэ пусъё вал, берло аръёссэ кык нылкышноез данъяллязы. Нош туэ, Ашальчи Окилэн 115 аресъем юбилееныз валче, «Удмурт Кенеш» сӥлы кароз куинь кышномуртэ. Шудоос пӧлын: Удмурт кун университетысь визьнодась, педагогика наукаосъя кандидат Любовь Фёдорова, Дэбесысь удмурт кылъя но литературая дышетӥсь Галина Образцова но Якшур-Бӧдья ёросысь Якшур гуртысь шаерчи, Удмуртиысь культура удысысь дано ужась Валентина Широбокова.

Любовь Фёдорова — педагогика наукаосъя кандидат, фин-угор тодосчиослэн калыккуспо конгрессъёсазы мыло-кыдо пыриськылэ. 20 арлэсь кема ини Удмурт кун университетын студентъёсты визьнода, 11 ар удмурт филологияя факультетлэн деканэз вал. Солэсь ужзэ азьланьтэ вылез декан Наталья Кондратьева. Наталья Владимировна шуэ: «Любовь Петровна туж визьмо дышетћсь, зэмос специалист. Со наукалэсь но дышетон удыслэсь азинсконзэ но воштӥськонъёссэ эскерыны, дунъяны но валаса ужаз кутыны быгатӥсь адями. Ас азяз бадӟымесь куронъёс пуктэ но быдэстэ, мукетъёсызлэсь но сое ик возьма. Любовь Петровна кивалтон аръёсы ик удмурт филологияя факультет уката но ӝутскиз».

Со пыр-поч эскериз удмурт нылкышно кылбурчиослэсь творчествозэс но 2007-тӥ арын поттӥз «Удмуртская женская лирика» монографизэ. Любовь Фёдорова 90-лэсь уно наукая статьяослэн но дышетон пособиослэн авторзы.

Валентина Широбокова — Якшур-Бӧдья ёросысь но шаерысьтымы тодмо дышетӥсь, шаерчи, крезьгурчи. Солэн пичи дырысеныз дышетӥсь луэмез потэ вал. Соин ик нырысь йылпумъяз педучилищеез, собере — Удмурт пединститутэз, тодон-валанзэ будэтӥз на Москваын, луиз логопед но 32 ар тыршиз та удысын. Валентина Широбокова «Дышетон удысысь отличник» нимен данъямын.

Та кышномурт, бадњым мылкыдзэ сётыса, ужа «Удмурт Кенешлэн» Бќдьялась ёзаз. Удмурт гуръёслы, культуралы синмаськыса ик, кылдытӥз «Ялыке» ансамль, 12 ар соин кивалтӥз, ачиз но кырӟанъёс гожъяны кутскиз. Али удмурт «Ялыке» но ӟуч «Любавушка» ансамбльёс мыло-кыдо быдэсъяло Валентина Николаевналэсь кырӟанъёссэ.

2007-тӥ арын Валентина Широбокова кылдытӥз арлыдоослы «Кубо» огазеяськон. Ёрос музее люкаськыса, соос удмурт сям-йылолъёсты, кырӟан-веранъёсты люкаллязы, сценкаос дасяллязы. Нош творчествоен тунсыкъяськисьёсты, кылбураны, крезьгураны яратӥсьёсты Валентина Николаевна огазеяз «Ошмес син» группае. Валентина Широбокова уно аръёс ӵоже эскериз вордскем Якшур гуртэзлэсь историзэ, вуылӥз Ижысь но Кировысь архивъёсы. Дас арлэсь кема люкам материалъёсын ас коньдонэныз «Якшур — это речка в сосновом бору» книгазэ поттӥз.

Галина Образцова — Дэбес черкогуртысь дышетӥсь. Йылпумъямын Удмурт кун университетысь филологияя факультетэз. Ужамын њатча, Алнаш но Дэбес шор ёзо школаосын. Галина Азарьевна пиналъёслы дышетон программаос гожъя. Кылсярысь, со 5-тӥ-6-тӥ классъёсысь нылпиослы «Удмурт калыклэн культураезлэн историез» но «Удмурт кыл ӟучомем пиналъёслы» программаослэн авторзы, «Анай кыл» но «Удмурт кыл» учебникъёслэн рецензентсы. 2011-тӥ арын Галина Образцова «Россиысь дышетон удысысь отличник» нимын данъямын. Та адямитэк син шоры пуктыны уг луы ёросысь «Удмурт Кенешлэсь» ужзэ но. Галина Азарьевна — кырӟаны-вераны мыло-кыдо адями. Дэбесысь «Ӟардон» ансамбле ветлэ, калыкез шулдыртэ аслаз гуръёсыныз но. Галина Образцовалэн «Тонэныд улонэ герӟамын» кырӟанъёсын сборникез потэмын.

Галина Семёнова

Удмурт Дунне
By Удмурт Дунне 16 апреля, 2013 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<