Дасез дунтэмгес усёз

Удмурт Дунне
By Удмурт Дунне 9 апреля, 2013 14:00

Удмуртиысь трос нылпиё семьяослы улон инты басьтыны льготаос сётозы. Туннэ нуналлы сыӵе семьяослы дунтэк музъем висъяны быгато, но ӵемысь отын ву но, шуныт но кыскемын уг луы. Со сяна, котькуд семьялэн корка пуктымон коньдонэз ӧвӧл.

Удмуртилэн Азьмуртэз Александр Волков эскерыны косӥз сыӵе учыръёсты но, куке улон интылы кулэяськись трос нылпиё семья ачиз быръёз, кулэ-а солы корка пуктыны музъем яке пыриськоз льготаосын лэсьтӥськонъя программае. Кыкетӥзэ бырйиз ке, солэн льготаосын кредит (арлы 5%) басьтэмез луоз но котькуд куинетӥ, ньылетӥ, витетӥ нылпи понна семьялы сётӥськоз 300 сюрс манет кредитэз ворсан понна. Со сяна, улон инты басьтыны луоз Россиысь Улосъёсты азинтонъя министерствоен чаклам дунъёсъя (30,5 сюрс манет квадрат метр понна).

Азьмурт вера: «Малпасько, трос нылпиё семьяос таӵе амалэн улон инты капчиенгес басьтозы. Ас кужмын корка пуктыны секытгес но, дуногес но усе. Кредит но квартира сётыку, корка ву, шуныт пыртонэз ми быдэсак асьме вылэ басьтом, семья со понна уксё уз тыры».

Удмурт Дунне
By Удмурт Дунне 9 апреля, 2013 14:00