Чын алнаш

Удмурт Дунне
By Удмурт Дунне 12 апреля, 2013 15:32

Чын алнаш

Усоысь устокайёс

Усоысь устокайёс

Алнаш черкогуртэ ёросысь егитъёс «Этноӵук» фестивале люкаськылӥзы. Киуж, кылбуран, эктон, кырӟан, сям-йылолъёс но этномода номинациосын быгатонлыкъёссэс усьтӥзы.

Радъясьёс, культура юртын ужасьёс но «Шунды» огазеяськонлэн Алнаш ёросысь азьветлӥсез Татьяна Антонова, пусйизы: фестивале пыриськисьёслы одно ик кулэ вал этно шӧм пыртыны, вашкалазэ туалаен сураны, дышемзэ выльдыны. Озьы ке но «инновация» ӧзгес пӧрмы — алнашъёс дышем сямъя куаш-куаш удмурт луэмзэс возьматӥзы. Та ласянь висъяськиз этномода ӧр гинэ.

Ужрадэз шаплы нуизы Кирилл Кириллов, Виктория Захарова, Марина Пахомова но Андрей Никонов. Таӵе сэзь но усто нуисьёсты шоркарын но уд пумита! Паймымон адскиз азьло дауръёсысь дӥсьёсын тодматӥсь мода театр — та удысэз ёросын мыло-кыдо нуэ вылӥ категориен дышетӥсь Анатолий Захаров. Залэз серектытӥзы Тылоысь рэперъёс — пияшъёс арган гур улсын такмакъёс «лыдӟизы». Алнаш школаысь «Вита» ансамбль тодэ вайытӥз «Малпан» группаез. Котнырысь дыдыослэн дуэтсы син азе яркыт пуктӥз удмурт дэремлэсь лымшорпал вурон йылолзэ: яркыт чагыр-лемлет дэремъёс чын алнаш адско. Бадӟым классын дышетскисьёс синмаськизы Грак ёросысь куноослы, уго соосын ӵош вуиз Пуклё гуртысь задор кырӟась, ӝужась кизили Владимир Окунев. Тужгес но усто адскизы Асангуртысь нылпиос — соос вашкала сямъя тямысэн эктон тапыртӥзы, дэремъёссы но эсэпсэ валаса вуремын, чеберъямын. Ӟатча нылъёс Аня Шорникова но Настя Дядькина быдэстӥзы Чушъялова сузэръёслэсь «Яратӥсько тонэ» тодмо кырӟанзэс. Усоос крезьгур инструментъёсын квартет кылдытӥллям. «Шундыысь» егитъёс Уллапала Бой кырӟасьлэн «Паримон» гурез улсын эктӥзы: тыбыразы «Кин мон?» юанэн кагаз ошемын, нош гадязы — «Мон удмурт!» валэктон. Вуж Утчанысь нылъёс куатен эктонэз бергазы.

Ваньзэ вераса уд быдты — сокем турлы тусо ужрад пӧрмиз! Егитъёслэн «Дарт» газетэнызы но тодматскыны луонлык сюриз. Пиналъёс татын шаплыесь, ваньмыныз тунсыкъясько, мыло-кыдо лыдӟисько. Шӧдӥське, уг на тырмо тодон бичаны юрттӥсь мастер-классъёс, семинаръёс: кызьы нуллоно удмурт дэремез, кызьы ветлоно, мода возьматыку…

«Сям-йылол» номинациын вормиз Асанысь «Жин-жин» коллектив. Кылбур лыдӟисьёс пӧлын анайлы сӥзем чуръёсыныз тужгес но сюлэмез бугыртӥз Анна Бурдина. Кырӟасьёс пӧлын устоез луиз Тылоысь Юлия Лебедева. Этномодаын шумпоттӥзы Писэйгуртысь «Бурдо-бурдо» этнофутуристъёслэн, њатчалась устокайёслэн, Алнашысь нылпи юртысь кибашлыослэн коллекциоссы. Вормизы Алнашысь искусствоосъя школаысь пиналъёс «Ой, тӥ, чебер нылъёс» кырӟанъя шоуэнызы. Соослэн дэремъёссы удмурт воршуд нимъёсъя малпамын вал.

Егитъёслы ужрад сокем кельшиз, «Дарт» газетэн ӵош ӝоген њатчалан таӵе ик этноӵук яке этноӝыт ортчытон пумысен вераськизы. Отын одно ик позыръяськон но луоз.

Дарали Лели

Удмурт Дунне
By Удмурт Дунне 12 апреля, 2013 15:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<