«Айшетэз» воштоз «Пумиськон»

Удмурт Дунне
By Удмурт Дунне 19 апреля, 2013 14:20

«Айшетэз»  воштоз «Пумиськон»

Библиотекаын ужасьёс А. Корнилова но О. Яковлева

Библиотекаын ужасьёс А. Корнилова но О. Яковлева

Пичи Пурга ёросысь Эдэйгуртысь библиотекаын ужасьёс тэк пуконэз уг тодо. Лыдӟиськисьёслэсь лыдзэс будэтон вылысь пӧртэм ужрадъёс ортчытъяло. Кылсярысь, апрель толэзьзы сӥземын Ашальчи Окилэн вордскем дырысеныз 115 ар тырмонэзлы.

Эдэйгуртысь библиотекаын Ольга Яковлева но Алевтина Корнилова 11 часысен 19 часозь ужало. Берозь ӝуась тылъёсты адӟыса, ужысь бертӥсь гурт калык доразы коже.

— Пырись-потӥсьлэсь мылкыдзэ кызьы ке бурдъяны тыршоно, — вера библиотекаен кивалтӥсь Ольга Яковлева. — Арлыдоос понна «Сельчанка», егитъёсызгес понна «Бобьинцы» клубъёс ужало. Компьютеръёс кылдэмен, пиналъёс но дорамы тросгес пыраны кутскизы. Соос понна «Комп и мы» клуб кылдытӥмы. Шудонъёсын гинэ медаз тунсыкъяське, дышетсконазы, улоназы маке пайдаёзэ но басьтыны мед быгатозы.

Библиотекаын ужасьёс уг вато: книга лыдӟыны мылкыд карисьёслэн лыдзы арысь аре кулэсме. Арлыдоосгес ярато вашкала книгаосты, 30-40 аресъемъёс — пӧртэм премиосын пусъем авторъёслэсь книгаоссэс, нылкышноос — удмурт авторъёслэсь. Асьсэ малпанъёссэс шара вераны дћсьтӥсьёсыз но вань.

— Книгаос тырмыт, шуиськомы ке но, удмурт авторъёслэн выль ужъёссы ми дорозь уггес вуо, — веранзэ азьланьтэ Ольга Алексеевна. — Вазенгес гуртамы удмурт кылбурчи Владимир Котков пыраз вал, аслэсьтыз книгазэ ӧз шедьты. Со дырысен трос аръёс ортчизы ни, книгаез туннэ но ӧвӧл библиотекаямы.

Лыдӟиськон юртэ «Маяк», «Ӟечбур!», «Удмурт дунне» газетъёс вуо. Берлоез газет эдэйгуртъёс доры ёрос библиотека пыр лыктэ. Котыръяськонъяз гуртоос доры ӝегаса вуэ. Югдурысь потон амал шедьтӥллям гурт библиотекаын ужасьёс: соос дорысьтызы газетсэс нулло. Ольга Яковлева но Алевтина Корнилова сьӧр гуртъёсын улӥсьёс сярысь но уг вунэто. Толэзьлы быдэ кадь Тылое, Поӵыше вуылыны тыршо, палэнэ уг кельто пичи Зури Пушкин но Зури гуртъёсты. Таосыз доры Эдэйгуртысь библиотекаын ужасьёс котомкаен книга-журналъёс нулло, фермаын ужасьёсын пумиськыло.

Библиотекаын пукон ӝытъёс ортчыло. Та нуналъёсы гинэ йылпумъяськиз «Вуюись ворпо айшет» адӟытонзы. Эдэйгуртъёс доры куное вуылӥзы шаерысьтымы Суредан искусствоосъя музейысь реставратор Татьяна Москвина, «Удмурт Кенеш» огазеяськонлэн Пичи Пурга ёросысь ёзэныз кивалтӥсь Василий Москвин. Люкаськемъёслы капчи мылкыд кузьмаз та гуртысь ик «Арганчи» ансамблез кылдытӥсь Екатерина Антонова. Ужрадэ мыло-кыдо пыриськизы гуртоос. Эсьмаса, та адӟытонэ поттэмын вал дауръем айшетъёс но.

Одӥгез ужрадзы йылпумъяськиз гинэ, мукет уж борды ӝабырскизы. Та вакытэ «Пумиськонлы» дасясько, сое 115 лыдпусэн герӟаны медо. Ӵапак сомында арес тырмысал январь толэзе Кузебай Гердлы, нош апреле — Ашальчи Окилы.

Валентина Емельянова

Удмурт Дунне
By Удмурт Дунне 19 апреля, 2013 14:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<