Адскисьтэм тушмонэн — ваче син

Удмурт Дунне
By Удмурт Дунне 26 апреля, 2013 15:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Адскисьтэм тушмонэн — ваче син

CHernobylКиясаын вордскем Любовь Павловна Новосёлова, 1981-тӥ арын Пермьысь технологияя техникумез йылпумъяса, Припяте ужаны шедиз. Отчы шумпотыса мынӥз: огаз училищеын апаез дышетэ вал. Авария нуналозь Люба ужаз Чернобыльысь атом электростанцилы выль корпусъёс лэсьтонъя управлениын. 1986-тӥ арын 26-тӥ оштолэзе потон уез али но шуэрскем ымнырын тодаз вае:

— Уй смена соку 5-тӥ но 6-тӥ блокъёсты ӝутэ вал. 1 час но 24 минут уйшоре 4-тӥ энергоблок пуштӥз, сьӧд ӵын потыны кутскиз. Ужасьёс ӝужыт кранъёсысьтызы васько: «Ма луиз, ма луиз?» Сменаен кивалтӥсь бызьылэ: «План лэсьтоно, планэз быдэстоно! Ваньды мынэ интыяды, ужалэ!» Крановщикъёс ужан интыязы тубизы. Вань тӧлъёслы, шуыны луоз, вань радиацилы усьтӥськемын. Собере ваньзы кулӥзы. Мон соос пӧлысь куиненыз эшъяськылӥ, куиньназылэсь ик сӥзьыл пал рак висёнзэс шедьтӥзы ни. Малы ке милесьтым шимес югдурез ватыса возизы. Зэмлыкез верасалзы ке, трослы ӧжытгес калык бырысал. Кивалтӥсьёс семьяоссэс соку ик палэнэ келязы ук, асьсэос гинэ ужаны кылизы на. Шутэтскон нуналъёсы калык сад-бакчаяз мынӥз. Ваньмыз сяськая. Егит анайёс вож нылпиоссэс коляскаен ворттылыто, спортплощадкаосын ӵошатсконъёс ортчо. Вералэ вал: укноостэс лач-лач пытсалэ, нырдэс но ульчае эн возьматэ, пуке дорады. Дорын сиён-юон вань ук, чидасалмы.

Любовь Павловна маде, Припять но Чернобыль котырысь туспуктэмъёсын книгаез лисъяса. «Чернобыльский репортаж» Киевысь «Планета» издательствоен, авария бере кык ар ортчыса, печатламын. Чиньыеныз возьматъяса ик, вера:

— Собере сюрс автобусъёсты вуттӥзы. Оло, быдэс Украинаысь люкаллям. Калыкез нуыны Чернобыле пыризы. Ивортӥзы: сьӧрады документъёстэс но коньдондэс гинэ басьтэ, номыр мултэсэз медаз луы, 2-3 нунал ортчыса, берытскоды. Киев пала ворттӥмы. Радиация трос люкаське ке, прибор жингыртэ. Киеве вуыку, ваньмыз автобусъёс жингырто вал ини. Соосты соку ик миськизы. Нош калыкез нуллӥзы пӧртэм интыосы. Кытчы машина дугдэ — коркаосы йыгасько. Кин ке усьтэ, кин ке уг. Авария сярысь ваньмыз тодо вал ини. Кышкало, милям радиацимы соослы паласькоз шуыса. Котьма вал, котьма вал…

Любовь Новосёловаез но солэсь эшъёссэ, кык арня пала ортчыса, телефонограммаен берлань ӧтизы. 4-тӥ энергоблокез соос лэсьтӥзы вал ук, нош отын сыӵе йыртӥян чертёжъёс, сомында этажъёс — тодӥсьтэм мурт пыриз ке, йыромоз. Соин ик нырысетӥ нуналъёсы ликвидаторъёслы вакчи сюрес возьматоно луылӥз. Любовь Павловна мастер луыса ужаз: дозиметръёс сётъяз, адямиосты ужан интыязы пыртылӥз-поттылӥз.

Любовь Новосёлова нош ик мыкырске книга вадьсы, выльысь Чернобыле вуэ кадь.

— Тани тазэ пештал нюлэс шуыны кутскизы. Тани Янов станция. Радиациез та тэль вадьсытӥ тӧл станция пала нуиз. Нюлэс тылтэк сутскиз, быдэсак ӵужектӥз. Бӧрысь ваньзэ писпуосты погыръязы но шайвылэ нуизы. Бервылзэ куать метр ӝужда луоен согизы. Янов станциез но ворсазы, отын туж трос радиациез вылэм. Нош со пыр студентъёсты эвакуировать каризы вал. Одӥгез дышетӥсьсы куинь пол, группаосты келяса, ветлэм. Куарусён толэзе ачиз кулӥз ини. Сыӵе кужмо радиация… Нош станция сьӧрын сад-бакчаос, калык со музъем вылтӥ ветлӥз. Кӧня соос шоказы, адскисьтэм кулон пырыосты мугоразы пыртӥзы.

Зэмлыкез шара верасалзы ке, озьы ӧй луысал ук! Со понна ик, шуо милям эшъёсмы, Инмар Горбачёвлэн семьяезлы пунэмзэ берыктӥз. Жаль Раиса Максимовна, со но раклэсь кулӥз.

Любовь Павловна авария бере Чернобыльын куинь но ӝыны ар улӥз на. Солы оскизы ликвидаторъёслы дӥськут сётъянэз. Блокысь берто — вань дӥсез, пыдкукез куштоно. Радиациен пыӵам арбериосты сутыны уг яра — кулон вайись сиос уг ӝуало, ӵынэн ӵош омыре лобӟо. Ваньзэ нимысьтыз шайгуэ куяллязы. Со шайгуослэсь быдӟалазэс син азяды но пуктыны уд быгатэ. Кылем-мылемъёс вуэ но музъеме медаз шеде шуыса, пыдэссы но бордъёсы туж зӧк полиэтилен плёнкаосын валемын. Отчы ватылӥзы быдэс нюлэсъёсты но, котырысь сэрттэм юртъеръёсты но, энергоблок вӧзысь музъемез но, дӥськутэз но. Дуртӥз машинаосысь кисьтазы, нош шораз вертолётъёсын нуллӥзы. Отчы гинэ но туж трос коньдон кисьтэмын. Совето Союзэз али курлало ке но, радиация вӧлмонлэсь утиськон понна ваньмыз лэсьтэмын вал. Инмар мед утёз сыӵе адӟонлэсь. Пыдес вылаз сылӥсь туала кунмы сыӵе учырез уз вормы.

1988-тӥ арын Новосёлова Киевын пинал вордӥз. Егит анаез эмчиос туж чаклазы, тау. Пиез армие ӧз шедьы: вирыз кизер, ӵабыштэм интыысь но кема вия. Ӵемысь нырысьтыз вир кошкыны кутске, пыдъёсаз виштыос кылдыло.

Чернобылецъёс пӧлысь кин ке радиацизэ аракыен поттыны выриз. Кин ке турынъёсты парыса юэ. Любовь Павловна эмъяськыны гордкушманэз бырйиз. Сиськемезлы быдэ ӝӧк вылаз та сиён. Новосёлова Татарстанысь огаз городэ квартира басьтыны быгатӥз. Отысен ини Ижкаре выжиз.

Нош кӧня мыскыл учыръёсы вуылӥз Новосёлова Чернобыльысь документэныз сэрен. Чиновникъёс учкем но уг каро вал, та пӧяса лэсьтэм кагаз, пе, отын кышномуртъёс ӧз ужалэ. Ликвидаторъёслы огвакытэ транспортэн дунтэк ветлыны луэ вал. Любовь Павловнаез кӧня пол ӝегатылӥзы контролёръёс, автобусэнызы ИПОПАТ-озь но нуллэмзы вань. Пӧяськыса, пе, дунтэк ворттылэ.

Чернобылецъёслы кӧня ке капчиятонъёс вал. Монетизация троссэ сииз. Санаторие куддыр ветло ик, но отын эмъяськон понна уксё ас кисыысьтыд тыроно.

Владимир Михайлов
Туспуктэмез: 900igr.net

Удмурт Дунне
By Удмурт Дунне 26 апреля, 2013 15:05