50 ар ӵоже — гожъяськон песьтэрен

Удмурт Дунне
By Удмурт Дунне Апрель 12, 2013 13:40

50 ар ӵоже — гожъяськон песьтэрен

Г. Романовез ӟечкылан

Г. Романовез ӟечкылан

«Удмурт дуннелэн» дауръем сюресаз таӵе учыр нырысьсэ кылдӥз. Тужгес кема милям редакциямы — 50 ар ӵоже — тырше ни Геннадий Романов.

Геннадий Васильевич газетэ ужаны лыктӥз 1963-тӥ арын, Ижысь гурт удысъя институтэз йылпумъяса. Ӝыны даур ӵоже со корреспондент но вал, газетысь отделэн но кивалтӥз, валтӥсь редакторлэн воштӥсез луыса но тыршиз. Пенсие кошкон арлыдыз вуыса но, Геннадий Васильевич гожъяськон удыслэсь ӧз ӵыды. Со туннэ но арнялы кӧня ке пол командировкаосы пота, гурт хозяйствоослэн улэм-вылэменызы, азинсконъёсынызы лыдӟисьёсмес тодматэ.

Кылем арня пумын, аспал муртсэс данъяса, шуныт пумиськон ортчытӥзы Эгра ёросысь Сэп гуртын — Геннадий Романов вордскемын но будэмын артысь Пежвайын. Сэпысь культурая юртэ люкаськизы ёросысь администрациысь кивалтӥсьёс, гурт хозяйствоослэн тӧрооссы, школаын но клубын ужасьёс, гурт калык но Геннадий Романовлэн матысь ӵыжы-выжыосыз.
Школаысь азьвыл дышетӥсь Альбина Владыкина пумиськонлэсь радлыксэ туж ӟеч чаклам. Альбина Александровна пыр-поч тодэ вылэм Геннадий Романовлэсь творчествозэ: кин сярысь гожъяз, ку со материал газетын потӥз. Нош эграос уката шумпото, асьсэ ёросысьтызы адямиос сярысь гожъямъёсты адӟо ке.

Мылкыдзэ вератэк ӧз чида Мазьги гуртысь «Григорий» хозяйстволэн директорез Иван Чирков:

— Ӟучъёслэн газетъёссы трос. Нош асьмелэн, удмуртъёслэн, таӵе бадӟымез — одӥг. Соин ик котькуд удмурт семья сярысь лыдӟем потэ, нош Геннадий Васильевич азьланяз но ӟеч адямиос сярысь гожъяны мед быгатоз.

— Корт уробо кадь либыр-лабыр гожтэм материал сюлэме уг лякиськы. Нош Геннадий Васильевичлэсь статьяоссэ лыдӟем потэ. Со гожъя но ушъя ужась калыкез. Али гуртэз возьматӥсьёс туж ӧжыт ни. Азьланьтэ уждэс, эн вунэтэ гурттэс, — сӥзиз ёрос администрациысь гурт удысъя управленилэн кивалтӥсезлэн воштӥсез Виталий Лекомцев.

Ужрадэз шулдыртыса, ӟеч мылкыд кузьмазы Сэпысь культурая юртын ужасьёс. Татысь кивалтӥсь Татьяна Мосова жадёнэз чик уг тодылы, лэся. Ӵош ужась эшъёсыныз со калыкез но пумита, сцена вылын но шулдыртэ, куно но утялтыны дырыз окме. Бадӟым тау гуртысь ветеранъёслэн «Капчи мылкыд» хорзылы. Баянэн шудӥсь Василий Хохряков юрттэмъя арлыдоос быдэстӥзы трос кырӟанъёсты. Шулдыр гуръёс чузъяськем улсын Геннадий Васильевич егит дыраз бертылӥз кадь.

Елена Скворцова

Удмурт Дунне
By Удмурт Дунне Апрель 12, 2013 13:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<