Воректӥзы турлы буёлъёс

Удмурт Дунне
By Удмурт Дунне 7 марта, 2013 10:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Воректӥзы турлы буёлъёс

«Турлы буёлъёс» нылпи фестивальын

«Турлы буёлъёс» нылпи фестивальын

4-тӥ мартэ Эшъяськон юртын «Турлы буёлъёс» калык творчествоя нылпи фестиваль ортчиз. Туэ со 13-тӥзэ радъяськиз.

Таиз фестиваль быдэсак сӥземын вал Ижысь Первомай ёросысь нылпи садэ ветлӥсь нылпиослы. Ужрадэ мыло-кыдо пыриськизы 266-тӥ, 280-тӥ, 278-тӥ, 275-тӥ, 32-тӥ, 48-тӥ садъёс.

Асьме шаерын пӧртэм пумо выжы калыкъёс уло: котькудӥз соос асьсэлэсь кылзэс, выжызэс но сям-йылолъёссэс утьыны тыршо, пиналъёссылы сое пыӵатыны туртто. Пӧртэм выжы калыкъёслэн улэм-вылэмзы сярысь видеороликъёс возьматӥзы.
Нылпиосты но люкаськем калыкез аспӧртэмлыко чебер праздникен ӟечкылазы нациосын ужан политикая министр Владимир Завалин но культурая, печатья но иворъёсъя министр Дмитрий Иванов. Соос борды итӥськиз школалэсь азьло дышетонъя Первомай ёросысь управлениен кивалтӥсь Елена Казакова. Соос пусйизы: та праздникез шаерамы гинэ ӧвӧл ни ортчытоно, котькуд улосын пӧртэм калыкъёс уло, соин ик сое паськытгес вӧлмытоно.

— Та фестивалез юромо Нылкышноослэн праздниксы азьын ортчытъяськом, — вера Эшъяськон юртын ужась, та фестивальлы кичӧлтон сётӥсь Елена Костенкова. — Отчы, нылпиос сяна, лыкто анайёс, песянайёс. Соослы нылпиос бадӟым праздник лэсьто, кырӟаны-вераны быгатэмзэс возьмато. Котькуд калыклэн аслаз буёлэз вань, кылсярысь, удмуртъёс, италмас сяськаен герӟаса, ӵуж буёлэз ярато. Со сярысь ик кырӟан но кырӟало. Еврейёс коньысирез гажало, сыӵе ик дӥсен нылпиос сцена вылэ пото. Узбекъёс пӧртэм буёло гожмо халат но тюбетейка нулло, сыӵе дӥськутэн дӥсяськыса, асьсэ калыксылэсь кырӟанзэc кырӟало. Немецъёс кечато сьӧдо-гордо буёло дӥськутэн пото.
Фестивальын чебер дӥсеныз но эктыны умой быгатэменыз ваньзэсты паймытӥз 3 аресъем азербайджан ныл Мерве Исмаилзаде.

Ар ортчыса, нылпиос та фестивале нош ик лыктозы, асьсэ выжы калыксылэсь сям-йылолъёссэ, культуразэ, дӥськутсэ но азинскемзэ возьматозы.

— Выльысь пумиськытозь! — киязы пӧртэм пумо шаръёсын шонаса, люкиськизы нылпиос.

Любовь Тихонова
Туспуктӥз Владимир Беломорских

Удмурт Дунне
By Удмурт Дунне 7 марта, 2013 10:46