Вӧйын нянь сиён вакыт

Удмурт Дунне
By Удмурт Дунне 15 марта, 2013 10:35

Вӧйын нянь сиён вакыт

izhkarКыӵе луиз ортчем ар шоркармы понна? Мар возьма отын улӥсьёсты но куноосты туэ? Та ужпумъёслы сӥзем паськытатэм кенешон та нуналъёсы ортчиз Удмурт театрын. Отчы пыриськиз Президент А. Волков.

Кенеш кутскыку ик, шӧдӥськиз ни бурдъяськем мылкыд. Угось ушъяськымонэз ӧжыт ӧвӧл. Нош Иж городлэн йырызлэн Александр Ушаковлэн кузь но лыдпусъёсын тырмытэм докладэз азьланезлы оскон но пыӵатӥз на. Туннэ кыӵе гинэ удысэз эн басьты, котькытын азинсконъёс шӧдӥсько. Кылем даурысь 90-тӥ аръёс бере улон-вылонэн уд ӵошаты. Нош басьтоно ке 2008-тӥ ар бере югдурез, кризисэз но чидамы, шуыны луэ ни.

— Выль ужан амалъёсты пыӵатыны кутскизы Ижысь тросэз предприятиос, заводъёс, — пусйиз А. Ушаков. — Кылсярысь, выль ӟечлыкен андан ӵыжатыны ӧдъяз «Ижсталь», ог 30 пала выль тӥрлык поттыны кутскиз мотозавод, талэсь бере уг кыльы радиозавод, пыд вылазы йыгмыт сыло «Купол», пластмасса поттон заводъёс. Автозавод бичаны кутскиз «Лада-Гранта» машинаосты. Ортчем арын конвейерысь выль моделен 60 сюрс авто потӥз ке, туэлы план 300 сюрс пуктэмын ни.

Шоркарамы вылысьтыз вылаз ӝужало вуз карон интыос. Кылем ар ӵоже соос эшшо 70-лы тросгес луизы. 72-лы йылӥзы калыкез сюдонъя но пӧртэм услугаос сётонъя предприятиос-огазеяськонъёс. Калык таослы кулэяське бере, иське, басьяськыны-шутэтскыны луонлыкез вань. Озьы кылем арын городын улӥсьёсын но куноосын 95 миллиард манет тыр пӧртэм вузъёс басьтэмын.

— Шоркарын уждун шорлыдын 22 сюрс 774 манет луиз, ар ӵоже со 16,6 процентлы будӥз, — азинтӥз веранзэ шоркарлэн йырыз. — Шӧдскымон йылӥз со дышетон удысын.
***
Отӥяз вераськон выжиз лэсьтӥськон удыс вылэ. Ар куспын 245 сюрс квадрат метр улон инты пуктэмын. Трос-а со, ӧвӧл-а? Совето вакытъёсын ӵошатоно ке, трос ик ӧвӧл. Нош кылем даурысь 90-тӥ аръёсъя мертано ке — трос! Угось соку та лыдпус 50 сюрс квадрат метрлэсь но улӥе лэзиськылӥз. Нош туннэ республикаямы гинэ юнматэмын «Улон инты — егитъёслы» программа, уката со паськыт кутӥське шоркарын. Со чотын Ижысь 3 сюрс 261 егит кузпалъёс корка пырон лэсьтӥзы ни. Эшшо кӧня ке сюрсэз возьма шудо нуналзэс. Азинтӥське куашкан калэ вуэм юртъёсын векасьёсты выль интые выжтон. Кылем арын 147 семьялэн улон-вылонзэс талы луыса воштӥськиз. Туэ эшшо 191 семьялэн сыӵе луонлыкез кылдоз.

— Берло аръёссэ шӧдскымон саклык висъяськыны кутскиз улон коркаосты тыро-пыдо тупатъянлы, — ватсаз Александр Ушаков. — Озьы кылем арын 55 юрт тодмантэм воштӥськиз. Сюлмаськытэ лифтъёслэн вужмемзы — 32 процентэз 25 арлэсь ятыр ужало ни. Но соосты выльдон но интыысьтыз вырӟиз — 74-эз кылем арын воштэмын.

Отӥяз городлэн йырыз нимысьтыз дугдылӥз «Югыт город», «Кышкытлыклэсь утем город» но мукет программаос вылэ. Шоркарын югытгес луэ урамъёсын, азбаръёсын. Вуз карон центръёсын, банкъёсын но мукет та выллем учреждениосын сяна, югдурез чакланъя камераос табере кылдо мукет трос калык люкаськылон интыосын но. Нош городэз чылкытатӥсьёсты-утялтӥсьёсты чакласа возе муниципальной милиция. Кылем арын кыкетӥ ползэ ни Ижевск нырысетӥ инты басьтӥз республикаямы эстӥськон вакытлы дасяськонъя конкурсын.

***
Вӧйын нянь вылэ чечы ватсаз Президент Александр Волков. Шуиз:
— Йыръёсмес ӝутоно, пельпумъёсмес паськытгес вӧлъяно! Ӝожтӥськыны мугъёс ӧвӧл, тазьы ик тыршим ке, азьланьын эшшо бадӟымесь вормонъёсынымы данъяськыны быгатом! Ижын 23 ар улӥсько ни, та дыр куспын сое туж яратыса вуттӥ. Син шорам секыт вакытъёс но. 2000-тӥ арын одӥг школа, больница но пуктыны ӧм пӧрмытэ. Нош берло 12 ар куспын кыӵе воштӥськонъёс луизы!

Выль школаос, нылпи садъёс, больницаос, стадионъёс… Александр Волков нимысьтыз пусъе ог 30 пала тужгес тузӥоссэ. Кылем арын 71 сюрс нылпиос вуылӥллям Мунё театре, Удмурт театре 117 сюрс мурт ветлэм…

— Берло кызь ар куспын Россиын одӥг зоопарк но пуктымтэ, асьмелэн сяна, — пусъе Александр Александрович. — Кӧня та понна монэ миськизы… Кӧня тышкаськизы собыдӟа цирк пуктэм понна но. Нош отчы кылем арын гинэ 800 сюрслэсь ятыр нылпиос но анай-атайёс вуылэмын! Соос ноку буш уг луо. Циркамы табере быдэс дуннеысь устоосыз артистъёс вуыло.

Вераськонъяз Президент зал тыр пукисьёсты пышкылыны но вуттӥз. Сомында спорт комплексъёс, бассейнъёс Ижын берло аръёсы пуктэмын. Ӝыны ар пала Удмуртиын лымы кылле — куасэн бызьылон сюресъёс тырмыт. Нош малы, пе, шоркарын улӥсьёс пӧлысь 28 процентэз гинэ эшъяське таза улонэн, спортэн? Югдурез тупатоно, городысь ёросъёс куспын пӧртэм ӵошатсконъёс радъялляно!

Эшшо Президент куриз на: ортчемзэ вунэтоно ӧвӧл, отысь вань ӟечсэ туала улонэ пыӵатоно. Вашкалазэ тодэ вайыса ик, кылсярысь, Ижын нош ик ӝутэмын Дун-чылкыт Михаиллэн соборез. Ижысь заводын ужасьёс, уждунысьтызы пичиен-пичиен коньдон люкаса, 1907-тӥ арын пуктӥзы вал черк. Но 1937-тӥ арын сое куашкатӥзы. Выльзэ соборез пуктон понна Ижын улӥсьёс 4 ар куспын 400 миллион манет пала коньдон люказы, озьы Ижын пыӵал тӥрлык поттыны кутскем дырысен 200 ар тырмон азьын малпанзы быдэсмиз. Табере собор быдэс шоркарез чебертэ. Солы кыдёкын ик ӧвӧл М. Калашниковлэн музеез, 4 кизилиё отель, Иж тымет тодмантэм воштӥськемын… Ул но ул, ӧтча но ӧтча куноосты.

— Та ваньмыз лэсьтӥське, азьланез сярысь малпаськыса, — шуиз А. Волков. — Тыршеммылэн емышъёсыз адӟисько. 2009-тӥ арысен кутскыса ни, республикаямы нылпиос, кулэмъёсын ӵошатыса, тросгес вордско. Кылем арын 23 сюрс 400 нуны адӟиз югыт дуннеез, Ижын — 10 сюрс 185-ез. Шаерамы улӥсьёс 2 сюрс 857-лы тросгес луизы. Семьяосын тросгес вордско кыкетӥ но куинетӥ нылпиос. Приволжск федерал округын та ласянь Удмуртия нырысетӥ интыын.

Элина Кумачёва
Туспуктэмез: udmfoto.ru

Удмурт Дунне
By Удмурт Дунне 15 марта, 2013 10:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<