Урод улонлэсь эктэм уг поты

Удмурт Дунне
By Удмурт Дунне Март 1, 2013 09:54

Урод улонлэсь эктэм уг поты

Кияса ёросысь «Инвожо» ансамбль

Кияса ёросысь «Инвожо» ансамбль

Толон ортчиз Культурая, печатья но иворъёсъя министерстволэн паськытатэм коллегиез. Ужрадэ пыриськиз Удмуртилэн Президентэз Александр Волков.

Удыслэн кылем арын ужамезлы йылпумъянъёс лэсьтӥз но таяз арлы быдэстоно ужпумъёсты пусйиз министр Дмитрий Иванов. 2012-тӥ ар узыр вал историен герӟаськем ужрадъёсын но пӧртэм вормонъёсын, пусйиз со. Нош та вакытэ бадӟым уж нуиське дуннеысь дано крезьгурчилэн Пётр Чайковскийлэн 175 ар тырмон юбилеезлы. Президентлэн Александр Волковлэн сюлмаськеменыз, Россилэн но Удмуртилэн бюджетъёсысьтызы та ужрадъёслы 6 миллиард манет висъяське. Озьыен, Удмуртиын улӥсьёслэн чеберлыко дуннее кыстӥськыны луонлыкъёссы эшшо но будозы.

Культура, печать, иворез вӧлмытон удыслы пӧртэм бюджетъёсысь висъямын 3 миллиард 313 миллион 303 сюрс манет. Мукет удысъёсын ӵошатоно ке, со трос ӧвӧл. Но мар лэсьтӥське берло дас кык аръёс ӵоже республикаямы, ваньмыз со — Удмуртиез азинтон, пусйиз Александр Волков. Школаос, нылпи садъёс, стадионъёс, больницаос пуктӥсько калыклэсь огъя улон-вылонзэ умоятон понна. Нош мылкыд ӟеч ке, кырӟам но, эктэм но потэ.

Культура удысын тыршисьёслэн азьланьын ужаны мылкыдзы ӟеч мед луоз шуыса, Президент оскытӥз: Удмуртиез азинтонъя вуоноез план (2015-тӥ-2019-тӥ аръёслы) сӥземын луоз культура удысэз юнматонлы. Коньдон висъяськоз ёросъёсысь но гуртъёсысь культура юртъёсты выльдон-тупатъян ужъёслы. Ёрос культура юртъёслы 50 миллион манет пала сётӥськоз. Но со понна гуртоослы асьсэлы но тыршоно тросгес сӥль-йӧл поттыны. Кылсярысь, вормонъёссы понна балезиноослэн культура юртсы выльдӥське ни.

Александр Волков косӥз культура удысын ужасьёслэсь уждунзэс таяз арын 30 процентлы будэтыны, нош 2018-тӥ арлы со 100 процентлы йылоз. Тазэ но иворез люкаськемъёс ӟырдыт кичабонъёсын пумитазы. Нош та дыре культура удысын ужасьёслэн шоро-куспо уждунзы 9 сюрс 160 манет, иворез вӧлмытӥсьёслэн — 15 сюрс 700 манет.

Котьма ке но, калык пӧлы чеберлыкез вӧлмытӥсьёс мылкыдзэс уг куашкато, пӧртэм фестивальёсын но конкурсъёсын вормонъёс басьто. Пичи Пурга ёросысь «Брангуртысь песянайёс», «Евровидение» пыриськыса, быдэс дуннелы тодмо луизы. Соослэн вормонэнызы ик герӟамын шаерамы 26-тӥ мае Песянайлэсь нуналзэ пусъён. Нош гужем элькунамы ортчоз Брангурт песянайёслы сӥзем фольклоръя нырысетӥ калыккуспо фестиваль.

Данъяськымон самодеятельной коллективъёс шаерамы трос. «Россия Федерациысь калык творчествоя дано коллектив» ним нырысьсэ сётэмын шаерысьтымы Пичи Пурга ёрос культура юртысь «Зарни шеп» но Кияса ёросысь Карамас-Пельга гуртысь «Инвожо» фольклор ансамбльёслы.

Улонэ пыӵало выль проектъёс, программаос, выльдӥсько театръёс, будо егит кивоштӥсьёс. Удмурт Правительстволэн премиеныз пусъемын 12 усточи нылпиос. Туэ дышетсконзэс йылпумъяло Москваысь Щепкин нимо театр училищеын дышетскись удмурт нылъёс но пиос. Удмурт театре выль кужым вуоз, выль сямен воректоз удмурт культура.

Лия Малых
Туспуктӥз Владимир Беломорских

Удмурт Дунне
By Удмурт Дунне Март 1, 2013 09:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<