Унябейлэн аслаз чеберез

Удмурт Дунне
By Удмурт Дунне 1 марта, 2013 09:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Унябейлэн аслаз чеберез

Н. Кондратьева

Н. Кондратьева

Кылёз-а удмурт факультет?

Удмурт кун университетысь удмурт филология факультетлэн деканэз луиз егит, йӧн-йӧн Наталья Кондратьева. Кыӵе малпанъёсын со басьтӥськиз выль удыс борды? Зэм-а удмурт факультетэз быдтыны, ӟученыз огазеяны туртто? Та юанъёслы валэктон утчаса, вуылӥм деканатэ.

— Наталья Владимировна, 35 арескады доктор диссертацидэс утиды. Кема ик дыр ӧз ортчы, нош ик дӥсьтымон вамыш лэсьтӥды. Кышкыт ӧвӧл-а?

— Котьма борды басьтӥськыку, ӧжытак куалектоно. Но удмурт филология факультетын туж кужмо коллектив: дышетӥсьёс но йӧн-йӧнэсь, студентъёс но быгатӥсесь. Соослы осконэ бадӟым. Берло дасо аръёс ӵоже деканмы Любовь Петровна Фёдорова туж лад-лад вал.

Любовь Петровналы, солэн юрттӥсьёсызлы, кафедраослэн кивалтӥсьёссылы луыса факультетмылэн данэз шӧдскымон ӝутскиз! Университетэ кунгож сьӧрысь куноос лыкто ке, соосты одно тодмато милям факультетэнымы. Кыӵе ке бадӟым ужрад ортче ке, милемыз ӧтьыны уг вунэто. Мар ватонэз, вазен сыӵеез но луылӥз: удмурт студентъёс маке радъяллязы ке, учкисьёс трос ик ӧз люкаськылэ — таос номыр выльзэ уз возьматэ, шуылӥзы. Али факультетмылэн фанатъёсыз но вань! Мукет факультетъёсын дышетскисьёслэсь номыр ласянь бере ум кылиське.

— Бере кылёнтэм понна зол ик пӧсяно луэ, дыр?

— Соиз валамон, мед синйылтозы шуыса, кык поллы но, куинь поллы но тросгес тыршоно луэ. Мон шуысал, котькуд удмурт огазеяськонъёслы-учреждениослы сямен ик. Угось ми асьмемыз гинэ ум, быдэс калыкез возьматӥськом.

Любовь Петровна азьлане учкыны быгатэ, улонлэсь кудпала бергамзэ ӟеч шӧдэ. Озьы факультетамы выль направлениос кылдытэмын. Студентъёсмы удмурт но ӟуч кылъёсын ӵош дышето англи, немец, фин, венгер, китай кылъёсты. Стажировкаос ортчо Финляндиысь, Венгриысь, Эстониысь, Германиысь устоосаз вузъёсын. Малы китай кылэз дышетӥськом? Факультетамы ӟеч специалист вань — Ольга Михайловна Лашкевич, со кема аръёс ӵоже улэмын Китайын. Дась кадр вань бере, малы сое кутонтэмез — трос кылэз тодэм нокинлы мултэс ӧз луы на.

Милесьтым выпускникъёсмес юало тросэз министерствоос но ведомствоос, удмурт специалист кулэ, шуо. Валаськом: удмурт кылэз тодэм сяна, соос компьютерез но ӟеч валаны кулэ. Соин ик кутским вал информационной технологиослы но саклык висъяны. Но вуоно арын та группа интые выльысь дасяны кутском удмурт кылъя но литературая, ӟуч кылъя но литературая специалистъёсты. Али соос одӥг группа гинэ кельтэмын на вал. Маин со герӟаськемын? Туннэ нуналлы тросэзлэн ӟуч кылъя но литературая дышетӥсьёслэн пенсие потон вакытсы вуэмын, нош егит специалистъёс уг тырмо. Ӟуч филология факультетысь выпускникъёслэн школае мынэмзы уг поты, соос мукет интыосын уж утчало. Собере соосты гуртэ но кыскыны секыт. Нош милям студентъёсмы — зэмос патриотъёс. Вузэз йылпумъяса, дор палъёсазы дырто. Нош гуртын дышетӥсьлэн ужез, котьма ке но, данын.

— Жаляса верано, университетысь потэм егитъёс школае вамыштонлэсь юзыр-кезьыр луо, дышетон методикаез ляб тодэмысьтызы…

— Мон соглаш: теориез гинэ тодӥсь суредась — суредась ӧвӧл на, озьы ик дышетӥсь но. Жаляса верано, кун стандартъёсъя университетын методикалы дыр тырмыт чакламын ӧвӧл. Но ми тыршом, студентъёсмы та ласянь медаз шугъяське шуыса. Иське, талы нимысьтыз саклык висъяно, факультативъёс, кружокъёс радъяса.

— Кызьы валасько, азяды пуктэм ужпумъёс пӧлысь та одӥгез луэ…

— Мукетыз — удмурт факультетэз аспӧртэмлыко удмурт центрлы пӧрмытон. Татын мед кылдозы выль малпанъёс, ӧръяськозы выль тулкымъёс… Талы кутскон сётэмын. Факультетмы ӧй луысал ке, кылсярысь, ӧй луысал удмурт «Узы-боры» фильм. Угось ми доры удмурт кылэз дышетыны лыктӥз Петер Палган, татысен со тодматскиз студентъёсынымы Ирина Крестьяниноваен, Елена Фроловаен но мукетъёсыныз, кудъёсыз шудӥзы киноын. Милям факультетысьтымы потэм Елена Петрова (Дарали Лели) режиссёр кариськиз. Сергей Галкин, Эльвира Панченко — милям выпускникъёсмы, магистратураын али дышетске Светлана Ручкина. Выль ӝужась кизили Иван Белослудцев — 2-тӥ курсысь студентмы. Факультетамы лыкто, зэмзэ но, визьмоесь, котьмалы устоесь егитъёс. Соос мукет факультетъёсын но озьы ик тодон-валан люканы быгатысалзы. Но быръё удмуртсэ — талы шумпотоно. Татын будо удмуртлыкез гажась, яратӥсь егитъёс. Асьсэды соос бӧрысь пӧртэм удысъёсын шедьтыны быгато, но удмурт луэмзэс уг вунэто ни.

— Ваньмыз умой, соку малы вераськонъёс потыло, факультетэз быдтозы шуыса?

— Сыӵе малпанъёс дырын-дырын кылдыло. Али соос герӟаськемын вылӥ дышетон удысын бадӟымесь воштӥськонъёсын. Жаляса верано, национальной факультетъёслы азинскыны луонлык табере ӧжытгес сётӥське. Кылсярысь, азьло выль дышетскон ар кутскон азьын ик ми умой тодӥськом ни вал, кӧня студентэз кутом.

Али ваньмыз радъяське конкурс пыр. Факультетъёс арлы быдэ валэктыны кулэ, малы соослы сомында студентъёсты кутоно. Лыдэ басьтӥське выпускникъёслэн уже интыяськыны быгатэмзы, вань-а факультетын наукаосъя кандидатъёс, докторъёс, профессоръёс, пото-а дышетӥсьёслэн публикациоссы но трос мукетыз. Собере Москва огъя лыдпус келя, кӧня филологъёсты университет бюджет чотын дышетыны быгатэ. Со интыосты университет ачиз факультетъёсъя люкылэ ни. Туэ 1-тӥ курсамы 32 студент дышетске. Вал сыӵе вакытъёс, арлы быдэ 100 но солэсь тросгес егитъёс лыктылӥзы. Но мукет ласянь, интыосты конкурс пыр люкылон юскиськыны уг сёты.

Котькуд вить арлы быдэ вузъёс кун аккредитация пыр пото. Али ӵапак солы дасяськиськом — дорамы лыктозы тестологъёс, экспертъёс. Документъёсты, студентъёслэсь тодон-валанъёссэс эскерозы, чаклалозы, ужан программаосмы туала куронъёслы тупало-а. Но ми туж ик ум кышкаське — ваньзэ дыраз дасяськод, умой-умой радъяськод ке, малы куалекъянэз.

— Наталья Владимировна, вузъёс дасяны кутскизы бакалавръёсты но магистръёсты. Удмурт факультет понна со умой-а, урод-а?

— Туэ «пыжозы» нырысетӥосыз бакалавръёсмы — 4 ар ортчиз. Но та егитъёс магистратурае но кыльысалзы ке, умойгес луысал, малпасько. Угось Европаысь бакалавръёс шоры учкон асьме доры но вуоз ик, дыр. Бакалавриатэз йылпумъямъёс дышетӥсьын ужаны уз быгатэ, дышетӥсьёслы юрттӥсь кариськозы яке школаын нылпиослэсь ваньмон дырзэс радъялозы. Но бакалавриат удмурт егитъёс понна умой со ласянь: ньыль арзэ удмурт кылэз мур дышетыны быгатозы, нош магистратурае мукет факультетъёсы куриськыны луоз. Шуом, потэ ке шаертодонъя специалист луэмзы — историкъёс доры мед вамыштозы, потэ ке психологиез ӟечгес дышетэмзы — та удысъя магистратураез мед быръёзы. Иське, удмурт кылэз тодӥсь специалистъёс пӧртэм удысъёсын тросгес луыны быгатозы!

— Уд жаляське-а, куке но удмурт факультетэз бырйиды шуыса?

— Школаын дышетскыкум, математикая но, географияя но, кунгожсьӧр кылъёсъя но олимпиадаосы пыриськылӥ. Удмурт кылэн улонме герӟало шуыса, умой-умой валай 11-тӥ классын гинэ. Пичи Пурга школаямы удмурт кылъя но литературая дышетӥсьёсмы туж кужмоесь вал.

Та факультетэз бырйи шуыса, уг ваты, жалян дыръёсы но вал. Дышетсконэ тупаз 1990-тӥ аръёслы — кризис вакыт, ӝыныез предметъёс пӧртэм мугъёсын уг нуисько, тон тӧлэз ӵыжаса ветлӥськод. Но бӧрысь ӧраз пыри. Табере улон шоры учконэ но пыӵамын ни удмуртлыкен. Пӧртэм фин-угор центръёсы вуылыса, валай, макем чебер дунне, куке отын пӧртэм кылын вераськись калыкъёс уло. Бусыын унябей гинэ будысал ке, солэсь чеберзэ ӧй валасалмы ук!

Жаляса вераме потэ, Пичи Пурга школаын удмурт кылэз дышетэмысь дугдӥллям ни, кельтэмын на со гимназиын гинэ. Со дыре ик туж шумпотӥсько уйпал ёросъёс понна. Дорамы отысь студентъёс ӧжыт уг лыкто. Нимысьтыз пусйысал Эгра ёросысь Зура, Сэп палъёсты, Глазов ёросысь Куреггурт школаез. Кез ёросысь Александрово школаысь зол егитъёс дорамы лыкто. Та школаосысь дышетӥсьёс удмуртлык понна сомында лэсьто, асьсэос но сое уг валало.

Элина Кумачёва
Туспуктӥз Владимир Беломорских

Удмурт Дунне
By Удмурт Дунне 1 марта, 2013 09:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<