Улялы — машина но сяська керттэт

Удмурт Дунне
By Удмурт Дунне Март 7, 2013 09:54

Улялы — машина но сяська керттэт

У. Кайшевалы кузьым сётон

У. Кайшевалы кузьым сётон

Удмуртилэн Президентэз Александр Волков ас дораз пумитаз шаерысьтымы тужгес кужмо спортсменъёсты: Ульяна Кайшеваез но Максим Вылегжанинэз.

Спортсменъёсын пумиськыны туж бадӟым мугез вал. Егит биатлонистъёслэн Австриын ортчем дунне чемпионатазы пыриськыса, Ульяна Кайшева ньыль зарни медаль басьтӥз. Удмуртиез, Россиез вылӥ данъямез понна Александр Волков Можгаысь нылашлы, вордскем нуналэзлы (со ӵапак 8-тӥ мартэ тупа) сяська керттэт кузьмаз. Нош спортын вормонъёсызлы «Лада-Гранта» машина басьтыны 350 сюрс манет тыр сертификат сётӥз.

Егит нылашлы бадӟым спортэн эшъяськон мылкыд пыӵатӥзы анай-атаез. Людмила Афанасьевна но Николай Михайлович Кайшевъёс асьсэос но Можгаын ортчись ӵошатсконъёсы ӵем пырисько, Гурт тол шудонъёсы ветлэмын. Нош нырысетӥ бадӟым вормонэз Ульяналэн вылэм укмыс ар талэсь азьло, «Россиысь куас сюресъёс» ӵошатскон дыръя.

— Дас арес дыръяз тазалыкез лябгес вал, но нылмылэн Ижевске туж мынэмез потӥз, ӧм алэ, — нылзылэсь пичи дырзэ тодаз вае Людмила Афанасьевна. — «Россиысь куас сюресъёс» ӵошатскон дыръя Удмуртиысь ас ёзо эшъёссэ вормыса бертӥз. Ӵапак со дырысен ик бадӟым спортэн эшъяськыны кутскиз, нош нырысьсэ куас вылэ султӥз 4 аресаз.

Тужгес но бадӟым вормонэз Уля доры лыктӥз кылем арын дуннеысь егитъёслэн тол Олимпиадаязы. Отысь со быдэс комплект медальёсын вуиз.

— Олимпиада дыръя штани бордысьтым одӥг гожтэмзэ ватыны куризы, реклама луэ шуыса, — шуиз Ульяна Кайшева. — Ма карыны паймыса, штаниме мыддорин дӥсяй. Удалтӥз, со нуналэ зарни басьтӥ. Та амалэз дуннелэн чемпионатаз но эскероно кариськи. Бадӟым ӵошатсконысь одӥг медален ке но бертоно шуыса малпай вал, ньыль зарни утӥ.

Егит нылаш та пумиськонэ ӝужыт беро пыдкукен пӧрмытскем. Сое Александр Волков но синйылтӥз: ӝужытгес будэмед, лэся, Ульяна! Бен, табере можга нылаш дуннеысь биатлонистъёслэн вожвылъяськоназы пыриськыны быгатоз.

Нош Максим Вылегжанин та нуналъёсы гинэ Италиысь куасэн бызьылонъя дунне чемпионатысь туй медален бертӥз. Бадӟым вормонэз понна Александр Волков Максимлы 500 сюрс манет, нош солэн тренерезлы Олег Перевозчиковлы 250 сюрс манет тыр коньдон сертификат кузьмаз. Ваньмы оскиськом, та спортсменъёс матэктӥсь тол Олимпиадае пыриськозы шуыса.

Валентина Емельянова
Туспуктӥз Николай Глухов

Удмурт Дунне
By Удмурт Дунне Март 7, 2013 09:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<