Улонэ сяська кадь ӧй вал…

Удмурт Дунне
By Удмурт Дунне Март 13, 2013 09:26

Улонэ сяська кадь ӧй вал…

Р. Корепанова

Р. Корепанова

Удмурт автономной областез кылдытонлы уно кужымзэ сётӥз Трофим Борисов. Трокайлэн ӵыжы-выжыосыз туж трос кылемын. Ижын гинэ соос 150 кузя. Но югдытӥсьлэсь нимзэ калыке весяклы кельтон вылысь рос-прос сюлмаське-бызьылэ огез гинэ — Раиса Ильинична Корепанова — Трокайлэн агаезлэн нуныкаез. Алигес со 60 арессэ пусйиз.

— Раиса Ильинична, Трокайлэн вужерез асьтэлэсь но семьядэс юн шуккиз ке но, тӥ солэсь ӧд куштӥське…

— Трокай агайлэн нимыз мынэсьтым песятайме зол шуккиз. Но солэсь куштӥськи ке, быдэс улонэлэн толыкез быроз ук! Инмарлы тыбырыным султэм кадь луоз.

Матысь ӵыжы-выжыосыз Трокай агаез ноку ӧз куштэ, асьсэлы таин сэрен зол йӧтӥз ке но. Николай Кузьмич Борисов песятае ямщик вал. Хозяйствоезлы синмаськисьёс ӧз сюрылэ — начар улӥзы.

Озьы ке но песятайме 1930-тӥ но 1933-тӥ аръёсы кулакъёс радэ поттылӥзы. Одӥг гинэ скалзэ талазы. Огполаз Сибире келян вылысь вить нылпиен валче дӧдьые пуктӥллям вылэм ни. Вылазы дӥськутэн гинэ кельтӥллям. Но палазы пырыса, гурт калык кылзэ верам. Анае вордскем бере кутэтсы гинэ но вылымтэ. Песятаелэсь штанизэ кесяллям, буяллям но нунылы дӥсь вуриллям.
Нялтас вераса, песятае анайме удмурт дэремен но ветлыны алэ вылэм. Таид удмурт шуыса медаз тодэ кадь йӧтӥз, дыр, солы. Лулӟоз вылэм: нылпиосы ке но медаз курадӟе. Нош анаелы маке шат! Коргид сиге тубе, отысен дӥсьсэ удмурт дэремлы воштэ но, озьы эшъёсыз пӧлы шудыны потэ. Бертыкуз выльысь сигын воштӥське.

Ваменскон сям, оло, милям вирамы но пыӵамын. Песятае весь вералоз вал таӵе учырез. Огпол Трокай агай Алнаше ӵыжы-выжыосыныз адӟиськыны бертэм. Та сярысь верасьёс утыр сюриллям. Пуныос сямен, утчаны вуиллям ни. Нош Трокай агай пызь мешоке пырем. ӵыжы-выжыосыз вылаз эшшо кӧня ке мешок куштӥллям на. Озьы уробоен поттӥллям сое Алнашысь. Удмуртъёс понна сюлмаськемзэ шӧдӥзы но валазы уго ӵыжы-выжыосыз…

— Ӵыжы-выжыосыз Трофим Борисовлэн туж трос. Но малы, тӥледлы сяна, со нокинлы кулэ ӧвӧл меда?

— Трокай агаез кыӵе-кыӵе курадӟытӥзы но, сыӵе адӟонлэсь ик кышкало, дыр, выжыосмы. Но мынам соосты огзэс но пыкылэме уг поты. Асме но курдатӥсьёс сюро ук. Трокаез ӝутон борды кутски но кӧня бӧрдӥ, кӧня уйме ӧй изьы — ачим гинэ тодӥсько. Монэ вузасьёсыз но вал. Но соос монэ гинэ уг, Трокай агаез но вузало.

2009-тӥ арын «Удмурт Кенеш» огазеяськонлэн Иж городысь ёзэтэныз кивалтӥсь Пётр Бобров мыным дэмлаз: Трокай агайлэсь родняоссэ, пе, люка ай. Синпелет пуктон пумысен но, пе, сюлмаськоно вал. Та малпанэн пӧзьыны кутски мон. Вылӥ кивалтӥсьёс дорозь огпол гинэ ӧй вуы. Олокыӵе мылкыдын пумитасьёсыз но сюрылӥзы. Культура удысысь огез бадӟым адями шорам синъёссэ но ӧз ӝутъя, монэ кылэмез ик поты. Шӧдӥ: таид удмуртъёсты воксё но адӟемпотостэм каре.

Удмуртъёс шоры сыӵе кырыж учкемъёссылэсь дорам воксё жуммыса бертылӥ. Коркам пырыса вуисько-а, уг-а — жингырто ни: малы, пе, озьы ветлӥськод, улыса, пе, жадид ни шат. Нош мар уродзэ мон лэсьтӥсько? Лек кылме гинэ но нокинлы ноку вераме ӧвӧл. Сыӵе дыръя киям кутылӥ Трокай сярысь сюлмаськыса гожтэм Коля агаезлэсь гожтэтъёссэ. Соос ик мыным ӟигар сётӥзы.

Ярам, бератаз кылӥськиз ик: синпелетэз Иже ӝутозы. Макетэз но, пе, вань ни. Но суредын, пе, Трокайлэн йырыз мыкыртэмын. Та берло иворлэсь кӧты ӝож луиз. Малы синъёссэ ватэ со? Мар понна удмурт калык азьын янгыш? Ньыль толэзь ӵоже сюлвори, макетсэ мед воштозы шуыса. Кинлы но ас малпанме шара ӧй вера! Бӧрысь ни «Удмурт Кенешлэн» соку тӧроез Николай Мусалимов макетсэ возьматӥз. Сюлэмы ик буйгаз.

Пичи Рая Николай Кузьмич песятаеныз, Трокайлэн агаеныз

Пичи Рая Николай Кузьмич песятаеныз, Трокайлэн агаеныз

— Алнаш палась, Трокайлэн синпелетэзлы пумитъяськыса, вылӥ кивалтӥсьёс дорозь лек гожтэт но вуылэм, лэся…

— Вал сыӵе учыр. Пумиськылӥмы со кышномуртэн. Ми соин огвакытэ артэ улӥмы. Солэн пиез но мынам внуке нылпи садысь одӥг группае ветлӥзы. Малы, пе, мынам атаелы синпелет ӧвӧл? Мынам бубые, пе, ферма усьтӥз. Кыӵе ферма кылдытэм — мон юалляськыса ӧй ветлы. Но сюлэмме туж зол куртчиз со гожтэтэныз, Трокай агай пинал нылъёсты, пе, сантэма вылэм. Осто, Инмаре…

Куддыръя ӵыжы-выжыос но пыкылыны выро: малы, пе, ми сярысь конференциос дыръя ӧжыт вераськод? 2011-тӥ арын гинэ 8 паськытатэм конференцие пыриськи мон. Котькудаз Трокай агай сярысь тодэмме верай, улонысьтыз учыръёсын пӧлэстыса. Кыдёкысь ӵыжы-выжыосы сярысь но, оло, кыласал-бурласал. Но соос сыӵе пумиськонъёсы уг ветло, монэн кусып уг возё. Кытысь мон тодӥсько, мар соос лэсьтӥзы та улонын, мар понна соосты калык азьын данъяно? Ӵош кариськысалмы ке, оло, синпелет но ӝоггес но капчиенгес пуксьысал. Оген венез но ӝутыны секыт, шуо ук.

Мон Ижын огнам нюръяськисько. Алнашын — Екатерина Николаевна анае. Трокай агайлэн шайвылысьтыз музъемзэ со мунчо азьын 13 ар ӵоже утиз. Вуттӥзы вал со сюез мугорзэ ватэм интыысь, НКВД-лэн Актюбинск лагерьысьтыз. Отысь прокурорлэн воштӥсез В. Чернов сюез милемлы келян пумысен сюлмаськиз.

Сюйлэн мунчо азьын шат интыез? Ӧвӧл. Анае Алнаш ёрослэн йырызлы Сергей Токаревлы вазиськиз черкогуртэ синпелет ӝутон пумысен. Кылӥзы сое. Трофим Борисов администрация азьын сылэ табере. Шайвылысь сюез но пыд азяз интыязы. Анае ик капчиен лулскиз: табере Трокай агай гань-гань шокчоз, дораз бертэм кадь потоз.

— Асьтэос кӧня аресысен дунъяны кутскиды дано выжыдэс?

— Трокай агай сярысь вераськонъёс семьяямы ноку ӧз чалмылэ. Дорамы ӵемысь пыралля вал писатель Семён Шихарев. Со Трокай сярысь книгазэ быдэсак песятаелэн верамезъя гожтӥз. Но мон ачим бадӟым классъёсын гинэ мазэ-созэ валай. Малпасько вал: дышетӥсь луо но удмурт историмес нылпиослы мадё, пичиысен мед тодозы но мед данъяськозы Трофим Борисовен.

Но быдэс даурме кайгырисько ни, дышетӥсь ӧй луы шуыса. 10-тӥ класс бере Удмурт кун университетысь пединститутэ пыри вал. Но анаелэсь мӧзмеменым, документъёсме басьтӥ но бертӥ. Зэм, отӥяз аслэсьтым улонме мытоно луиз ик. Ижысь автозаводэ кутски. 1970-тӥ аръёсы отчы трос ужасьёс кулэ вал. Нош колхозын уждун уг тыро. Анайлэн чырты сьӧраз уд пукы — ачим ослоп.

Заводысен ик тодматски вуоно картэным. Кылем арын улонысь ӵушки-пашки кошкиз со. Но али ке но Толяелы тау шуисько. Удмурт ужрадъёсы кошкыкум, сое корка нылпиосын ӵогаса но кельтӥсько вал. Нош со, куатаськем интые, пӧсь сиёнэн пумиталляз. Ачиз ик пельнянь кутэ, ачиз ик пӧзьтэ. Огпол ке но шорам кеськысалыз ке, мар со удмуртлыкеныд дан поттӥськод шуыса, оло, шырпи кадь шыпыт кариськысал ни. Но со ваньзэ чидаз. Нылпиосмес но удмуртлык борды кыскемысьтым, ӧз йыркуръяськылы.

Нылы мынам дышетӥсь. Пие программист, али Америкаын улэ. Соин телефон пыр маке лушкемез сярысь вераськоно ке, удмурт кылэ выжиськомы.

Улонэ сяська кадь ӧй вал. Но табере котькуд удмурт ужрадэ пыриськисько бере, эшъёсы но тодмоосы трос ни.

— Маке понна возьдаськемды вань-а?

— 2011-тӥ арын Алнаш ёросысь Кузёбай гуртын наукая конференция ортчиз. Мыным но отын кыл сётӥзы. Кунгож сьӧрысь но куноос вал. Валамон мед луоз шуыса, ӟучен но удмуртэн вераськыны выри. Нош кунгож сьӧръёс мон бере сцена вылэ тубизы но ӟуч кылзэс воксё ӧз потталэ — удмуртэн гинэ лабыртӥзы. Соку туж возьдаськи: Удмурт шаерын улыса, удмуртмес ватыны выриськомы.

Елена Сараматова
Туспуктӥз Владимир Беломорских

Удмурт Дунне
By Удмурт Дунне Март 13, 2013 09:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<