Удмурт нерге

Удмурт Дунне
By Удмурт Дунне 15 марта, 2013 10:20

Удмурт нерге

Шаркан школаын удмурт ужрадъёсты ортчытъяны уг пумитъясько. Кылсярысь, отын ортчиз С. Широбоков кылбурчилы сӥзем ӝыт

Шаркан школаын удмурт ужрадъёсты ортчытъяны уг пумитъясько. Кылсярысь, отын ортчиз С. Широбоков кылбурчилы сӥзем ӝыт

2010-тӥ арын ортчытэм калыкез лыдъян-чотан возьматӥз: Шаркан ёросын 25 сюрс 714 улӥсез. 83 процентэз соос пӧлысь — удмуртъёс. Но тапалан улӥсьёслэсь берло дыре удмурт кылзэс туж шер кылод. Анай кылынызы вазизы ке, ымысьтызы ӵыжатэм вӧй кисьтӥськоз, кожалод. Ма, школаосазы гинэ но удмурт кылэз дышетэмысь пумен воксё дугдо ни.

Удмурт кыл модаын?

Ёросысь дышетонъя управление оскытэ ик: районысь 16 школа пӧлысь 3-яз гинэ уг дышето удмурт кылэз. Нациосын ужан политикая министерство воксё мукет лыдпус сётэ: Шарканын, пе, анай кылэз дышето 17 школаын, тапалась вань школаос пӧлысь со 85 процентэз.

Котькызьы вала та лыдпусъёсты. Огзэ сюлэм шӧдэ: удмурт кылэз предмет чот дышетӥсьёс таос пӧлын туж ӧжыт. Уноез школаос уго удмурт кылын факультативзэс но урок чотэ пырто. Тазьы ик шуыны луоз Шаркан шор ёзо школа сярысь.
Отын туннэ визь люка 1 сюрс 43 пинал. Черкогуртын гинэ улӥсьёс татын дышетскысалзы ке, удмурт кылъя предметэз кемалась быдтысалзы ни, дыр. Ӟучомемын ми, шуысалзы. Удмурт кылын вераськись но валась дышетӥсьёс гинэ но монэ ӟучъяськыса пумитазы. Коридоре потэм нылпиос но анай кылзэс куспазы уг поттало ни. Нош татчы тодон-валан басьтыны ветло на артысь чылкак удмурт гуртъёсысь пиналъёс! Жаль, таосты туннэ лыдэ уг басьто ни, лэся.

Дышетон программаез учконо ке, национальной классъёс вань дыръя, анай кылэз дышетыны арняяз шорлыдын 4 час висъямын луыны кулэ. 9-тӥ классын гинэ со 3 час кыле. Нош Шарканын удмурт кыл пичиослы но, бадӟымъёслы но арняяз воксё 1 час кельтэмын. Сое но вань классъёс уг дышето.

— Мон татын 7 арзэ кивалтӥсько ни, кӧня асме тодӥсько, милям удмурт кылын факультатив гинэ вал, — шуэ школалэн директорез Ольга Бородулина.

Озьы ке но удмурт кыл расписаниязы урок чот пуктэмын. Солы осконо ке, ветло отчы 5-тӥ — 7-тӥ классын дышетскисьёс — 327 пинал. Ваньзылы отметка но пуктыло. Зэм, аттестатазы со уг мыны. Ма, удмурт кыл но шуыны предметсэс луоз меда? Табыдӟа кыл улэ ватэмын шаермылэн историез но, краеведение но.

Татысь 8-тӥ «д» класс гинэ — быдэсак удмурт. Отын 11 кузя дышето ни анай кылэз покчи классъёсысен ик. Таос но анай кылэз кыло-адӟо арняяз 1 час ӵоже гинэ. Национальной класс усьтон пумысен туж трос бызьылӥз вал удмурт кылъя дышетӥсь Алевтина Лебедева. Но таослэн но аттестатазы удмурт кыллэн вужерез гинэ но уз пуксьы. Туннэ тодмо но ӧвӧл, дышетозы на-а соос удмуртэз 9-тӥ классэ потэмзы бере. Директор туннэ сыӵе оскон уг сёты. Дышетон программаез юнматон ас кияз ке но, солы мултэс йыр висён но кулэ ӧвӧл кадь. Ольга Петровна меӵак шуэ ук:

— Мон удмурт кылъя дышетӥсьмес курисько: пиналъёс тросгес мед тодозы историмес, сям-йылолъёсмес, вераськыны луымон удмурт кылмес. Нылпиослы словарь нерге лэсьтоно, калыкын кутӥськись кылъёсты пыртыса. Грамматикаез ӧз валалэ ке но, ярам. Нош дышетӥсь кызьы уроксэ нуэ, уг тодӥськы — огпол но уроказ пукеме ӧвӧл. Огзэ шӧдӥсько: солэн удмуртлы дышетон ласянь мукет учконэз, со монэ уг вала.

Ма, кызьы умой йырсазё мурт ваньзэ тае валалоз меда? Кызьы кыллюкамъёс вылын гинэ удмурт кыллы дышод? Эшшо ке со воксё мукет предметъёсын пӧлэстэмын ке! Валамон ни: удмурт грамматикаез арняяз 1 час дышетыса, йырад номыриз ик уз пыры.

Но Ольга Бородулиналы удмурт урокъёсты кулэстэмез нокытчыяз ик уг йӧты кадь. Вера ук:
— Тӥ валалэ: 10-тӥ-11-тӥ классъёсын удмурт кылэз пыртонлэн нокыӵе пайдаез ӧвӧл! Пичиослэн туннэ сое дышетэмзы потэ ик.

Мода луиз ук удмурт кыл. Нош бадӟымъёсыз, сое дышетыса, кытчы мынозы? Туннэ милям пиналъёсмы Ижысь вузъёсты отӥгес каро ни — Санкт-Петербурге но Москвае ӵемгес йыгасько. Удмурт кылэз ӧм кулэстэ ке, мар чотын дышетомы математикаез, англи кылэз, ӟуч кылэз?

Не ӟуч, не удмурт?

Районысь дышетонъя управлениын талы воксё но уг пумитъясько кадь. Зэм, журналистэн пумиськыны кивалтӥсез воксё но пумит кариськиз — ыстӥз воштӥсез Николай Воронцов доры. Соиз нырысь-валысь кылдэм югдур пумысен вераськыны ик уг меды вал. Мырдэм но кызьы Воронцов аслэсьтыз учконзэ шараяз ик:

— Удмурт кылэз школаосы кужмысь пыртӥмы ке, пайдаез луоз меда? Пумитъяськисез уногес сюроз, дыр. Туала нылпиослэн луонлыкъёссы туж бадӟымесь. Дышетэмзы потӥз ке удмуртсэ, амал шедьтозы. «Удмуртия» издательствое но книгаослы вазиськозы — отын али оломар но потто ни.

— Асьтэос та верамдылы оскиськоды-а? Ку нылпиослы маке кулэ луиз ни? Ӧжытгес йырзэс ужатон но тросгес дырзэс компьютер сьӧрын шудонлы висъян понна удмурт кыл шоры соос воксё но сялӟозы. 30 аресказы гинэ ке шат куд-огезлэн йыраз чилектоз: анай кылэз дышетоно вылэм. Шӧдозы уго: удмурт кыл быриз ке, быдэс нацимы кулоз. Но соку туж бер уз луы-а?

— Но туннэ одӥг вузын но абитуриентлэсь аттестатсэ уг куро ни — ЕГЭ-лэсь результатъёссэ гинэ учко. Соин ик уноез нылпиос ЕГЭ-лы кулэ луись предметъёсъя гинэ рос-прос дышетско на. Аттестатазы музон предметъёсын «куинь» ке но сылӥз, уз бӧрдэ. Мар веранэз ни удмурт кыл сярысь! Асьсэос ке уг валало, анай-атайёссы удмурт кыл понна мед сюлмаськозы, нылпиосынызы мед вераськозы. Но туннэ мумы-бубыослы но номыр кулэ овӧл.

— Ёросысьтыды удмурт дышетӥсьёсты но зӥбись-коды, шуо. Аттестация ортчон понна начальной классъёсысь визьнодасьёс удмурт кылъя предметэз, пе, басьтыны ум дӥсьтӥське ни. Комиссие пырисьёс, пӧй, шуо: ми удмурт сямен ум валаське, удмурт кылэз бырйиды ке, балл ӧжытгес пуктом.

— Мон 2007-тӥ арысен со комиссиен валтӥсько ни. Но та дыр ӵоже одӥг дышетӥсь но удмурт кылъя предметэз аттестация дыръя ӧз бырйы на. Ӵемысь математикаез басьто. Сое комиссилы но, нылпиослы но капчигес возьматыны — дидактической материалъёс уно. Нош удмурт кылын мар вань? Туж кема утчаськид ке, оло, маке шедьтод ик. Но дышетӥсьёс асьсэос но удмурт кылын чылкыт вераськыны шугъясько.

— Соин-а школаосы дышетонъя управлениысь мукет индылон но вуэмын: предметъёсты ӟуч кылын гинэ нуоно, анай кылэз поттатэк. Нош удмурт нылпиос ӟучез умой уг валало ке? Шуом, физикаысь но математикаысь валатонъёсты кызьы йыразы тэрытыны кулэ?

— Бумага вылын сыӵе приказ ӧвӧл. Но дышетӥсьёсты, зэмен ик, куриськомы: урокез чылкыт ӟуч кылын гинэ нуоно. Уставын гожтэмын ук, урокъёс ӟуч кылын ортчо шуыса. Кызьы тае чаклатэк? Удмурт кылын нуоно ке, быдэсак удмуртэн мед вераськозы. Кылсярысь, дышетӥсьёс шуо: «прибавить кар ай та числоез». Кин озьы вераське? Сыӵе суро-пожо кыл вань шат? Не ӟуч, не удмурт. Собере нылпиос но сыӵе ик суро-пожо будо. Зэм, тэшкылиос дышетӥсьлэсь воксё мар верамзэ уг валало ке, соку кулэ тазьы пусйыны: удмурт сямен шуысалзы тазьы… Но та туж шер луыны кулэ. Асьмеос суро-пожо образование сётыны ум быгатӥське. Азямы одӥг бадӟым ужпум: нылпи мед дышоз ӟуч кылын малпаськыны, малпанъёссэ шара кисьтыны.

Муг утчан?

Удмурт пиналэз тышкаса ке но ӟучезлы дышетӥд, пушкысьтыз вирез мукет сямен бызьыны ноку уз кутскы. Со удмурт ик кылёз. Зэм, азьланяз удмурт луэмезлэсь возьдаськыны быгатоз. Удмурт луэменыз, аспӧртэм луэменыз данъяськем интые!

Но таӵе югдурын удмурт кылын дышетӥсь огназ маке карыны быгатоз меда? Быдэс уллёлы огназ сылӥсь муртэ лёганы котьку капчи. Сотэк-а Шаркан шор ёзо школаысь удмурт кылъя огез дышетӥсь Надежда Перевозчикова, зӥбетлы чидатэк, кошкиз.

Школаязы удмурт кабинетсы гинэ но ӧвӧл. Ма, мар кабинет сярысь веранэз? Дышетонын удмуртлыкез гажан мылкыд воксё кулэ ӧвӧл, шуэ директор Бородулина. Со ачиз но удмурт. Но удмуртсэ уг ик потталля.

Классъёс но Шарканын бадӟымесь — 24 нылпиен дышетско, ог 5 параллель. Капчи меда бадӟым классъёсын ужаны? Ӧвӧл, дыр. Пӧлазы уго удмуртэз но, ӟучез но, бигерез но вань. Огез вала, мукетыз уг. Нимаз классэ удмуртъёсты люка но соосын рос-прос ужа вал!

Удмурт кылъя дышетӥсь Алевтина Лебедева туннэ вань сюлэмзэ понэ ужаз. Бӧрдон вакытъёсыз но ӧжыт уг луо. Удмурт кылэз кулэ карисез ӧжыт бере, оло, кошконо ни — тазьы но пайме со. Но со кошкиз ке, удмурт кылъя предметэз быдтыны муг гинэ сюроз.

— Нимысьтыз класс усьтыны уг луы — кабинетъёс уг тырмо, — шуэ Ольга Бородулина. — 5-6 нылпиен-а класс усьтод? Ӵапак сомында мурт гинэ, удмуртэз валаса, лыктэ дорамы нылпи сад бере. Зэм, бадӟымгес классъёсын, гуртъёсысь пиналъёс вуэмен, удмуртъёс люкасько ик. Но кӧня ар соосты возьмалод? Милесьтым кылмес юатозь, нылпи садэ ветлэ. Соос нырысь мед кутскозы анай кыллы дышетыны, собере ми но малпаськонэ усёмы.

Черкогуртысь 3 нылпи садын удмурт кылэз воксё уг поттало. Анай кыл отын азьланяз чузъяськоз ай шуыса, оскон пичи. Озьыен, школаын но удмурт кыл кӧня векалоз на?

Елена Сараматова
Туспуктӥз Владимир Беломорских

Удмурт Дунне
By Удмурт Дунне 15 марта, 2013 10:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<