Пилем улысь шунды потӥз

Удмурт Дунне
By Удмурт Дунне 29 марта, 2013 10:53

Пилем улысь шунды потӥз

В. Лекомцев

В. Лекомцев

Куинь ар талэсь азьло Эгра ёросысь «Родина» эштос куашкатэмын вал, шуыны луоз. Выль даурлэн кутсконаз сыӵе вие вуттӥзы Эграысь но Можгаысь мурт ваньбурез капыръяны яратӥсь ужбергатӥсьёс. Гурт хозяйстволэсь кылем техниказэ но пудозэ тус-тас каризы. Сыӵе югдурез адӟыса, сэп калыклэн чиданэз быриз, асьсэ бӧляксэс Василий Лекомцевез хозяйствоез ас вылаз басьтыны куризы. Со Пежвай гуртын вордскемын. Ӵапак шутэтскыны потон дырыз вуиз югдурез утён удысын ужамез бере. 2010-тӥ арысен Василий Анатольевич гань-гань кӧлонзэ вунэтӥз.

— Василий Анатольевич, кызьы толэз потӥды?

— Азьло аръёсын ӵошатонэз ик ӧвӧл. Миым тырмыт пудо сиён дасямы. Со луонлык сётэ скалъёслэсь лыдзэс йылэтыны но уногес йӧл-сӥль поттыны. Но со капчи ӧвӧл. Быгатэммыя пудо гидъёсмес выльдӥськом. Вылӥ ӟечлыкен йӧл вузан вылысь 5 тоннаем йӧл сӥятон танк басьтӥм. Со хозяйстволы 800 сюрс манет усиз. Сэп фермаын скал гидлэсь липетсэ профнастилэн шобыртӥм. Миым скалъёслы гидэ сиён пыртылыны пичи кабинаен МТЗ-892 трактор басьтӥм. Нош Михайловка фермаысь пудо гидлэсь липетсэ тупатъям, профнастил вӧлдӥм.

Хозяйствоямы али 880 йыр сюро таза пудомы, яке, валля арын та дырен ӵошатыса, 120 йырлы трос. Скалъёсмы 330 йыр. Ваньмыз пудо уллёмы 4 фермае интыямын. Сэпын 144 йыр. Татын вань ужъёсты валаса но быгатыса бергатэ Надежда Анатольевна Лекомцева. Со 16 ар фермаын тырше ни. Пудоез но ачиз бызьылытэ. Миым 100 скаллэсь 80 кунян басьтӥм. Азьланьын со лыдпусэз будэтыны луонлыкъёсмы вань. Туннэ шумпотыса верам потэ: та фермаын туала куронъёслы тупась шутэтскон комната лэсьтӥм. Зэмос горд сэрег пӧрмиз. Татысь ивор шедьтод дояркаослэн кызьы ужамзы, скалъёслэн ку кунян ваёнзы сярысь.

Миым хозяйствоямы пудо вордонэз оским Ангелина Николаевна Аверкиевалы. Солэсь азьло та удысэз нуиз Люция Лекомцева, но солэн шутэтскыны потон дырыз вуиз. Сэп фермаын Надежда Лекомцевалы ӟеч юртто егит пиос Олег Селивёрстов но Николай Стрелков. Гужем кык эшъёс скалъёсты возьмало, толалтэ ваньзэ секыт ужъёсты быдэсъяло: кыед потто, пу пильыло, дояркаослы пудо сюдыны юртто но мукет. Кышномуртъёслы угось али секыт йӧтэ ай, соос аппаратъёсын йӧл кыско на. Соин ик молокопровод басьтыны чакласьком.

Вань пудо утисьёслэн но специалистъёслэн дэмен, мылысь-кыдысь ужамзы син азьын: 2010-тӥ арын котькуд скаллэсь 4 сюрс 635 килограмм йӧл люкам ке, валля арын со лыдпус 4 сюрс 758 килограмм луиз. Али скаллы быдэ нуналаз 13 килограмм йӧл кыскиськом.

Пудо сиёнмы тырмыт. Вӧзаз басьтӥськом на скалъёслы мынӥсь маял, шрот, кыд (жмых) но БВМД. БВМД узыр белокен, витаминъёсын но минерал сылалъёсын. Со ӟеч ватсэт луэ. Йӧлмес вылӥ но нырысетӥ сортэн вузаськом «Увамолоко» огазеяськонэ. Со милемлы зол юрттэ, техника но музонзэ басьтыны коньдон сётэ.

— Пумен матэ вуо тулыс бусы ужъёс. Кызьы соослы дасяськиськоды?

— Урод ӧй шуысал. Сӥзьыл муосмес кын улэ гырыса кельтӥм, валэс ю кидысмы тырмыт, эшшо турын кидысъёс вуттом на — клевер, козлятник, тимофеевка, овсянница но мукет. Кӧнязэ ке турынэз, кӧжыен сураса, кизём. Соин ӵош ик гырон-кизён но аран техника каллен-каллен вуттӥськом. Берло дыре басьтӥм Т-150 но ЮМЗ тракторъёс, КЗС-812 ю тысь октон комбайн, КамАЗ, ГАЗ-53, УАЗ автомашинаос, «Полесье»-КДП-3000 пудо сиён дасян комбайн, лущильник-кормораздатчик. Ваньмыз со юрттэ бусы ужъёсты дыраз но ӝоггес быдэсъяны но та удысэ выль амалъёсты пыӵатыны. Пайдаез вань. 2010-тӥ арын котькуд гектарысь 11 центнер пала ю тысь кутсам ке, валля арын но миым 16-17 центнер басьтӥм ни. Туэ эстӥськон но 3,5 тонна минерал сылал вуттыны юрттоз «Увамолоко».

Пилем улысь шунды ӵемгес потамъя тулыслы дасяськон пумен кужмоя. Мастерскойын уж пӧзе. Тани механизаторъёслэн тужгес матысь юрттӥсьсы луэ Владимир Лекомцев. Со токарь но, сварщик но, фрезеровщик но.

Туннэ нимысьтыз умоен пусъеме потэ КЗС-эз выльдэммес. Бункерзэ кельтыса, ю тысь куасьтон карусель выллем сушилка басьтӥм. Дуныз шоры ӧм учке, 2 миллион манет пала усиз ке но. Кредитэ пыримы. Али тыронъёсмы трос ӧвӧл ни. Михайловка гуртысь гидъёс гинэ ужбергатӥсьёс кие кылемын на, нош пудо йырмы асьмелэн. Гидъёс арендае сётэмын кадь луэ. Азьланьын соосты но басьтом.

Мыным ужаны туж секыт луысал, воштӥсе, валтӥсь инженер Николай Геннадьевич Корепанов ке ӧй юрттысал. Со мынам бур киы, хозяйствоын, дырзэ но, кужымзэ но жалятэк, 37 ар тырше ни. Туж чырткем, задор мылкыдо, юн оскымон адями. Татын вордскемын, калыкен огкыл ӝог шедьтэ. Таӵе юрттӥсьёсын секытэз но уж каньылэн лэсьтӥське.

— Озьыен, азьланяз гань-гань кариськыны уд на малпаське?

— Малпанъёсмы улонэ каллен пыӵало. Уждунмы но пичиен-пичиен будэ, фермаосмы выльдӥсько. Калык шонер вера: гурт хозяйствоез куашкатыны визь уно кулэ ӧвӧл, нош ӝутыны трос дыр но кужым быре. Ми сое валаськом, мылкыдмес ум уськытӥське. Кинлэн музъем паез вань, эштос соослы дунтэм дунын ю-нянь висъя но вытсэс тыре. Соин ӵош ик калыклы музон но юрттэт вуэ: бакчаоссэс гыриськом, турын-куро люкылӥськом. Эштосамы али 87 мурт ужа. Азьланьын со лыдпус кулэсмиз ке но, ваньбур поттонын уз шӧдӥськы. Ми будон-юнман сюрес вылысь ум коже.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 29 марта, 2013 10:53