Лыдпусъёс сьӧрын — азинскон!

Удмурт Дунне
By Удмурт Дунне 1 марта, 2013 09:33

Лыдпусъёс сьӧрын — азинскон!

41

Вуоно арын 10 школа пуктэмын луоз, аслэсьтыз черодзэ вите Дэбес ёросысь Зар-Медлоысь школа но

Дышетонъя но наукая министрлэн Андрей Кузнецовлэн докладэз, чаклам 30 минут интые, 40 минутлэсь ятыр кыстӥськиз. Лыдпусъёс вылэ лыдпусъёс чузъяськизы. Ваньзы ик возьмато удыслэсь азьлань вамыштэмзэ. Тани пӧлысьтызы кӧняез ке гинэ: арлы быдэ республикаямы ӧжытгес кылё вуж но куашкан калэ вуэм школаос, шуом, 2001-тӥ арын соос 60 пала вал ке, али 10 кылемын на. 2012-тӥ арын усьтэмын 5 ӵыжак-выль школа, 8 спортзал, эшшо 12 школа но 1 спортзал тодмантэм выльдэмын.

— Кылем арын дышетон удысэз выльдонлы Москваысь 758 миллион манет вуиз, эшшо 94 миллионзэ ватсаз республика, — пусйиз Андрей Кузнецов. — Та коньдон кошкиз школаосы дышетон тӥрлык, пособиос но трос мукетсэ басьтонлы.

Эшшо: 436 школа столовойын пӧраськон тӥрлык выльдэмын,  покчи классъёсы ветлӥсь 77 сюрс пала нылпиослы ӵукнаосы дунтэк йӧл яке йӧллэсь сиён сётӥське. Гурт нылпиосты нуэ-вае 444 автобус, 29-эз кылем арын басьтэмын.

Нимысьтыз саклык висъяське нылпи садъёсын ватсаса интыос усьтонлы. Туннэ шаерысьтымы ог 78 процентэз тэшкылиос школалэсь азьло визьноданъя учреждениосы ветло — Приволжск федерал округъя та одӥгез ӟечез лыдпус. Министрлэн верамезъя, берло аръёсы 8 сюрс 330 ватсаса инты кылдытэмын ке, 2016-тӥ арозь эшшо 8 сюрс 500-эз усьтӥськоз. Вуоно арын 3 аресозь нылпиос пӧлын черод бырыны кулэ. Отӥяз усьтӥськозы ясли группаос но  — таӵе курон пуктэ «Дышетон сярысь» закон.

Дышетон удысэз юнматонлэн емышез ӟеч. Асьме дышетӥсьёс вормонъёс басьто Россиын радъяськем конкурсъёсын. Уката шумпоттэ нылпиосмылэн адӟем карымон луэмзы. Россиын сяна, кунгож сьӧрын радъяськись конкурсъёсысь но соос вормон интыосын вуо. ЕГЭ амалэн сётӥськись экзаменъёсын ӟечесь тодон-валанъёссэс возьмато — баллъёссы арлы быдэ Россиынлэсь вылӥынгес люкасько. Озьы кылем арын 33 мурт 100 балл люказ.
Бен, та пумысен аслаз малпанэз Президентлэн:

— Нылпиосмылы ӟечесь тодон-валанъёс сётэмен ӵош пыӵатоно на Атыкай музъеммес гажан мылкыд. Соос кунгож сьӧры медаз кошке, быгатэмзэс мед сётозы асьме кунлы ик. Республикаямы усьтэмын патриотической воспитаниея центр. Озьы 10-тӥ классэ ветлӥсь 7 сюрс пала пиос туэ апреле отын армиын кадь улыны дышетскозы ни. Котькуд школалэн директорез мед сюлмаськоз, школьникъёс отчы мед сюрозы шуыса. Кин та куронэз ӧз быдэсты, меӵак верасько, кылзэс зол юало.

Отӥяз Александр Волков эшшо кӧня ке лыдпусъёсты ватсаз на. Пусйиз: вуоно арын дышетон удысын 50 юрт пуктэмын луоз. Со пӧлысь 26-ез — нылпи сад, 10-эз — школа. Нылпи садъёс, городъёсын сяна, гуртъёсын но усьтӥськозы.

— Малпасько, таӵеез Россиысь одӥг улосын но ӧвӧл, — ватсаз Президент. — Асьмеос ваньмы валаськом ук: выль школаос, нылпи садъёс пуктон — азьланез сярысь сюлмаськон. Дышетӥсьёслэн уждунзы но шорлыдын 19 но ӝыны сюрс манет пала луиз. Воспитательёс шорлыдын 15 сюрс манет пала басьто ни. Сомында уг люкаськы уждунзы «Ижмашын», «ИжАвтоын» ужасьёслэн. Нош ар пумозь дышетон удысын шоро-куспо уждун ортчоз 20 сюрс манетлэсь. Озьыен, асьмеос ӟеч мылкыдын улыны быгатӥськом. Нош мылкыд ӟеч ке, ужамлэн пайдаез но золгес.

Элина Кумачёва
Туспуктӥз Владимир Беломорских

Удмурт Дунне
By Удмурт Дунне 1 марта, 2013 09:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<