Кырӟан 50 ар улоз на?

Удмурт Дунне
By Удмурт Дунне 22 марта, 2013 09:54
Иван Котельниковез вормисе бырйизы залысь учкисьёс

Иван Котельниковез вормисе бырйизы залысь учкисьёс

«Зарни перепеч» ӵошатсконэ вуэмъёс мылкыдъёссэс концерт бере но вотэсын верало.
Мирела Мазур, поляк кыллы дышетӥсь:

— Концерт вакчи вал. Валаса ик ӧй вутты, ӵошатскон люкетэз кутскиз. Кылем арын золгес вал кадь потӥз. Тужгес но кельшизы Никита но Ландина — саксофон но рояль, анайлы сӥзем кырӟанзы ӝож но чебер вал. Иван Белослудцев но сюлэмме бугыртӥз, нош «4 чебер пиос» ӧз тырме.

Светлана Арекеева но Наталья Кондратьева, удмурт кылосбур факультетысь дышетӥсьёс:

— Концертэз учкыса, воксё пельы жадиз. Туж ӧжытэзлэн гуръёссы лулын шутэтскымонэсь вал. Кужмы ик быриз. Удмурт кырӟанлэн камерной дуннеез ӧз шӧдӥськы.
— Нуисьёс ӧз вералэ, кинлэн кылъёсыз но крезьгурез чузъясько. Сотэк быдэслыко ӧз поты, маиз ке но ӧз тырмы.

Дэри ёросысь Плотниковъёс:

— Кельшизы Котельников но Тимерханова! Малы меда билетэз кыклы кесьыса, кык мурт понна куара сётыны уг луы? Зэмос куаш-куаш шулдыр гуръёс. Чебер кырӟало, куараоссы пуктэмын.

Анатолий Галиханов, крезьгурчи:

— Зэм но-а шумпотӥськоды вормисе потэм гуръёслы? Уг паймиськы, соос вормизы шуыса — паймисько, соос та дунне вылын вань на шуыса! Валамон, таӵеез 30-40 аресъемъёслы кельше ке, нош егитъёслы кызьы? 21-тӥ даурын улӥськом… Асьме удмуртъёс понна гинэ кылзымон гуръёс ӟечлыксыя эскпорт продуктъёслэсь уродгес луыны кулэ ӧвӧл. «Огшоры, калыклы матын» шуыса, аслыд индульгенция портыны уг яра. Эн вералэ: котькыӵеез яралоз — удмурт кылын гинэ медло! Тросэзлэн кырӟасьёслэн пушказы улӥсь критиксы уг тырмы.

Светлана Ручкина, кырӟась:

— Гуртын будэмъёслы городын кисьмам крезьгур валантэм потэ. Соин ик гуртоос куараоссэс Котельников понна сёто. Озьы ке но Иванлэн гуръёсыз ӟучомемъёсты берен удмурт лулчеберет борды уз кыске. Озьы ик таш-таш удмуртъёс туалазэ кулэ уг каро — таӵе кырӟанъёсын 50 ар пала гусъяськозы на. Мон малпасько, кемагес улыны удмурт кырӟан уз чида — глобализациен мертаськыны уз вормы.

Геннадий Корепанов, удмурт концертъёсты радъясь:

— «Зарни перепеч» сярысь малпанъёсы самой умоесь. Туж кулэ ужрад та. Нырысь ик, удмурт калык вите. Кыкетӥез — егитъёслы кулэ. Татын астэ эскерыны луонлык сётэмын. Ми, учкисьёс, асьмеос быръём ини, кинэ шыкысамы кельтом, нош кинэ ум. «Арлэн кырӟанэз» ужрадын азьпал радэ кырӟан потэ, «Перепечын» — артист. Пӧлысьтызы тужгес но золэз — Антон Васильев. Таиз мон понна тужгес но ӟеч кырӟась. Ужано, будэтоно Камалиез! Одно ик — дӥсяно! Сцена вылын рос-прос костюм луыны кулэ. Максим Матвеевез кыдатоно на, быгатонлыкез вань. Никита Ильинлэн номерез умой пуктэмын, но куараеныз туж трос ужано луоз. Жаль, Александр Ашихминлэн номерез саптамын вал: тыл пеймыт, фонограмма дыраз ӧз ӝуатскы.

Дарали Лели

Удмурт Дунне
By Удмурт Дунне 22 марта, 2013 09:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<