Кылы быре…

Удмурт Дунне
By Удмурт Дунне 19 марта, 2013 10:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылы быре…

Ашальчи Оки 1960-тӥ аръёсы

Ашальчи Оки 1960-тӥ аръёсы

Ашальчи Оки вордскем дырысен — 115 ар

Нырысетӥ нылкышно кылбурчимылэн   Ашальчи Окилэн мылкыд-малпанъёсыз тани сю ар пала ини лыдӟисьёслэсь лул-сюлэмзэс чепылляло. Нош кытын меда со мур, чылкыт шурлэн кутсконэз?

Ашальчи Окилэн улон сюресэныз тодматскыса, вераны быгатӥськом: солэн нырысетӥ чуръёсыз печатласькизы, Бадӟым Уча волостьысь Будӟимшур-Пельга школаын ужакуз. Та школаын со 1916-тӥ-1918-тӥ аръёсы тыршиз. Солэсь азьвыл егит дышетӥсь  туала Татарстанысь Субаш но Вуж Кушкет школаосын ужаз, но пумен дор палазгес кыстӥськиз. Малы дышетӥсь басьтӥськиз гожъяськон борды?

Литературалэн историез возьматэ, тросаз культураосын нырысетӥ писательёс дышетон удысэн герӟаськемын вал, дышетскемзыя — дышетӥсьёс.  Акилина Векшина но Карлыган черкогуртысь Центральной удмурт школаез йылпумъяз но дышетӥсь луон понна Елабугаысь епархиальной училищее пырыны экзамен сётӥз. Со школаен тодмо удмурт югдытӥсь Кузьма Андреев кивалтӥз, Ашальчи Оки солэн Ольга нылыныз ӵош дышетскиз но быдэс улонзэ соин эшъяськиз.

Нырысетӥ кылбурзэ («Аракы быдтэ улонэз») но вероссэ («Кык лудкечез ӵош уд куты») Акилина Векшина печатлаз «Виль синь» газетын 1918-тӥ арын 10-тӥ мартэ. Та номерын ик потӥз агаезлэн Иван Векшинлэн (Айво Ивилэн)  «Оскыса ул» кылбурез. Малпаны быгатӥськом: дышетӥсьын ужась сузэрзэ ӵапак со газет котыре кыскиз. Угось дышетскем, удмурт кылын гожъяськись адямиос соку туж ичи вал, соин вылӥ дунъяськылӥзы. Ачиз Айво Иви «Виль синь» газетын секретарь но, корректор но, гожъяськись но вал. Ашальчи Окилэн нырысетӥ кылбуръёсыз гожтэмын вал курадӟыса улӥсь удмурт нылкышнолэсь лул-сюлэмзэ усьтон понна, калыкез югдытон, ӟеч сямъёс пыӵатон понна.

1918-тӥ арын 25-тӥ июне газетын потӥз Ашальчи Окилэн куинетӥ «Шудэд тонэ алдаз ке» нимо кылбурез.  Со А. Пушкинлэн «Если жизнь тебя обманет» элегиезъя кылдытэмын, эрико берыктэмын, шуыны луоз. Та лирика борды выжон луэ ини.
«Виль синь» газетын потам кылбуръёсыз бӧрысь тупатъятэк пыризы «Удмурт стихотворенняёс» но «Удморт кылбуръёс» антологиосы. Соосты 1919-тӥ арын Т. Борисов поттӥз. Озьы Ашальчи Окилэн зэмос кылбуран вакытэз кутскиз.

Улон-вылон сюресъёс Акилина Векшинаез кылем даурысь 20-тӥ аръёсысь ваньмыныз сямен визьмо, дышетскем удмуртъёсын тодматӥзы. Нырысетӥ кылбуръёсыз «Виль синь» но «Гудыри» газетъёсын печатласькизы, нырысетӥезлэн редакторез вал Константин Яковлев, кыкетӥезлэн — Трокай Борисов. Кузебай Гердэн Векшина нырысьсэ пумиськиз 1918-тӥ арын туала Можга ёросысь Бадӟым Учаын ортчем дышетӥсьёслэн съездазы. Казаньысь университетын Акилинаез дышетӥзы Иван Яковлев но Иван Михеев. Казаньын ик пумиськылӥз Гердэн 1922-тӥ арын. Куинь ар ортчыса, Векшина кунояз Москваын — В. Брюсов нимо литературной институтын дышетскись Иван агаез дорын но Кузебай Гердэн куинетӥзэ адӟиськиз.

Удмурт калыклэн дано пиосыныз пумиськылонъёс, синмысь синме кенешонъёс юнме ӧз ортче, сюлмаз-йыраз мур пытьы кельтӥзы. 1924-тӥ-1925-тӥ аръёсы солэн творчествоез котыр ласянь усьтӥськиз. Сое валаны луэ сётэм таблицая но.

1925-тӥ арын Москваын потӥз Ашальчи Окилэн нырысетӥез, со ик  берпуметӥез, кылбур бичетэз — «Сюрес дурын». Кылбуръёссэ нимаз книгаен поттыны мылкыд сётӥз но сое улонэ пыӵатыны юрттӥз Кузебай Герд: кылбуръёссэ тупатъяз, кивалтӥсьёс дортӥ бызьылӥз, поттыны курыса. Гердлэн киыз, малпаськон манерыз шӧдӥське «Сюрес дурын» сборниклэн радъяськемаз но — аслаз Гердлэн «Крезьчи» сборниказ сямен ик, кылбуръёс гожтэм аръёсъя уг сыло — люкылэмын темаен-темаен.

Малы Ашальчи Оки чалмиз нырысетӥ бичетэз потэм бере? Куинь ар ортчыса, со гожтӥз одӥг гинэ кылбур — «Кылы быре» но 4 верос — «Онисьлэн шудэз», «Орок», «Бӧдёно», «Культпоход» но  «Сылал» тодэ ваёнъёс.

Ашальчи Окилэсь кылбуръёссэ ас вакытысьтыз, котырысьтыз тодосчиос, гожъяськисьёс пӧртэм сямен дунъяллязы. Вал дурбасьтӥсьёс,  юрттӥсьёс: Айво Иви, Иван Михеев, Трокай Борисов, Константин Баушев. Соостэк Ашальчи Оки кылбуран дуннее ӧй вуысал, дыр. Творчествозэ азинтонын нимысьтыз инты басьтӥз Кузебай Гердэн эшъяськемез.

Но улонын уг луы тушмонъёстэк но. Нылкышно кылбурчиез воксё мукет сямен дунъялляз, кылсярысь, Трофим Архипов. 1932-тӥ арын «Удмурт коммуна» газетын потэм статьяяз Ашальчи Окиез пыкылӥз, кылбуръёсыз пуксем, бӧрдон мылкыдын гожтэмын шуыса, выль улон лэсьтыны соос уг юртто. Андрей Бутолин 1935-тӥ арын «Вормон» альманахын гожтӥз: кылбуръёсыз синвуэз пызьырто, туала вакытлы уг тупало, «буржуазно-сантиментальноесь».

Ашальчи Оки ненег нылкышно сюлэменыз тросэзлэсь вазь шӧдӥз кышкыт вакытъёслэсь вуэмзэс, сьӧд пилемъёслэсь бугыръяськемзэс. Со ик луиз, вылды, чалмонлы муг. Удмурт интеллигенциез быдтон кутскиз 1932-тӥ арысен. Ашальчи Оки кык пол шедьылӥз следствие улэ, но бордаз кырмиськыны амал ӧз сюры.

ashalchi-1КПСС-лэн XX съездэз бере (1956-тӥ ар) врач Акилина Векшина нош ик берытскиз гожъяськон борды. Удмурт писатель Аркадий Клабуков Ашальчи Окилы вазиськиз, выльысь гожъяськон удысэ выжыны курыса. Та пумысен Ашальчи Оки тазьы вера: «Кыӵе паймоно кадь дыръёс вуизы! Тани кырӟа вылэм табере тыр куараен, нош…куара ӧвӧл».

Бен, Ашальчи Оки тӥям бурдъёссэ выльысь вӧлъяны тыршиз. Гожтэтысьтыз лыдӟиськом: «Ма сярысь гожъяно? Кема малпай. Я пьеса гожтэм потэ, я кылбуръёс, я веросъёс. Огкылын вераса, трос вузъёсын тыр магазинэ пырем адями кадь вал мон: созэ но басьтэме потэ, тазэ но, куинетӥзэ но, коньдонэ нош ӧвӧл. Гожтӥ «Мынам абие» пичи верос. 6-7 пол гожъяй…Толон нош малпай «Пинал дыр» выллем повесть-а, мар-а гожтыны… Мынам син азям лэсьтоно юртэлэн тусбуйыз шара адӟиське ини. Гожтэмелы кыӵе ним сёто, уг тодӥськы на. Но со луоз пинал дырысеным кутскыса мынам вань улонэ. Медицинаын но литератураын улонэ… Котьма сярысь гожъяло, печатлалозы-а, уз-а — сое чаклатэк. Туж гожъяме потыны кутскиз».

Гожъяськонэзлэн кыкетӥ вакытэз сокем емышо ӧй вал ни, со ӧз кылбура ни, 11 тунсыко вероссэ печатлаз. Озьыен, Ашальчи Оки 37 кылбур но 20-лэсь трос верос гожтыса вуттӥз. Трос-а со, ӧжыт-а — возьматӥз вакыт. Даур пыр ортчыса, солэн лул-сюлэм пыртӥз поттэм мылкыдъёсыз но малпанъёсыз туннэ выль лыдӟисьёсыз бордазы кыско, пинал гожъяськисьёсты будэто. Кызьы пусъе тодмо тодосчи Владимир Владыкин: «Ашальчи дорозь но тодӥзы вал удмуртъёс сярысь. Со тодматӥз дуннеез удмурт нылкышноен. Ашальчи усьтӥз асьмелы солэсь лул-сюлэмзэ, вераз, марлэсь пачылме-мӧзме но мар сярысь кырӟа-бӧрдэ нылкышно сюлэм. Нош со ичи ӧвӧл, чик ичи ӧвӧл ни. Кышномурт выжыяськытэ адямиез, семьяез, быдэс калыклэсь вань улон-вылонзэ. Поэзиез но. Ашальчи кизиз-выжыятӥз удмурт поэзиез фольклорлэн улӟытӥсь муаз. Со ачиз но фольклоре выжиз, оло».

Любовь Фёдорова,
педагогика наукаосъя кандидат

Удмурт Дунне
By Удмурт Дунне 19 марта, 2013 10:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<