Куакагуртысь «ТераНова»

Удмурт Дунне
By Удмурт Дунне 22 марта, 2013 10:37

Куакагуртысь «ТераНова»

Куакагурт фермаын скал люктан тусьёс лэсьтӥзы ини

Куакагурт фермаын скал люктан тусьёс лэсьтӥзы ини

Гуртлэн улонэз потэ ферма бордысь

Удмуртиысь Гурт удысъя но сиён-юонъя министерство ивортэмъя, тужгес ӧжыт йӧл кыско Камбарка ёросысь «Родина» хозяйствоын, Каракулиноысь «Бел-Кам-Агроын», Красногорскысь «Ленин нимо колхоз» СПК-ын, Сюмсиысь «Гид-Агроын», Ярысь «Лекмаын» но Можгалась «ТераНова» хозяйствоын. Татын одӥг скаллэсь 4 но ӝыны килограмм сяна йӧл уг басьто. Ярам, уйпал ёросъёсты валалод ай: музъемзы но начар, пудо лыдзы но ӧжыт. Нош кызьы ӟеч музъемо но шунытгес омыро можгаос таос радэ султӥзы?

«ТераНова» хозяйствое одӥг гурт гинэ пыре — со Куакагурт (Чемошур-Уча). Отчы но сӥзьыл-тулыс сульпаськем но зор-кот дыръя капчиен уд сюры — нӧдод. Кирпичлэсь ӝутэм коркаоссы йӧн-йӧн сыло. Юртъёсы ву кыскемын. 2003-тӥ арын коркаосы шуныт пыртэмын. Озьы ке но, куд-огезлэн капка азяз но уд матэкты — лымы шунамъя пыдесозь ву пуке. Канава кырыны воргорон киос уг тырмо. Гурт администрация ивортэмъя, Куакагуртэ прописать каремын 240 мурт. Но зэмос улӥсез татын 120 сяна уз луы. 38 пенсионеръёс, 40 нылпиос. Ужасез, озьыен, 42 сяна, уг люкаськы. Соос пӧлысь но уноез пиосмуртъёс, кузь коньдон сьӧры уйиськыса, Удмуртилэн палэназ кошкемын.

Кышнооссы нылпиен утиськыса пуко. Татын уго нылпи садзы ӧвӧл. Школае но артысь Тылой гуртэ ветло. Магазинзы но ӝыт гинэ усьтӥське — гуртазы ик улӥсь воргорон ужаса бертэмез бере ӧсъёссэ усьтэ вуз карыны. Ярано коть, медпунктсы ужа. Пенсия люкыло, коркась корка пыраса.

Озьы ке но гуртоослэн интыысьтызы вырӟемзы уг поты: фермаосмы вань на дыръя Куакагуртамы ик, пе, улом. Хозяйствомы воксё куашказ ке, соку, пе, йырбермес корманы кутскомы. Шыпыт но шулдыр ук татын. Гужем зэмен ик уд ӵыды!

— Тӥ дорамы кылем арын октябрь толэзе лыктэ вал, берлань потыса кошкысалды, — шуэ фермаосын кивалтӥсь Василий Берёзкин. — Соку воксё быриськомы ни вал. Но ноябрь толэзе милемлы выль кузё сюриз — артысь Пичи Сюга гуртысь азьвыл фермер Пётр Соколов. Табере Бразилиын сямен улыны кутскомы ай. «Теранова» уго соос сямен «выль музъем» шуэмез возьматэ.

1Татын али 18 ужасез. Но со но туж тырмыт ни, шуэ Можга ёрослэн йырыз Аркадий Вершинин.
— Куакагуртъёс азьвыл пыро вал Тылойысь (Валожикья) бадӟым хозяйствое. Но кивалтӥсезлы номыр кулэ ӧй вал. Татысь скалъёсты медаз вуза шуыса, хозяйствоез ноябре кыклы люким. Выль кузёлэн Пётр Соколовлэн аслаз 1 сюрс но ӝыны гектар музъемез вал, кидыс будэтонэн выриз, пудо сиён дасялляз. Нош пудоез ӧвӧл. Ӵектӥмы но, шумпотыса басьтӥськиз. Зэм, гуртоослэн юанзы кылдэ ик: малы вань техника но, вань пудо сиён но Тылое кылизы, нош Куакагуртлэн паез — сютэм скалъёс гинэ. Но Тылоез туннэ банкрот ялӥськомы, сое басьтӥсь утчаськомы. Техника но отын туж начар вал ни — люкылыса пайдаез ӧй луысал. Удобренитэк нянь будэтӥзы — урожайзы но ӧй вал ни.

Нош Соколовлэн аслаз тракторъёсыз но вань, пудо сиёнэз но азьпаллы туж трос дасямын. Скалъёсты сюдыны вормоз вуж колхоз пайтэк но. Зэм, кемагес малпаськыны яратэ со, но кивалтӥсь солэсь ӟеч луоз. Солы вань осконъёсы, — вера Аркадий Вершинин.
* * *
Пётр Соколов ачиз но бурдъяськемын. Сӥзьылозь куиньзэ ик фермаез быдэсак выльдыны дасяське. Уждун тыре. Солэсь ортчыт — уждун басьтонъя валля арлэсь пунэмъёссэс но кысӥз. Азьвыл уго копейка но адӟытэк улӥзы гуртоос. Асьсэ гидъёсазы пудо будэтыса но сое вузаса гинэ на возиськизы. Соколов кредитэ но пыриз ни. Но сокем ик кӧшкемыт ӧвӧл — берыктыны быгатымон, шуэ.

Пётр Соколовлэн мылкыдъёсыз уртчо. Выль хозяйствозылы ним малпакузы но, аслэсьтыз кылзэ вераз. «Теранова» кыл али котькытын тодмо. Оло, пе, Европае йӧлмес келяны быгатомы ай, соку, пе, та ним туж юрттоз, удмуртсэ уго кунгож сьӧрын уз валалэ. Али йӧлзы «Можгасыр» заводлэсь палэнэ уг кошкы. Отын басьто литрзэ 14 манетэн.

Нош асьсэлэн 190 скалзы ваньмыз ик лейкозэн черламын. Али вордӥськем 47 кунянзы но югдрез уз тупаты. Зэм, валтӥсь зоотехник Галина Королёва уг чигиськы:

— Колхозмы бадӟым дыръя на пудоез тазатонъя программа ужаны кутскиз. Таин валче Куакагуртэ висись скалъёсты келязы, чылкытъёссэ — Тылое. Но табере ми нимаз хозяйство ни. Гидъёсмес тупатъямы ке, пумен луонлык кылдоз таза пудо вайыны, висисьсэ вандыны. 1970-тӥ-1980-тӥ аръёсы хозяйствомы районын тужгес умойёсыз пӧлы пыре вал ук йӧл кысконъя но, пудо сиён дасянъя но. Али гинэ бере кылисьёс радын ветлӥськомы. Но ӟеч кузёен югдурез интыысьтыз вырӟытыны шуг ӧвӧл, дыр. Ужаны мылкыдъёсмы милям бадӟымесь. Тылойысь колхозникъёс но дорамы ужаны лыкто ни ай. Ачим но отысь выжи. Музъем пайёссэс но гуртоос выль колхозлы сётыны туртто. Соку чылкыт скалъёсты нимаз пастукан инты но сюроз.

Но пудо йырзэс лейкозлэсь чылкытатон азьын ой-ёй кӧня ужез бералтоно на! Гидъёсын шулась тӧл пыртӥз потэ. Липет пась. Кытӥ-отӥ со поликарбонат юдэсъёсын ӵоксаны выремын. Но талэн толыкез воксё ӧвӧл! Сисьмем выжъёсыз воштоно. Пудо сиён тырон выжзэ но бетонэн кисьтоно. Ваньмыз та одно луоз, оско ужасьёс.

— Кылем ар пумын гинэ пудо сиён тырон проходмы ӧз куасьмылы. Азьвылэз кузё воксё сюлмаськымтэен, скалъёслэн ву люктан тусьёссы гинэ но ӧй вал ни. Нош сюроосты вутэк возёд шат? Югдурысь кызьы ке потон понна пудо сюдӥсьёс турын вылэ ик шлангысь ву кисьталлязы.

Быдэс выж котмыса улӥз, борддоръёс нюласа пурысьтанлы сётскылӥзы. Ярам, Пётр Алексеевичмы тол вылтӥ но сварщикъёсты гидэ пыртӥз, ву люктан тусьёс лэсьтытӥз. Милям табере фермамылэн нимысьтыз загонэз но вань ни. Татчыозь пудомес омырен шоканы но ӧм потталлялэ толалтэзэ. Ма, поттон понна сиён но кулэ вал ук. Номырлы уксё ӧз тырмылы. Табере комбикорм, витаминъёс, макродобавкаос но сётъяло ни. Мычиськем урдлыоссы кӧйын шобырско ни ай, — шумпотэ Василий Берёзкин.

* * *
Мукет ужасьёс но паймо: асьме кадь начар хозяйство, пе, дунне вылын вань на меда? Татын уго молокопроводзы но ӧвӧл.

— Шонергес вераса, 1980-тӥ аръёсы сое пуктылӥзы ик. Но скал кыскисьёс кулэ кариллямтэ. Молокопровод пыр потыса, йӧлмы ичия кадь йӧтылӥз. Нош киыныд кӧня кыскиськод, ваньзэ ачид тодӥськод. Тӧрнам веразэ но, маститсэ но адӟыса вуттӥськод. Пудодэ но маялтыса утчаськод, лӥятӥськод. Нош техника, пе, номыре тае уг вала. Соин ик мултэс каризы сое. Тус-тас луыса ик пильылӥськиз, сисьмиз, — шуэ Галина Королёва.

Бордаз итӥське скал кыскись Любовь Мартынова:
— Ми татын 5 кузя скал кыскиськомы. Эшшо кык мурт милемыз вошъя на. Но эшъёсылэн молокопровод борды берыктӥськемзы уг поты ни. Мон ачим соин ужаса ӧй вутты. Юлтошъёсы пӧлын тужгес егитэз уго — 40 аресэз сьӧры гинэ потэмын ай. Соин ик уг тодӥськы вераны: молокопроводэн умойгес я уродгес луысал. Но капчигес, оло, йӧтысал ик. Фермаысь 16 скалэз кыскисько. Ӵукна 7 часысен 10 часозь котыразы бергасько. Вераоссэс миськыны шуныт ву нуллыса ик, жуммисько. Ӝыт нош воксё но 6 часысен 10 часозь фермаын ортчытӥсько.

6Кин но со пайме ик: скалъёссы но висё, фермазы но куашка ни. Хозяйство кылдытыса, оло, курадӟонэз но ӧй вал ни. Пумен уго ужась киослы воксё ёрмозы. Егитъёс гуртэ уг кылё ни. Но туннэ куакагуртъёслэн ӵуказе нуналлы осконзы бадӟым. Фермазы быриз ке, гуртсы но воксё куашкалоз ук.

Елена Сараматова
Туспуктӥз Владимир Беломорских

Удмурт Дунне
By Удмурт Дунне 22 марта, 2013 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<