Калыклэсь пӧртэм ӧвӧл

Удмурт Дунне
By Удмурт Дунне 29 марта, 2013 11:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Калыклэсь пӧртэм ӧвӧл

Т. Феофанова

Т. Феофанова

Пичи Пурга ёросысь Бобья-Уча гуртысь Татьяна Феофанова «Мила» магазинэн кивалтэ. Егит, чебер кышномуртэ калык гажа но яратэ.

— Татьяна Геннадьевна, тӥ вылӥ тодон-валан басьтӥллямды Свердловскысь педагогикая институтын. Кызьы вуз каронэ шедиды?

— Школаын дышетскыкум, туж потэ вал лётчик луэме. Но гуртын вордскем нылашлы кин сыӵе луонлык сётоз ай? Ӵапак соку газетысь ялон адӟи: Калыкез дышетонъя но наукая министерство, пе, логопедэ дышетскыны группа дася. Шумпотӥ, экзаменъёсме умой сётӥ но, монэ дышетскыны кутӥзы. Кыӵе-мар со профессия, ачим умой-умой уг но тодӥськы вал. Соку логопедъёс сярысь трос вераськись ӧй вал на. Одӥгезлэсь гинэ кышкатски — дышетсконо, пе, луоз палэнын — Свердловск городын. Удмуртиысь вить кузя ми отчы шедимы. Со нылъёсын али ке но ӟеч кусып возиськомы, ог-огмы доры куное ветлӥськомы.

Тодон-валан басьтон удысэ туж тунсыко потӥз. Институтэз йылпумъяса, соку ужаны ас мылкыд каремедъя котькытчы луэ ни вал мыныны, Удмурт шаерам ик берытски, Ижысь 91-тӥ школае интыяськи. Нырысь ик туж кельшиз пиналъёсын ужаны, собере валай, та мынам удысэ ӧвӧл. Городын улон интые ӧвӧл, уждун но дырыз дыръя уг тыро. Малы тазьы курадӟыса, квартираостӥ костаськыса ветлод шуыса, улыны гуртэ бертӥ. Мамаен тятя но пумит ӧз луэ.

Мамамы Людмила Александровна 1993-тӥ арын быткомбинатлэн но почталэн сэрегазы, будка кадь гинэ, туж пичи магазин усьтӥз. Капчи ик ӧй вал удысэз, но чидаз, пыд йылаз юн сылӥз. Уката ик со аръёсы ужбергатӥсьёсты налогъёсын пачкатъяллязы.

Мамалэн сямыз лякыт вал, адямиен одӥг кыл шедьтылӥз. Вуз карон удысын калыкен быгатыса ужаны кулэ ук. Озьы мамалэн ужез ӧръяськиз, пумен паськытаны кутскиз. Городысь кошкыса, мама вӧзын ужано кариськи. Улэм-вылэмъя быткомбинатэз быдэссэ асьмелы басьтыны быгатӥмы, магазинмес паськытгес каримы: сиён-юонъёсын но пӧртэм вузъёсын отдел усьтӥмы. Отӥяз тятя но милемлы юрттӥськыны басьтӥськиз: семейной подряд кылдытӥмы. Со машинаен вуз ворттӥз, милемыз складъёстӥ но базаостӥ, вуз утчаса, нуллӥз. Табере со пенсиын шутэтске ини, озьы ке но туж трос юрттэ на. Жаляса верано, 2004-тӥ арын мамамес лек висён пыд йылысьтыз погыртӥз, ужаса ик со ӝуаз, дыр.

Собере мон быдэсак мамалэн ужаз выйи, муртлы сое уд сёты ук. Магазинмес «Мила» (гуртоос озьы шуо вал мамамес) нимамы. Нырысь-валысь туж секыт вал дышыны, номырзэ уг валаськы. Вуз карисьёсмы но, выж миськисьмы но ӧй вал на, вань удысэз асьмеос быдэсъяллямы. Машинаен ворттылыны право но, машина но басьтоно луиз. Тодон-валанме будэтон понна Удмурт кун университетысь экономикая факультетэ дышетскыны пыри. Вуз карисьёсты кутӥ.

— Уйлы магазинды ворсаське, гуртоос, вуз курыса, дорады уг-а вуыло?

— Созэ-тазэ юаса, вазен пырак гуртэ лыкто вал, уйин но, вазь ӵукна но укное йыгаськылӥзы. Табере сыӵе вакытъёс ортчизы, туала арын адями визьмаськиз.

— Кин тӥлед юрттӥське?

— Ми куинь кузя сузэр-апайёс. Мон шоретӥез луисько. Ваньмы вылӥ тодон-валан басьтӥмы. Лиля апае — социальной ужась, нош Катя — судьялэн юрттӥсез. Солэн но, мынам сямен ик, кык вылӥ дышетскемез, Удмурт кун университетысь юридическойзэ сяна, историяя факультетэз йылпумъяз на. Кыкназы ик Ижын уло.

— Иське, оскымон адямиосты вань? Уксё ужез ваньмыз кие уд сёты, озьы-а?

— Лиля апае та уж борды уг ик кутскылы. Нош Катя котыр ласянь ваньзэ вала, лыдъяны-чотаны быгатэ, со монэ, шутэтскыны потыкум, ӵемысь воштылэ, интыям кыльылэ. Вань осконэ мынам семьяе вылэ. Лиля апаелэн Андрей пиез мыным юрттэ. Со городысь гуртэ улыны бертӥз. Кузпалэныз ӵош ик дорам уло. Андрей вуз ворттэ, монэ машинаен нуллэ, нош Ольга кузпалыз дорамы ик вуз карисьын тырше. Кыкназы ик соос вылӥ тодон-валан заочно басьто.

— Арлы быдэ зарезь дуре вуылӥськоды, дыр?

— Ой, озьы ветлыны дыр уг тырмы. Кошкиськод ке, интыяд туж оскымон адямиед мед луоз. Ужмы уксёен герӟаськемын бере, ваньзэ чакласа возьыны кулэ ук. Катялэн но ваньмон дырыз туж ик уг сюрылы. Одӥг пол гинэ пиеным шутэтскыны Абхазие вуылыны шуд усиз ик. Мукет интыосы ветлэммы ӧвӧл.

Нырысетӥ классэ ветлӥсь пие шуэ: акыльтӥз ни со магазинэд. Мон угось бер ӝытозь доре уг пыраськы. Нош пиналлэн мамаеныз ӵош потэ луэмез. Бертыкум пие кӧлыны выдэмын луэ ини.

Ужмы капчияз огез ласянь: доставщикъёс асьсэос, вуззэс дэмласа, ветлыны кутскизы. Озьы палэнэ потанъёс ӧжытгес но ӧжытгес луо.

Йырысь малпанъёс пичи но уг кошкыло. Одӥг-кык нунал аналскид ке, ужед интыяз пукоз, уз вырӟы. Уйзэ йырме висьытыса уг кыллиськы, жадисько, лэся, выдӥсько но соку ик умме усисько. Номыр карыны дыр уг тырмы. Озьы ке но пиелэн урокъёсаз но собраниосаз одно ик вутскылыны тыршисько.

— Магазинады кӧня ужась возиськоды? Вань-а дорады куриськисьёс?

— Милям али 7 кузя ужасьёсмы: 5 вуз карисьёс, одӥг выж миськись но шофёрмы. Дорамы ужаны лыктыны куриськисьёс вань гинэ. Колхозын али уж ӧвӧл, нош адямилы кытын ке но уждун поттоно, нылпиоссэ пыд йылаз ӝутоно. Мынам талэсь трос ужась воземе уг поты, нылъёс но тырмиськом кадь шуо. Соос вошъяськыса, сменаен ужало. Кыкез-куинез нылкышноосмы пинал вайыны кошкизы ини. Тани ми дорын кема аръёс ини ужало Ирина Кононова но Светлана Королёва. Светланамы али пиналын пуке.

— Тӥляд сяна, гуртады эшшо мукет магазинъёс вань на, дыр? Ог-огдылы пыд уд пуктӥське кадь-а?

— Гуртамы райполэн магазинэз вань на. Но басьяськисьёс малы ке но ми дорыгес ик лыкто. Выль магазин усьтон сярысь йырам кемалась малпанъёсы бергало ини, гурт пуме музъем но басьтэмын. Но шуак гинэ со борды кутскыны моӵе уг тырмы, лэся. Гуртмы бадӟым, малпасько, отчы но трос басьяськисьёс ветлысалзы.

— Магазинады турлы вузъёсты: веньысен кутскыса бадӟым телевизорозь. Кытысь кудзэ шедьтоно шуыса, уд-а йыромиське?

— Уг. Ма, мон дышиськем ини соослы. Котькуд вузме кытын кызьы кылле шуыса тодӥсько. Нош вуз карисьёс куддыръя йыромон калэ вуиськом, шуо. Утчаськыса, пе, кать быре.

— Кыӵе вузды умойгес кошке?

— Сиён-юонэз ке верано, колбаса но сӥль умойгес но чалякгес быро, уката ик гужемзэ, соку гуртэ трос калык шутэтскыны бертэ. Адямилы нуналлы быдэ сиён-юон кулэ ук. Чыры-пыры вузъёсты ке верано, созэ ини кулэезъя гинэ басьто.

— Кӧшомыны кутскем но урод луэм сиён-юондэс кытчы кариськоды?

— Сисьмыны но пурысьтаны кутскем сиён-юонэз списать карыны луэ. Сыӵе сиёнэз вуз карисьёс но, ачим но доре нуиськом, пудолы сюдӥськом. Улмоез туж умой сиё кроликъёс.

— Ёрос кивалтӥсьёс ӟеч тыршемдэс кызьы но маин пусъё?

— Мынам та юанэз кемалась ӝутэме потэ ни вал. Газетъёсысь но кытысь адӟоно: вуз карон удысын ужасьёслы озьы но озьы, пе, таукарон сётэмын. Мынам но ужасьёсме данъяме потэ. Но кытчы со сярысь вазиськоно, уг тодӥськы. Вуз карисьёслэн нуналазы райпоын ужась вузчиосты гинэ санэ медаз басьтэ вылэм. Соосты гинэ отын данъяло ук. Ужбергатон удысын ужасьёсты но палэнэ медаз кельтэ вылэм.

— Улон ӧрдэс воштыны ноку ӧд малпаськылэ-а?

— Сыӵе малпанэ ноку ӧй вал. Малы мон мамаелэсь кутскем ужзэ кир-пазь карыны кулэ! Чидано, ужано, лэсьтоно. Мон ке ӧй, кин сое азинтоз? Адями ваньзэ чидан понна вордскемын ук. Гуртысь кошкон сярысь уг ик малпаськиськы, мыным татын кельше. Улонлэн ӧраз пыриськод ке, вань шуг-секытъёсты вормиськод вылэм.

— Такем йӧно, егит, чебер но шаплы нылкышно уж пӧлы гинэ выйыса улэ-а?

— Вӧзам пие, эшъёсы но матысь ӵыжы-выжыосы вань. Куд-ог дыръя эшъёсыным пумиськылӥськом, соосын Удмурт театре но концертъёсы вуылӥськом. Дорамы но эшъёсы куное ветло.

— Гурт калыклэн вань улон-вылонэз кырымпыдэс вылын кадь адӟиське. Улыны быгатӥськоды шуыса, шорады кырыж учкисьёсты шӧдӥськоды-а?

— Нырысь-валысь со туж юн шӧдӥське вал. Одӥг аре ӝуаны шедимы, вань юртъер котырмы но машинамы сутскыса быризы. Гурт калык, корка пушкысь ваньбурмес поттакуз, паймем: чик но, пе, милесьтым пӧртэм уг уло вылэм. Быгатӥсез угось соку мудрон улыны кутскиз ни вал. Магазинэд вань ке, адямиос малпало, тон котькинлэсь узыр шуыса. Со чик но озьы ӧвӧл.

Любовь Тихонова
Туспуктӥз Владимир Беломорских

Удмурт Дунне
By Удмурт Дунне 29 марта, 2013 11:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<