Законъёс калык пала берытско

Удмурт Дунне
By Удмурт Дунне Март 29, 2013 10:11

Законъёс калык пала берытско

Кун Кенешлэн сессияз

Кун Кенешлэн сессияз

Таяз арня вискын ортчиз Кун Кенешлэн сессиез. Сое нуиз Кун Кенешлэн Тӧроезлэн нырысетӥ воштӥсез С. Кривилёва. Сессилэн ужаз пыриськизы Президент А. Волков, Правительстволэн Тӧроез Ю. Питкевич, Удмурт Республикая валтӥсь федерал инспектор Д. Мусин, Россиысь Федерацияя Кенешлэн ёзчиез А. Чекалин, Кун Думаысь депутатъёс Н. Аброськин но В. Шудегов.

Шунытэз тодӥсьтэмъёслы шуныт медло!

Депутатъёс кыкетӥ лыдӟонэн воштонъёс пыртӥзы «Анай-атайтэк будӥсь нылпиослы улон-вылонын юрттэт сётон сярысь» законэ. Табере таосын герӟаськем ужпумъёсты сэрттон-пертчон оскемын Дышетонъя но наукая министерстволы но Семья ужпумъёсъя но демографиын политикая комитетлы.

Воштонъёс пыртэмын республикамылэн 2013-тӥ арлы кутэм бюджетаз но. Пӧлысьтызы одӥгез озьы ик герӟаськемын сирота нылпиосын. Депутатъёс огкылэ вуизы: республикамылэн казнаысьтыз 140 миллионзэ манет висъяно Лэсьтӥськонъя, архитектурая но улон инты политикая министерстволы. Сое кутоно сирота нылпиослы юртъёс ӝутонлы. Правительстволэн Тӧроезлэн воштӥсез Валерий Богатырёв шуиз:

— Вазен пуктэм юртъёс сирота пиналъёслы люкылоно кадесь ӧвӧл ни, ӝутоно выльёссэ. Соос мед тупалозы туала куронъёслы, югытэсь, шунытэсь мед луозы.

Сирота пиналъёслы юртъёс пуктонъя кӧня ке проектъёс вань ни, но туннэ вераны уг луы на, кӧня корка пуктэмын луоз туэ ик. Тодмо соиз гинэ: кулэяськисьёс 900-лэсь ятыр. Та ужпум матысь дыре сэрттэмын-пертчемын луыны кулэ. Угось анай-атайтэк будӥсь нылпиосты интыянлы Россия туннэ нимысьтыз саклык висъя.

Светлана Кривилёва мылкыдзэ вераз:
— Егитъёсты одӥг корка интыяса, малпасько, ум янгышалэ. Вунэтоно ӧвӧл: соос пичиысен дышемын коллективен улыны. Со сяна, улон инты нырысь ик 5 арлы арендае сётӥськоз. Та дыр куспын соос кун чотын улозы, эшшо ке бордазы ужалозы психологъёс, социальной педагогъёс. 5 ар куспын егитъёс асьсэды улон-вылонын шедьтыны кулэ. Пӧрмытӥзы ке — улон интыязы кузё луыны быгатозы, ӧз ке — сэрег эшшо 5 арлы соослы арендае сётӥськоз…

Картошкаез воштоз чорыг?

Туэысен Россиын выль сямен лыдъяны кутскемын басьяськисьёслэн кудызылэн быдӟалаез. Табере солэн ӝыныез чакламын сиён-юонлы, лыдпусэн ик пусъемын, кӧня отын луыны кулэ соиз я таиз сиён — вазен таӵеез ӧй вал. Адямиос тросгес сиыны кулэ, пе, сӥль, чорыг, бакча емышъёс, палэнтӥськыны кулэ кӧё-вӧё сиёнъёслэсь, пыжиськемъёслэсь. Нош дӥськутлы но пӧртэм услугаослы кудыын быдэн ньыльмос люкетэз чакламын.

Удмуртиын улӥсьёслэн кудызылэсь быдӟалазэ депутатъёс Россиын кадь каризы. Кун Кенешысь социальной политикая ялан ужась комиссилэн кивалтӥсез Ольга Казанцева шуиз: бюджетысь та понна ватсаса 236 сюрс манет гинэ кулэ луоз.

Мар сётозы законэ пыртэм воштонъёс огшоры калыклы? Депутатъёс валало: тросэз тае ас вылазы шӧдыса но уз вуттэ. Мар сиё вал — сое ик басьтозы, мар дӥсяло — соин ик ветлозы. Но кудылэн быдӟалаез вылэ пыкъяськыса, лыдъяське улыны чаклам минимум. Нялтас вераса, со сярысь законэ но депутатъёс воштонъёс пыртӥзы. Нош йылэ ке улыны чаклам минимум, будо ёрмыса улӥсьёслы чаклам куд-ог пособиос. Кылсярысь, нокытын ужасьтэм анайёслэн нуны ваем понна пособиоссы кӧнялы ке йылыны быгатозы.

Манет борды манет…

Кыкетӥ лыдӟемен кутэмын «Удмурт Республикалэн инвестициосъя фондэз сярысь» закон. Солы луыса республикамылэн бюджетаз ватсаса коньдон лыктыны кулэ. Усьтӥськозы выль предприятиос, кылдозы выль ужан интыос, шаерамы вуозы инвесторъёс…

— Фондэ коньдон люкаськоз туж огшоры амалъя, — валэктӥз Кун Кенешысь бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова. — Асьме 1 манет борды Россия 1 манет ватсалоз на. Бен, со понна асьмеос проектъёс кылдытъяны кулэ, Москвалы но соос тунсыко мед луозы. Кылсярысь, та амалъя пуктэмын ИжГТУ-ысь бассейн.

Фондэ республикамылэн бюджетысьтыз 150 миллион манет сётыны чакламын ни. 3 проект конкурсэ поттэмын. Одӥгез соос пӧлысь герӟаськемын кыр интыосы коммуникациос кысконэн. Республикамы понна та али одӥгез сюлмаськытӥсь ужпум. Бусыосын тыл, ву ӧвӧл ке, лэсьтӥськон ужъёс но отын ӝегало, коркаос дуногес сыло.

Котькуд муртлы — 600 квадрат метр музъем

Улон интылы ёрмисьёслэн но асьсэ кужымен сое басьтыны быгатӥсьтэмъёслэн пичияк осконзы кылдыны кулэ. Республикамы дасяське дунтэм юртъёс пуктыны. Депутатъёс нырысетӥ лыдӟемен учкизы та ужпумез.

Тодмо ни: улон юртъёс пуктӥськозы жилищной фондлэн музъемъёсыз вылэ, соос федерацилэн луо. Таӵе интыос республикаямы вань, Ижын сяна, мукет городъёсын но. Нош отчы коммуникациосты кысконэз ас вылаз басьтыны кулэ республика. Озьы та чотын кулэсмоз улон инты дун, со 1 квадрат метрез 30 сюрс 400 манет усьыны кулэ — таӵе курон пуктэ Россиысь Улосъёсты азинтонъя министерство.

— Лэсьтӥськон организациос куспын аукцион радъямын луоз, вормоз соиз, кин пичигес дун куроз, — валэктӥз Кун Кенешысь Экономикаысь политикая, промышленностья но инвестициосъя ялан ужась комиссилэн тӧроез Владимир Варламов.

Кинъёс быгатозы экономклассэ пырись квартираосы шедьыны? Та сярысь али тыро-пыдо вераны уг луы. Законэ трос ватсанъёс но воштонъёс пыртэмын луозы на, вылды.

— Списокъёсты кылдытон бордын ужалоз Правительство, — пусйиз Светлана Кривилёва, — но валамон: отчы шедьыны кулэ улон интылы кулэяськисьёс, лыдэ басьтоно, дыр, соослэсь заслугаоссэс, тазалыксэс, кылсярысь, таӵеос пӧлы пыртыны луысал трос нылпи будэтӥсьёсты, инвалидъёсты, ветеранъёсты…

Воштонъёс пыртыны чакламын калыклы дунтэк музъем висъян сярысь законэ но. Таиз но ужпум нырысетӥ лыдӟемен учкемын. Мар дэмлаське проектын? Огласянь, закон небытгес пӧрмыны кулэ. Татчыозь адямилэн пичи ке но музъем кесэгез вал ни ке, солы музъем дунтэк ӧз висъяськылы.

Табере тупатэмын норма: одӥг муртлы 600 квадрат метр музъем усьыны кулэ. Уг тырмы ке — сое дунтэк басьтыны луоз. Кылсярысь, 4 муртлэсь семья 4 сотка вылын улэ — быдэн 1 соткаен яке 100 квадрат метрен усе. Иське, инты курыса, вазиськыны луоз администрацие. Таӵе правоез вань котькинлэн, мукет азьын ӧвӧл ке туала нормативъёслы тупась квартираез.

Эшъяськон ноку ӧз люкеты на

Правительстволы сӥзем час таяз радэ сӥземын вал национальной политикалы. Депутатъёс кылзӥзы нациосын ужан политикая министрлэсь Владимир Завалинлэсь докладзэ.

— Удмуртия гань-гань улосъёс пӧлы пыре, татын куспазы эшъяськыса, ог-огзэс валаса 130 пала пӧртэм калыкъёс уло, — пусйиз Владимир Николаевич. — Юалляськонъёс возьмато: 2000-тӥ арын 41 процентэз улӥсьёс таин соглаш карисько ке вал, али ог 66 процентэз.

Республикаямы ужало пӧртэм калыкъёслэн 33 огазеяськонъёссы. Ижын сяна, ёросъёсын но калык культураен вырись 100 пала центръёс вань. Пӧртэм калыкъёслэн культуразылы, сямъёссылы но йылолъёссылы сӥзем 500 пала ужрадъёс арлы быдэ радъяськыло…

Пусйымонэз ӧжыт ӧвӧл, но сюлмаськытӥсь ужпумъёс но кылемын на. Кылсярысь, удмурт кыл республикаямы кун кыл луэ. Но, кызьы пусйиз министр, ӟученыз ӵошатыса, со трослы ӧжытгес чузъяське, ӧжыт куто сое кивалтон ёзъёсын но. Тырмыт саклык уг висъяськы школаосын удмурт классъёс усьтонлы, дискъёс, дышетон пособиос но трос мукетыз кулэ. Туж кулэ, пе, мукет калыкъёслэн культуразылы, сямъёссылы сӥзем книгаос но.

Министрез кылзыса, депутатъёс решение кутӥзы: муниципал кылдытэтъёслы ӵектоно национальной ужпумъёслы сӥзем программаос кылдытыны, радъяны та ужпумъёсын вырись ёзъёслэсь ужамзэс.

Элина Кумачёва

Удмурт Дунне
By Удмурт Дунне Март 29, 2013 10:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<